പത്തനംതിട്ട: ശബരിമല തീര്‍ഥാടനം 2026-27 കാലയളവില്‍ സന്നിധാനം, പമ്പ, നിലയ്ക്കല്‍ എന്നിവിടങ്ങളിലെ നാലമ്പലങ്ങള്‍ക്കുള്ളില്‍ ഫോട്ടോഗ്രാഫിയും വീഡിയോ ചിത്രീകരണവും നിരോധിച്ച് ജില്ല കലക്ടര്‍ എ നിസാമുദ്ദീന്‍ ഉത്തരവായി. സുരക്ഷ, ഔദ്യോഗിക ആവശ്യങ്ങള്‍ക്കായി ബന്ധപ്പെട്ട അധികാരികളുടെ മുന്‍കൂര്‍ അനുമതിയോടെ നടത്തുന്ന ഫോട്ടോഗ്രാഫിയും വീഡിയോ ചിത്രീകരണവും നിരോധനത്തിന്റെ പരിധിയില്‍ ഉള്‍പ്പെടില്ല. നാലമ്പലങ്ങള്‍ക്കുള്ളിലെ അനിയന്ത്രിതമായ ഫോട്ടോഗ്രാഫിയും വീഡിയോ ചിത്രീകരണവും തീര്‍ഥാടകരുടെ സുഗമമായ ദര്‍ശനത്തിന് തടസ്സം സൃഷ്ടിടിക്കുന്നതിനും തിക്കും തിരക്കും വര്‍ദ്ധിപ്പിക്കുന്നതിനും തല്‍ഫലമായി അപകടസാധ്യത കൂടുന്നതിനും കാരണമായതിനാലാണ് നിരോധനം.
ശബരിമല തീര്‍ഥാടനം: ഡ്രോണ്‍ ഉപയോഗം നിരോധിച്ചു
ശബരിമല തീര്‍ഥാടന കാലയളവില്‍ സന്നിധാനം, പമ്പ, നിലയ്ക്കല്‍, അനുബന്ധ വനമേഖലകള്‍ എന്നിവിടങ്ങളില്‍ ഔദ്യോഗിക ആവശ്യങ്ങള്‍ക്കല്ലാതെയുള്ള ഡ്രോണ്‍ ഉപയോഗം പൂര്‍ണമായി നിരോധിച്ച് ജില്ല കലക്ടര്‍ എ നിസാമുദ്ദീന്‍ ഉത്തരവായി. സുരക്ഷ ഏജന്‍സികളുടെ ഔദ്യോഗിക ആവശ്യങ്ങള്‍ക്ക് ജില്ല പൊലീസ് മേധാവിയുടെ മുന്‍കൂര്‍ അനുമതിയോടെ മാത്രമേ ഡ്രോണ്‍ ഉപയോഗിക്കാന്‍ പാടുള്ളൂ. സന്നിധാനം, പമ്പ, നിലയ്ക്കല്‍ എന്നീ കേന്ദ്രങ്ങളും അനുബന്ധ വനമേഖലകളും തീര്‍ത്ഥാടന കാലയളവില്‍ വന്‍ ജനത്തിരക്ക് അനുഭവപ്പെടുന്ന അതിലോലമായ പ്രദേശങ്ങളായതിനാലും ഈ മേഖലകളില്‍ അനധികൃതമായ ഡ്രോണ്‍ ഉപയോഗം തീര്‍ത്ഥാടകരുടെ സുരക്ഷയ്ക്കും സ്വകാര്യതയ്ക്കും ഭീഷണിയാകുന്നതിനാലും സുരക്ഷാ ക്രമീകരണങ്ങള്‍ക്ക് ഗുരുതരമായ വെല്ലുവിളി ഉയര്‍ത്തുന്നതിനാലും വനമേഖലയിലെ വന്യജീവികള്‍ക്ക് ശല്യമുണ്ടാക്കുന്നതിനാലുമാണ് നിരോധനം.
