കോട്ടയം: രണ്ടാഴ്ച, റോക്കറ്റ് കുതിപ്പില് നിന്നു റബര് വീണത് 21 രൂപയുടെ തകര്ച്ചയിലേക്ക്. മഴ മാറി, ടാപ്പിങ്ങ് സജീവമായി വരികെയാണ് ഇരുട്ടടി. റബറിനെ വിലയിടിഞ്ഞതോടെ കോട്ടയത്തെ റബർ കർഷകർ ആശങ്കയിലായി.
റബറിന്റെ ഉത്പാദനം വര്ധിക്കുന്നതും ഇനിയുള്ള ദിവസങ്ങളിലാണ്. ഡിസംബര്, ജനുവരി മാസങ്ങളിലെ ടാപ്പിങ്ങില് നിന്നു മികച്ച ഉത്പാദനം ലഭിക്കുന്നതിനൊപ്പം മികച്ച വിലയും പ്രതീക്ഷിച്ചിരിക്കുകയായിരുന്നു കര്ഷകര്.
വില വര്ധനയിലെ നേട്ടം മോഹിച്ച് തോട്ടങ്ങള് പാട്ടത്തിനെടുത്തവരും പങ്ക് വെട്ടിനായി ഇറങ്ങിയവരുമൊക്കെ നിരാശയിലാണ്.
പാട്ടമെടുക്കുന്നതിനായി മുന് മാസത്തേക്കാള് വന് തുകയാണ്, വില വര്ധനവിനെത്തുടര്ന്ന് ഇത്തരക്കാര്ക്കു ചെലവഴിക്കേണ്ടി വന്നത്. ലക്ഷങ്ങള് മുന്കൂര് നല്കുകയും ചെയ്തു ഭൂരിഭാഗം പേരും. വിലയിടിഞ്ഞാല് നഷ്ടമുണ്ടാകുമോയെന്ന ഭയം ഇത്തരക്കാരെ ആകുലരാക്കുന്നു.
റബര്, ഒട്ടുപാല് വിപണിയില് നിന്നു വ്യവസായികള് മനപൂര്വം മാറിനിന്ന് മനപൂര്വം വിലയിടിയ്ക്കുകയാണെന്നു വ്യാപാരികള് പറയുന്നു. ഇതോടെ ചെറുകിട വ്യാപാരികളും ആശങ്കയിലാണ്. വില വര്ധന പ്രതീക്ഷിച്ചു കഴിയുന്നത്ര ഷീറ്റും ഒട്ടുപാലും വ്യാപാരികള് സംഭരിച്ചിരുന്നു. എന്നാല്, ഇപ്പോള് വാങ്ങാന് വ്യവസായികളും ഇടനിലക്കാരും വൈമനസ്യം കാണിക്കുകയാണ്.
നേരത്തെ, ചരക്ക് നല്കി ദിവസങ്ങള്ക്കുള്ളില് പണം നല്കിയിരുന്നുവെങ്കില് ഇപ്പോള് രണ്ടാഴ്ച പിന്നിട്ടാലും കമ്പനികളില് നിന്നു പണം ലഭിക്കാത്ത അവസ്ഥയാണ്. ഇതോടെ, ചരക്കുമായി എത്തുന്ന കര്ഷകര്ക്കു പണം നല്കാന് വ്യാപാരികള്ക്കും കഴിയുന്നില്ല.
രണ്ടാം തീയതി ആര്.എസ്.എസ്. 4 ഗ്രേഡ് റബര് 300 രൂപയെന്ന റെക്കോര്ഡ് വിലയ്ക്കു കച്ചവടം നടന്നുവെങ്കില് ഇന്നലെ കോട്ടയം മാര്ക്കറ്റില് വ്യാപാരികള് നല്കിയ വില 279 രൂപ മാത്രം. റബര് ബോര്ഡ് വില 285 രൂപയായിരുന്നുവെങ്കിലും ഈ വിലയ്ക്ക് വാങ്ങാന് ആരുമുണ്ടായിരുന്നില്ല. രാജ്യാന്തര വിലയില് രണ്ടാഴ്ചയ്ക്കുള്ളില് കാര്യമായ വര്ധനയുണ്ടായിട്ടില്ല. നാലു രൂപയോളം വര്ധിച്ച് ഇന്നലെ 262 രൂപയായിരുന്നു രാജ്യാന്തര വില.
200-210 രൂപയ്ക്കു വരെ വ്യാപാരം നടന്ന ഒട്ടുപാല് വിലയും കുത്തനെ ഇടിയുകയാണ്.ഇന്നലെ വ്യാപാരികള് ഒട്ടുപാലിനു നല്കിയത് 275-280 രൂപ മാത്രമാണ്. ലാറ്റക്സ്് വിപണിയിലാണ് വന് ഇടിവുണ്ടായത്. 300 രൂപയിലെത്തിയ ലാറ്റക്സ് വില 260 രൂപയിലേക്കു കൂപ്പുകുത്തി.
ഇപ്പോള് ലാറ്റക്സ് വില്ക്കുന്ന കര്ഷകര്ക്കു പരമാവധി ലഭിക്കുന്നത് 240 -45 രൂപ മാത്രമാണെന്നു കര്ഷകര് പറയുന്നു. റബറിനു വില ഉയര്ന്നപ്പോള് ആഘോഷിച്ചവരും മേനി നടിച്ചവരുമൊക്കെ വിലയിടിഞ്ഞതോടെ മൗനത്തിലായെന്ന ആരോപണവും കര്ഷകര്ക്കുണ്ട്.





