കോട്ടയം: കോട്ടയത്ത് സാമൂഹിക സേവന പ്രവർത്തനങ്ങൾ കൂടുതൽ ശക്തിപ്പെടുത്തുക എന്ന ലക്ഷ്യത്തോടെ റോട്ടറി ക്ലബ് ഓഫ് കോട്ടയം ടൗണിന്റെ അഞ്ചാമത് സ്ഥാനാരോഹണ ചടങ്ങ് പാർക്ക് ഹോട്ടലിൽ നടന്നു.
ചടങ്ങിൽ ക്ലബിന്റെ പുതിയ ഭാരവാഹികൾ ഔദ്യോഗികമായി ചുമതലയേറ്റു. റൊട്ടേറിയൻ എ.ജെ. അജിത് കുമാർ പ്രസിഡന്റായും, മനീഷ് തോമസ് പോൾ സെക്രട്ടറിയായും, അനൂപ് റോയ് ട്രഷററായും പുതിയ ഭരണസമിതിക്ക് നേതൃത്വം നൽകും.
സ്ഥാനാരോഹണത്തിന് പിന്നാലെ ക്ലബിന്റെ വരാനിരിക്കുന്ന പ്രവർത്തന പദ്ധതികളും പുതിയ നേതൃത്വം പ്രഖ്യാപിച്ചു. വിദ്യാഭ്യാസ മേഖലയ്ക്ക് പ്രത്യേക പ്രാധാന്യം നൽകി വിദ്യാർത്ഥികൾക്കും സമൂഹത്തിനും ഗുണകരമായ പദ്ധതികൾ നടപ്പാക്കുക എന്നതാണ് പ്രധാന ലക്ഷ്യമെന്ന് പ്രസിഡന്റ് എ.ജെ. അജിത് കുമാർ അറിയിച്ചു. ഇതോടൊപ്പം സാമ്പത്തികമായി പിന്നാക്കം നിൽക്കുന്ന ഒരു കുടുംബത്തിന് വീട് നിർമ്മിച്ച് നൽകുന്ന ജീവകാരുണ്യ പദ്ധതിയും ക്ലബ് ഏറ്റെടുക്കുമെന്ന് അദ്ദേഹം വ്യക്തമാക്കി.
ചടങ്ങിൽ റോട്ടറി അസിസ്റ്റന്റ് ഗവർണർ ജെബിസൺ ഫിലിപ്പ് മുഖ്യാതിഥിയായി പങ്കെടുത്തു. മുൻ പ്രസിഡന്റ് ഹരീഷ് ഹരൻ, ജിസ്മോൻ തോമസ്, സിജോ ജോസ് എന്നിവർ ആശംസകൾ നേർന്ന് സംസാരിച്ചു. കോട്ടയത്ത് സാമൂഹിക പ്രതിബദ്ധതയുള്ള പദ്ധതികൾ കൂടുതൽ വിപുലീകരിച്ച് വിദ്യാഭ്യാസം, ജീവകാരുണ്യം, സമൂഹക്ഷേമം എന്നീ മേഖലകളിൽ മാതൃകാപരമായ ഇടപെടലുകൾ നടത്താനുള്ള പ്രതിജ്ഞയോടെയാണ് പുതിയ ഭരണസമിതി പ്രവർത്തനം ആരംഭിച്ചത്.
