പൊൻകുന്നം : ശബരിമല തീർത്ഥാടനം ആരംഭിച്ച ശേഷമാണ് പൊൻകുന്നം എരുമേലി റോഡിലെ സുരക്ഷയുടെ കാര്യം അധികാരികള്ക്ക് ഓർമ്മവന്നത്. അന്യസംസ്ഥാനങ്ങളില് നിന്നുള്ള തീർത്ഥാടകവാഹനങ്ങള് ചീറിപ്പായുമ്പോള് പൊൻകുന്നം-എരുമേലി റോഡില് സീബ്രാലൈനടക്കം അടയാളപ്പെടുത്തുന്ന ജോലികള് തുടങ്ങിയിട്ടേയുള്ളൂ.
അധികാരികളുടെ അലംഭാവത്തിനെതിരെ അയ്യപ്പഭക്തരും നാട്ടുകാരും പ്രതിഷേധിച്ചു. വൃശ്ചികം ഒന്നിനുതന്നെ അയ്യനെ കാണാനെത്തുന്ന ഭക്തരുടെ വാഹനം തടഞ്ഞുനിറുത്തിയാണ് പണികള് നടക്കുന്നത്. മൂന്ന് ദിവസം മുമ്പ് എരുമേലി കുളത്തൂർമുഴിയില് നിന്ന് ആരംഭിച്ചതാണ് അടയാളപ്പെടുത്തല് ജോലികള്. പൊൻകുന്നം വരെയാണ് അടയാളപ്പെടുത്തല് നടക്കുന്നത്. ഇത് തീരണമെങ്കില് ഇനി ഒരാഴ്ച വേണ്ടി വരും. റോഡിന്റെ നടുവിലെയും വശങ്ങളിലെയും വരകളും ഇതോടൊപ്പം അടയാളപ്പെടുത്തുന്നുണ്ട്.
തിരക്കേറിയ പാതയില് ദിവസേന നൂറുകണക്കിന് അന്യസംസ്ഥാന തീർത്ഥാടന വാഹനങ്ങളാണ് കടന്നുപോകുന്നത്. നിരവധി അപകട വളവുകളുള്ള റോഡാണിത്. വഴിപരിചയമില്ലാതെ വാഹനങ്ങള് അമിതവേഗത്തിലാണ് വരുന്നത്. അതുകൊണ്ട് തന്നെ തൊഴിലാളികള് ഭയപ്പാടോടെയാണ് ജോലി ചെയ്യുന്നത്.
ജോലികളുടെ ഭാഗമായി വാഹനഗതാഗതം തടസപ്പെടുത്തുന്ന സാഹചര്യവുമുണ്ട്. തീർത്ഥാടനം തുടങ്ങുന്നതിന് മുമ്പ് റോഡിന്റെ അറ്റകുറ്റപ്പണികള് തീർത്ത് അടയാളബോർഡുകളും ദിശാസൂചക ബോർഡുകളും സ്ഥാപിക്കുന്നതായിരുന്നു മുൻവർഷങ്ങളിലെ പതിവ്.





