അന്വേഷണം നടന്നാൽ പല റിസോർട്ട് ഉടമകളും കുടുങ്ങും
കുമരകം:കുമരകം പഞ്ചായത്ത് അമ്മൻകരി നസ്രത്ത് പള്ളി റോഡ് സൈഡിൽ സ്ഥിതി ചെയ്യുന്ന റിസോർട്ട് വേമ്പനാട്ട് കായൽ കൈയ്യേറി മണ്ണിട്ട് നികത്തിയെന്നാരോപിച്ച് പഞ്ചായത്ത് മെമ്പർ പി.കെ. സേതു ജില്ലാ കളക്ടർക്ക് പരാതി നൽകി.
കായലിനോട് ചേർന്നുള്ള ഏകദേശം ഒരു ഏക്കറോളം കായൽ ഭാഗം അനധികൃതമായി മണ്ണിട്ട് ഉയർത്തിയതായാണ് പരാതിയിൽ പറയുന്നത്.
കേരള നെൽവയൽ തണ്ണീർത്തട സംരക്ഷണ നിയമം 2008, തണ്ണീർത്തട സംരക്ഷണ ചട്ടങ്ങൾ, കോസ്റ്റൽ റെഗുലേഷൻ സോൺ വിജ്ഞാപനം എന്നിവയുടെ ലംഘനമാണ് ഇതെന്ന് പരാതിയിൽ ചൂണ്ടിക്കാട്ടുന്നു.
കായൽ നികത്തുന്നത് പ്രദേശത്തെ മത്സ്യത്തൊഴിലാളികളെയും, ജലഗതാഗതത്തെയും, പരിസ്ഥിതിയെയും ഗുരുതരമായി ബാധിക്കുമെന്നും പരാതിയിൽ പറയുന്നു.
റവന്യൂ വകുപ്പ് ഉദ്യോഗസ്ഥരെ ഉപയോഗിച്ച് സ്ഥലം സർവ്വേ നടത്തി കൈയ്യേറ്റത്തിന്റെ കൃത്യമായ വ്യാപ്തി കണ്ടെത്താനും, നികത്തിയ ഭാഗം പൂർവ്വസ്ഥിതിയിലാക്കാൻ ഉത്തരവിടാനും, സ്ഥാപനത്തിനെതിരെ നിയമപരമായ നടപടി സ്വീകരിക്കാനും പരാതിയിൽ ആവശ്യപ്പെട്ടിട്ടുണ്ട്.
പരാതിയുടെ പകർപ്പ് തഹസിൽദാർ, കുമരകം വില്ലേജ് ഓഫീസർ, പഞ്ചായത്ത് സെക്രട്ടറി, കേരള സ്റ്റേറ്റ് വെറ്റ്ലാൻഡ് അതോറിറ്റി, കേരള കോസ്റ്റൽ സോൺ മാനേജ്മെന്റ് അതോറിറ്റി എന്നിവർക്കും നൽകിയിട്ടുണ്ട്.





