റിയാദ്: ഇന്ത്യക്കാർക്ക് മുന്നറിയിപ്പുകള്‍ ആവർത്തിച്ച്‌ സൗദി ഇന്ത്യൻ എംബസി. ജാഗ്രത പാലിക്കണം.ആവശ്യ ഘട്ടങ്ങളില്‍ വീടുകള്‍ക്ക് ഉള്ളില്‍ തുടരണമെന്നാണ് മുന്നറിയിപ്പ്.
സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തില്‍ വീണ്ടും ആക്രമണമുണ്ടായ പശ്ചാത്തലത്തിലാണ് മുന്നറിയിപ്പ്. 12 പേർ കൊല്ലപ്പെട്ട ഇന്നലത്തെ ഹൂത്തികളുടെ ആക്രമണത്തിന് ശേഷം ഇന്ന് വൈകിട്ടോടെയാണ് വീണ്ടും ആക്രമണം ഉണ്ടായത്. പാസഞ്ചർ ടെർമിനല്‍ നാലിന് നേരെയാണ് ആക്രമണം ഉണ്ടായത്. ഇക്കാര്യം സൗദി അറേബ്യൻ സേന സ്ഥിരീകരിച്ചു.
ഒരു മിസൈല്‍ തകർത്തു എന്നും തീപ്പിടുത്തം അണച്ചു എന്നും സൗദി സേന അറിയിച്ചു. ഇന്നലത്തെ ആക്രമണത്തിന് പിന്നാലെ വീണ്ടും ആക്രമണം ഉണ്ടാകുമെന്ന് നേരത്തെ ഹൂത്തികള്‍ ഭീഷണി മുഴക്കിയിരുന്നു. സൗദിയില്‍ വീണ്ടും ആക്രമണം നടത്തുമെന്നും വിമാനത്താവളങ്ങളും തുറമുഖങ്ങളും ആക്രമിക്കുമെന്നുമായിരുന്നു ഹൂത്തികളുടെ മുന്നറിയിപ്പ്. യാത്രക്കാർ, ജീവനക്കാർ ഉള്‍പ്പടെ ഉള്ളവർക്കാണ് മുന്നറിയിപ്പ് നല്‍കിയത്. രൂക്ഷമായ ആക്രമണം ഉണ്ടാകുമെന്നും ഹൂത്തികള്‍ വ്യക്തമാക്കിയിരുന്നു.
