തിരുവനന്തപുരം: അനധികൃതമായി സ്പാ നടത്തി ലൈംഗിക ചൂഷണം വ്യാപകമാകുന്നുവെന്ന പരാതിയുടെ പശ്ചാത്തലത്തില്‍ ഓപ്പറേഷൻ സ്പാ നടപ്പാക്കുകയാണെന്ന് ആഭ്യന്തര മന്ത്രി രമേശ് ചെന്നിത്തല.
മൂന്നുനാല് ദിവസമായി പൊലീസ് റെയ്ഡ് പുരോഗമിക്കുന്നുണ്ട്. യാതൊരു നിയമവും പാലിക്കാതെ സ്പാ നടത്തുന്നു. ഷോപ്പ് ആൻ്റ് എസ്റ്റാബ്ലിഷ്മെൻ്റ് ആക്‌ട് പ്രകാരമാണ് ഇത്തരം സ്ഥാപനങ്ങള്‍ നടത്തുന്നതെന്നും നിയമനിർമാണത്തെക്കുറിച്ച്‌ സർക്കാർ ആലോചിക്കുന്നുവെന്നും മന്ത്രി വ്യക്തമാക്കി. കോവളത്ത് ഇതരസംസ്ഥാനക്കാരിയായ പെണ്‍കുട്ടി സ്പായില്‍ പീഡിപ്പിക്കപ്പെട്ട സംഭവത്തിലാണ് പൊലീസ് പരിശോധന കടുപ്പിക്കുന്നത്.
പെണ്‍കുട്ടികളെയും കുടുംബങ്ങളെയും ചൂഷണം ചെയ്യാനും ആളുകളെ വഞ്ചിക്കാനും പ്രശ്നങ്ങള്‍ ഉണ്ടാക്കാനും പലയിടങ്ങളിലും സ്പാകള്‍ പ്രവർത്തിക്കുകയാണ്. നിരവധി പരാതികള്‍ ഉയർന്നുവരികയാണ്. ലൈസൻസ് ഇല്ലാതെ നടത്തുന്ന സ്പാകള്‍ക്കെതിരെ ശക്തമായ നിയമ നടപടി ഉണ്ടാകുമെന്നും യാതൊരു നിയമം പാലിക്കാതെ നടത്തുന്ന ഇത്തരം സ്ഥാപനങ്ങള്‍ പൂട്ടിക്കുമെന്നും ആഭ്യന്തര മന്ത്രി അറിയിച്ചു.
ആലപ്പുഴയില്‍ പോഷകാഹാരക്കുറവ് മൂലം കുഞ്ഞ് മരിച്ച സംഭവത്തിലും ആഭ്യന്തര മന്ത്രി പ്രതികരിച്ചു. സംഭവത്തില്‍ തഹസില്‍ദാരോട് അന്വേഷണം നടത്തി റിപ്പോർട്ട് സമർപ്പിക്കാൻ ആവശ്യപ്പെട്ടിട്ടുണ്ടെന്നും അവർക്ക് സഹായം ആവശ്യമെങ്കില്‍ ഇടപെടല്‍ നടത്തുമെന്നും രമേശ് ചെന്നിത്തല അറിയിച്ചു.
ഓപ്പറേഷൻ തൂഫാൻ കൂടുതല്‍ ശക്തമാക്കുകയാണെന്നും ചെന്നിത്തല അറിയിച്ചു. തൂഫാൻ കൂടുതല്‍ വ്യാപകമാക്കാനും കൂടുതല്‍ ജനങ്ങളിലേക്ക് എത്തിക്കാനുള്ള നടപടിയാണ് ആവിഷ്കരിച്ചിരിക്കുന്നത്. ജനങ്ങള്‍ എല്ലാ പ്രദേശങ്ങളിലും സഹകരിക്കുന്നുണ്ട്. ജനങ്ങളുടെ സഹകരണത്തിന്റെ ഭാഗമായി മയക്കുമരുന്ന് ഉപയോഗം കുറഞ്ഞുകൊണ്ടിരിക്കുന്നു. മയക്കുമരുന്ന് 30 ശതമാനത്തില്‍ ഏറെ കുറഞ്ഞു. അക്രമ സംഭവങ്ങളും കൊലപാതക പ്രശ്നങ്ങളും കുറയുന്നു. ക്രമസമാധാന പ്രശ്നങ്ങളും കുറയുന്നു. പദ്ധതി കൂടുതല്‍ ജനങ്ങളിലേക്ക് എത്തിക്കാൻ വേണ്ടിയുള്ള കർമ്മപദ്ധതി തയ്യാറാക്കിയിട്ടുണ്ട്. ഉയർന്ന പൊലീസ് ഉദ്യോഗസ്ഥരുമയി സംസാരിച്ച്‌ എല്ലാ മേഖലകളിലും ഇത് ശക്തിപ്പെടുത്താനും എല്ലാ ജില്ലകളിലും ഇത് മുന്നോട്ട് കൊണ്ടുപോകും തീരുമാനിക്കുമെന്നും മന്ത്രി അറിയിച്ചു.
മദ്യപിച്ച്‌ വാഹനമോടിച്ചാല്‍ ലൈസൻസ് റദ്ദാക്കുമെന്നും ചെന്നിത്തല മുന്നറിയിപ്പ് നല്‍കി. രണ്ടുദിവസംകൊണ്ട് പതിനായിരത്തിലധികം പേരെ മദ്യപിച്ചു വാഹനമോടിച്ചതിന് പൊലീസ് അറസ്റ്റ് ചെയ്തു. നെടുമ്പാശ്ശേരിയിലെ അപകടത്തിന് കാരണം മദ്യപിച്ച്‌ വാഹനമോടിച്ചതാണെന്നും യഥാർത്ഥത്തില്‍ നടന്നത് കൊലപാതകമാണെന്നും ആഭ്യന്തര മന്ത്രി രമേശ് ചെന്നിത്തല ചൂണ്ടിക്കാട്ടി.
