തിരുവനന്തപുരം: നെടുമ്പാശേരി മിനി കൂപ്പർ അപകടക്കേസിലെ പ്രതിയെ സംരക്ഷിക്കാനുള്ള ഏത് നീക്കവും അനുവദിക്കില്ലെന്ന് ആഭ്യന്തര മന്ത്രി രമേശ് ചെന്നിത്തല വ്യക്തമാക്കി.
പ്രതി സുഹൈലിനെ ബോസ്റ്റൽ സ്കൂളിലേക്ക് മാറ്റിയത് പൊലീസിന്റെ തീരുമാനപ്രകാരമല്ലെന്നും കോടതി ഉത്തരവിന്റെ അടിസ്ഥാനത്തിലാണെന്നും അദ്ദേഹം പറഞ്ഞു. തിരുവനന്തപുരത്ത് നടത്തിയ വാർത്താസമ്മേളനത്തിലായിരുന്നു മന്ത്രിയുടെ പ്രതികരണം.
നിയമപ്രകാരം 21 വയസ്സിന് താഴെയുള്ള കുറ്റാരോപിതരെ പാർപ്പിക്കുന്നതിനുള്ള സംവിധാനമാണ് ബോസ്റ്റൽ സ്കൂളുകളെന്ന് ചെന്നിത്തല വിശദീകരിച്ചു. അവിടേക്ക് മാറ്റിയെന്നതുകൊണ്ട് പ്രതി കേസിൽനിന്ന് ഒഴിവാകുന്നില്ലെന്നും നിയമം അനുശാസിക്കുന്ന ശിക്ഷ ഉറപ്പാക്കുന്നതിനുള്ള നടപടികൾ പൊലീസ് തുടരുമെന്നും അദ്ദേഹം കൂട്ടിച്ചേർത്തു.
സംഭവത്തിൽ മരിച്ചവരുടെ കുടുംബം ആശങ്കപ്പെടേണ്ട സാഹചര്യമില്ലെന്നും തെറ്റായ പ്രചാരണങ്ങളിലൂടെ അവരെ ആശയക്കുഴപ്പത്തിലാക്കാനുള്ള ശ്രമങ്ങൾ നടക്കുന്നതായും മന്ത്രി ആരോപിച്ചു. ആഭ്യന്തര മന്ത്രി എന്ന നിലയിൽ കേസിലെ പ്രതിക്കെതിരെ നിയമപരമായി ലഭിക്കാവുന്ന പരമാവധി ശിക്ഷ ഉറപ്പാക്കാൻ നടപടിയുണ്ടാകുമെന്ന് അദ്ദേഹം വ്യക്തമാക്കി. പ്രതി ആലപ്പുഴ ജില്ലക്കാരനാണെന്ന വിവരവും വാർത്താസമ്മേളനത്തിൽ പരാമർശിച്ചു.
ഏത് ജില്ലക്കാരനായാൽ എന്താണ്. രക്ഷിക്കാൻ ഒരു മന്ത്രിയും ഇടപെടില്ല. എന്റെ മണ്ഡലത്തിൽപ്പെട്ട ആളല്ല. അതെല്ലാം വെറുതെ പറയുന്നതാണ്. രക്തം പരിശോധിച്ച് സർട്ടിഫിക്കറ്റ് ലഭിച്ചാൽ മാത്രമെ മദ്യപിച്ച വിവരം രേഖപ്പെടുത്താൻ കഴിയൂ. നിയമപരമായി മാത്രമേ എല്ലാം ചെയ്യാൻ പറ്റൂ. മരിച്ചവരുടെ കുടുംബത്തിന്റെ ആശങ്കകൾ ഞങ്ങൾ പരിഗണിക്കുന്നു.
എന്റെ ജില്ലയിൽപ്പെട്ട ആളാണ് പ്രതി. പക്ഷേ പ്രതിയെ രക്ഷിക്കാൻ ഒരു നീക്കവും ഉണ്ടാകില്ല’- രമേശ് ചെന്നിത്തല വ്യക്തമാക്കി.നെടുമ്പാശേരി അപകടത്തിൽ കേസ് അട്ടിമറിക്കാൻ നീക്കമുണ്ടെന്നും പ്രതിയെ രക്ഷിക്കാൻ ശ്രമം നടക്കുന്നതായും മരിച്ച ഗോപികയുടെ കുടുംബം ആരോപിച്ചിരുന്നു. ഗുരുതരമായ കുറ്റം ചെയ്തിട്ടും പ്രതി സുഹൈൽ സജീവിനെ ജുവനൈൽ ഹോമിലേക്കയച്ചു. നീതി കിട്ടുമോയെന്ന് ആശങ്കയുണ്ടെന്നും കുടുംബം മാദ്ധ്യമങ്ങളോട് പറഞ്ഞിരുന്നു. ആഭ്യന്തര മന്ത്രിയുടെ മണ്ഡലത്തിലുള്ളയാളാണ് പ്രതി. രണ്ട് മന്ത്രിമാരുള്ള സ്ഥലമാണ്. ഏതെങ്കിലും തരത്തിൽ സ്വാധീനമുപയോഗിക്കുമെന്ന സംശയമുണ്ടെന്നും കുടുംബം ആശങ്ക ഉയർത്തിയിരുന്നു.
