തിരുവനന്തപുരം : അർജുൻ ആയങ്കിയുടെ അറസ്റ്റോട് കൂടി ആഭ്യന്തര വകുപ്പിന്റെ പ്രതിച്ഛായ തന്നെ ഉയർന്നിരിക്കുകയാണ്. ഇതോടെ യുഡിഎഫ് ഭരണം തുടങ്ങി ആദ്യ മാസങ്ങളില് തന്നെ സര്ക്കാരിന്റെ ഏറ്റവും വലിയ നേട്ടമായി പൊതുസമൂഹത്തിന് മുന്നില് ഉയര്ത്തിക്കാട്ടാന് കഴിഞ്ഞ പ്രവർത്തനങ്ങളിൽ ഭൂരിഭാഗവും ആഭ്യന്തര വകുപ്പിന്റേത് തന്നെയാണെന്ന കാര്യത്തിൽ തർക്കമില്ല. ഈ സാഹചര്യത്തിൽ 2026ലെ നിയമസഭാ തിരഞ്ഞെടുപ്പ് വിജയത്തിന് ശേഷം രമേശ് ചെന്നിത്തലയെ ഒതുക്കി നിര്ത്തി വിഡി സതീശനെ മുഖ്യമന്ത്രിയാക്കിയ കോണ്ഗ്രസ് ഹൈക്കമാന്ഡിന്റെ കണക്കുകൂട്ടലുകള് തെറ്റിയോ എന്നാണ് സംശയമുയരുന്നത്.
കേവലം ഒരു മന്ത്രിസ്ഥാനത്തിനപ്പുറം കാര്യക്ഷമമായ ഭരണമികവിലൂടെയും ആഭ്യന്തര വകുപ്പിലെ കടുപ്പമേറിയ അടിയന്തര നീക്കങ്ങളിലൂടെയും ഭരണത്തിലെ 'ഷാഡോ സിഎം' ആയി സ്വയം പ്രതിഷ്ഠിക്കാന് ചെന്നിത്തലയ്ക്ക് സാധിച്ചിരിക്കുന്നു. മുഖ്യമന്ത്രിസ്ഥാനം നഷ്ടപ്പെട്ടതിന്റെ നിരാശയിലോ രാഷ്ട്രീയ തളര്ച്ചയിലോ ഒതുങ്ങിക്കൂടാതെ, തനിക്ക് ലഭിച്ച ആഭ്യന്തര വകുപ്പ് ഏറ്റവും മികച്ച രീതിയില് കൈകാര്യം ചെയ്തുകൊണ്ട് ജനശ്രദ്ധ നേടുക എന്ന തന്ത്രപരമായ നിലപാടാണ് ചെന്നിത്തല പയറ്റിയത്.
കണ്ണൂരിനെ വട്ടംകറക്കിയ കുപ്രസിദ്ധ കുറ്റവാളി അര്ജുന് ആയങ്കിയുടെ അറസ്റ്റ്, മയക്കുമരുന്ന് മാഫിയകള്ക്കെതിരെ പ്രഖ്യാപിച്ച അതിശക്തമായ 'ഓപ്പറേഷന് തൂഫാന്', അക്രമികള്ക്കെതിരെയുള്ള 'ഓപ്പറേഷന് ഗ്രില്', കോണ്ഗ്രസ് കൗണ്സിലര് സുഗതന്, ടി.ജി. മോഹന്ദാസ് തുടങ്ങിയവര്ക്കെതിരെയുള്ള മുഖം നോക്കാതെയുള്ള നിഷ്പക്ഷ നിയമനടപടികള് എന്നിവയെല്ലാം ഇന്ന് തെരുവുകളിലും സോഷ്യല് മീഡിയയിലും സജീവ ചര്ച്ചയാണ്. ഇതോടെ ഭരണത്തിന്റെ ഔദ്യോഗിക മുഖമായി വിഡി സതീശന് തുടരുമ്പോഴും, ഈ സര്ക്കാരിന്റെ യഥാര്ത്ഥ ഭരണ നട്ടെല്ല് രമേശ് ചെന്നിത്തലയാണെന്ന പൊതുബോധം വന്തോതില് ശക്തമായിക്കഴിഞ്ഞു.
പാര്ട്ടി ഉന്നത സമിതികളിലും യുഡിഎഫ് മുന്നണി സംവിധാനത്തിലും രമേശ് ചെന്നിത്തലയ്ക്കുള്ള ആധിപത്യവും ജനകീയ സ്വാധീനവും മുന്പത്തേക്കാള് ഇരട്ടിയായി വര്ധിക്കാന് ഈ മാറ്റങ്ങള് വഴിയൊരുക്കി. മുസ്ലിം ലീഗ് ഉള്പ്പെടെയുള്ള പ്രമുഖ ഘടകകക്ഷി നേതാക്കളുമായി പതിറ്റാണ്ടുകളായി പുലര്ത്തുന്ന അടുത്ത വ്യക്തിബന്ധവും, ആഭ്യന്തര മന്ത്രി എന്ന നിലയില് ഏത് സങ്കീര്ണ്ണമായ പ്രശ്നവും നിമിഷങ്ങള്ക്കുള്ളില് പരിഹരിക്കാനുള്ള അദ്ദേഹത്തിന്റെ ഭരണശേഷിയും മുന്നണിയുടെ ഒഴിവാക്കാനാവാത്ത അമരക്കാരനായി അദ്ദേഹത്തെ വീണ്ടും പ്രതിഷ്ഠിക്കുകയായിരുന്നു.
ആഭ്യന്തര വകുപ്പിന്റെ തലപ്പത്ത് ഒരു പരിചയസമ്പന്നന് ഇരിക്കുന്നതിന്റെ ഗുണം ഉദ്യോഗസ്ഥ തലത്തിലും പ്രകടമാണ്. ഐപിഎസ് തലപ്പത്തെ രാഷ്ട്രീയ അനാവശ്യ ഇടപെടലുകള് പൂര്ണ്ണമായും അവസാനിപ്പിച്ച്, അനാവശ്യ വെടിയൊച്ചകളും ബഹളങ്ങളുമില്ലാതെ കുറ്റവാളികളെ കൈകാര്യം ചെയ്യാന് പൊലീസിന് പൂര്ണ്ണ സ്വാതന്ത്ര്യം നല്കിയതാണ് ഇത്രയധികം ആസൂത്രിത അറസ്റ്റുകള് സാധ്യമാക്കിയത്. ഇത് ആഭ്യന്തര മന്ത്രാലയത്തിന്റെ വിശ്വാസ്യതയും ഗ്രാഫും പതിന്മടങ്ങ് വര്ധിപ്പിച്ചു.
കേവലം രാഷ്ട്രീയ പദവി മോഹങ്ങള്ക്കപ്പുറം, പക്വതയുള്ള പ്രഗത്ഭനായ ഭരണാധികാരി എന്ന നിലയിലേക്ക് രമേശ് ചെന്നിത്തല എന്ന രാഷ്ട്രീയ ഭീമന് വീണ്ടും പുനര്ജനിക്കുകയായിരുന്നു.അധികാര സമവാക്യങ്ങളില് വിചാരിച്ചത്ര പിന്തുണ ലഭിക്കാതെ കൈവിട്ടുപോയ ഉയര്ന്ന പദവിയെ ഓര്ത്ത് നിരാശപ്പെടാതെ, കൈവശമുള്ള വകുപ്പില് വിപ്ലവകരമായ മാറ്റങ്ങള് വരുത്തി അധികാരം സ്വന്തം വ്യക്തിപ്രഭാവത്തിലേക്ക് തിരിച്ചുപിടിക്കുകയാണ് ചെന്നിത്തല ഇപ്പോൾ. ചെന്നിത്തലയുടെ ഈ ജനപ്രിയ നീക്കങ്ങള് സര്ക്കാരിന്റെ നിലനില്പ്പിന് തന്നെ വലിയ ഊര്ജ്ജമാണ് പകരുന്നത്.
