കോട്ടയം: ഉരുൾപൊട്ടലും മണ്ണൊലിപ്പും പോലുള്ള പ്രകൃതിദുരന്തങ്ങൾ തടയുന്നതിന് രാമച്ചം കൃഷി സഹായകമാകുമെന്ന് റബർ ബോർഡ് ചെയർമാൻ എൻ. ഹരി.
ഇടവിളയായി രാമച്ചം കൃഷി ചെയ്യുന്നത് പ്രത്യേകിച്ച് ചരിവുള്ള പ്രദേശങ്ങളിൽ മണ്ണൊലിപ്പ് ചെറുക്കുന്നതിന് പ്രയോജനകരമാകുമെന്നും ഇതിന്റെ ശാസ്ത്രീയ വശങ്ങളിൽ കൂടുതൽ പഠനം ആവശ്യമാണെന്നും അദ്ദേഹം പറഞ്ഞു.
ഔഷധഗുണവും പരിസ്ഥിതി സംരക്ഷണവും ഒരുമിക്കുന്ന അപൂർവ സസ്യമാണ് രാമച്ചം. ഇടതൂർന്ന വേരുകൾ മണ്ണൊലിപ്പ് തടയുന്നതിനും ജലസംരക്ഷണത്തിനും സഹായിക്കുന്നുവെന്നതാണ് പ്രത്യേകത എന്ന് അദ്ദേഹം പറഞ്ഞു
ഇന്ത്യൻ വെറ്റിവർ ഫൗണ്ടേഷന്റെ നാലാമത് ദേശീയ സമ്മേളനം കോട്ടയത്ത് റബർ റിസർച്ച് ഓഫ് ഇന്ത്യ (ആർ ആർ ഐ ഐ ) ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം.
നാളെയുടെ സുസ്ഥിരതയ്ക്കായി കേരളത്തിൽ വേരു പടർത്തുന്ന രാമച്ചം എന്ന വിഷയത്തിൽ റബർ ബോർഡിന്റെ സഹകരണത്തോടെയായിരുന്നു സമ്മേളനം.
റബർ ബോർഡ് എക്സിക്യൂട്ടീവ് ഡയറക്ടർ എം. വസന്തഗേശൻ ഇന്ത്യ വെറ്റിവർ നെറ്റ്വർക്ക് മുൻ പ്രസിഡന്റ് പി. ഹരിദാസ് , റബർ റിസർച്ച് ഇൻസ്റ്റിറ്റ്യൂട്ട് ഓഫ് ഇന്ത്യ ഡയറക്ടർ ഓഫ് റിസർച്ച് ഡോ. ദേബബ്രത റേ, അഗ്രോണമി ഡിവിഷൻ ശാസ്ത്രജ്ഞ ഡോ. ഫേബ ജോസഫ്
എന്നിവർ പങ്കെടുത്തു.ഇന്ത്യ വെറ്റിവർ ഫൗണ്ടേഷൻ വൈസ് പ്രസിഡന്റ് പി.എൻ. സുബ്രഹ്മണ്യൻ അധ്യക്ഷനായി.
രാമച്ചം അധിഷ്ഠിത പുനരുജ്ജീവന കൃഷി, കാലാവസ്ഥാ പ്രതിരോധം, കാർബൺ സംഭരണം, മണ്ണ് പുനരുദ്ധാരണം, ജലസംരക്ഷണം, മണ്ണിടിച്ചിൽ പ്രതിരോധ ബയോ എൻജിനീയറിങ് തുടങ്ങിയ വിഷയങ്ങളിൽ പ്രബന്ധങ്ങൾ അവതരിപ്പിച്ചു.
രാജ്യത്തും വിദേശത്തുമുള്ള കാർഷിക, പരിസ്ഥിതി, ഗവേഷണ വിദഗ്ധർ നേരിട്ടും ഓൺലൈനായും പങ്കെടുത്തു.






