കോഴിക്കോട്: കോഴിക്കോട് ആനക്കാംപൊയില് മുത്തപ്പൻ പുഴയിലെ താല്ക്കാലിക ചപ്പാത്ത് മലവെള്ളപ്പാച്ചിലില് വീണ്ടും ഒലിച്ചുപോയി. തുരങ്കപാത നിർമാണം നടക്കുന്ന സ്ഥലത്തേക്ക് അടക്കം എത്തിച്ചേരാനുള്ള ഏക വഴിയാണ് ഒലിച്ചുപോയത്.
മുത്തപ്പൻ പുഴ അങ്ങാടിയിലേക്കും സ്കൂളിലേക്കും പോകാനുള്ള നിരവധി ആളുകള് ചപ്പാത്ത് ഒലിച്ചുപോയതോടെ മറുകരയില് കുടുങ്ങി. പുഴയിലെ നീരൊഴുക്ക് കുറഞ്ഞെങ്കിലും ചപ്പാത്ത് പുനസ്ഥാപിക്കാൻ കഴിഞ്ഞിട്ടില്ല.
തുരങ്കപാത നിർമാണ സ്ഥലത്തേക്ക് സാധനങ്ങള് എത്തിക്കാനായി പഴയപാലം പൊളിച്ച് പുതിയ പാലം നിർമിക്കുന്ന ജോലികള് അനന്തമായി നീളുകയാണ്. യാത്രാക്ലേശം ഒഴിവാക്കാനായാണ് താല്ക്കാലികമായി ചപ്പാത്ത് നിർമിച്ചത്. മഴക്കാലം തുടങ്ങിയതിന് ശേഷം മൂന്നാം തവണയാണ് താല്ക്കാലിക ചപ്പാത്ത് ഒലിച്ചു പോകുന്നത്.
