കോട്ടയം: ഏറ്റുമാനൂർ - പാറോലിക്കൽ റെയിൽവേ ഗേറ്റിന്റെ അപ്രോച്ച് റോഡ് മുതൽ ഗതാഗതയോഗ്യമല്ലാത്ത വിധം തകർന്ന് തരിപ്പണമായിരിക്കുന്നു.
പരാതികൾ ഉയർന്നപ്പോൾ മൂന്ന് മാസം മുമ്പ് ലെവൽ ക്രോസ്സ് അടച്ചിട്ട് മെറ്റിൽ നിരത്തിയ ലെവൽ ക്രോസ്സാണ് ഇപ്പോൾ പൂർണ്ണമായും തകർന്നത്.
വാഹനങ്ങൾ കടന്നുപോകുമ്പോൾ മെറ്റിൽ നീങ്ങിമാറി വീണ്ടും കോൺക്രീറ്റ് ബ്ലോക്കുകളുമായുള്ള വിടവ് തെളിയുകയായിരുന്നു.
വീണ്ടും മെറ്റിൽ നിരത്തുന്നത് ഇവിടെ പ്രായോഗികമല്ല.
അതിരമ്പുഴയെയും സമീപ പ്രദേശങ്ങളെയും എം സി റോഡുമായി ബന്ധിപ്പിക്കുന്ന പ്രധാനപാതയാണ്.
പ്രസ്തുത പാതയിലാണ് നിരവധി സ്വകാര്യ ആശുപത്രികൾ പ്രവർത്തിക്കുന്നത്.
ഹോസ്പിറ്റലുകളെ ആശ്രയിക്കുന്ന ജീവനക്കാരും മറ്റു ജോലിയാവശ്യങ്ങൾക്കായി യാത്ര ചെയ്യുന്നവരുമായി നിരവധിയാളുകളാണ് കുണ്ടും കുഴിയും ദുരിതവും പേറി പ്രതിദിനം കടന്നുപോകുന്നത്.
നിരവധി രോഗികൾ ഈ ലെവൽ ക്രോസ്സിൽ മണിക്കൂറുകളോളം കുടുങ്ങാറുണ്ട്.
റെയിൽവേയുടെ ഓവർ ബ്രിഡ്ജ് ഇവിടെ വളരെ അനിവാര്യമാണ്. അതിനായി ജനപ്രതിനിധികളുടെ ഇടപെടൽ ഉണ്ടാകാത്തത് ഖേദകരമാണ്.
റെയിൽവേ മേൽപ്പാലം അപ്രാപ്യമാണെങ്കിൽ കുറഞ്ഞപക്ഷം ഗതാഗതയോഗ്യമാക്കാൻ എങ്കിലും ജനപ്രതിനിധികൾ ശബ്ദിക്കണം അതിരമ്പുഴ സെന്റ് മേരിസ്
ഫോറാന പള്ളിയിലേയ്ക്കും കൈതമല മുഹിയുദ്ധീൻ പള്ളിയിലേയ്ക്കും എളുപ്പത്തിൽ
പ്രവേശിക്കാൻ ഈ പാത പ്രയോജനപ്പെടുത്തുന്നവർക്ക് കനത്ത പ്രഹരമാണ് ലെവൽ ക്രോസ്സ് സമ്മാനിക്കുന്നത്.
ലെവൽ ക്രോസ്സുകളിൽ മെറ്റിൽ നിരത്തുന്നത് പഴയ സമ്പ്രദായമാണ്..
പാളവുമായി സമാസമം ഇന്റർലോക്കുകൾ കൊണ്ട് ബന്ധിപ്പിച്ച് റബ്ബർ സ്ട്രാപ്പ് ഉപയോഗിച്ച് വിടവുകളില്ലാത്ത വിധം
ആധുനികമായി റെയിൽവേ പലയിടത്തും ലെവൽ ക്രോസ്സുകൾ പൂർത്തീകരിച്ചിട്ടുണ്ട്.
ലെവൽ ക്രോസ്സുകളുടെ അറ്റക്കുറ്റ പണികൾ റെയിൽവേയുടെ ഉത്തരവാദിത്തമാണ്.
റെയിൽവേ പ്രത്യേക ഫണ്ട് വകയിരുത്തിയിട്ടുണ്ട്. ജനപ്രതിനിധികളുടെ ഇടപെടൽ മാത്രമാണ് ഇവിടെ ആവശ്യമായി വരുന്നത്.
റോഡും റെയിൽവേ പാളവും ഒരേ നിരപ്പിൽ മുറിച്ചുകടക്കുന്ന ലെവൽ ക്രോസ്സ് ഇപ്പോൾ സകല ലെവലും തെറ്റി വേറൊരു ലെവലായി മാറിയിരിക്കുകയാണ്.
ഇരുചക്രവാഹനങ്ങളിലൂടെ ഇതിലെ കടന്നുപോകുന്നത് വലിയ പരീക്ഷണമാണ്.






