കോട്ടയം : സംസ്ഥാനത്തെ ജില്ലാ സ്പോര്ട്സ് കൗണ്സില് ഓഫിസുകളില് വിജിലന്സിന്റെ മിന്നല് പരിശോധന. കായിക ഉപകരണങ്ങള് വാങ്ങിയതിലും വിദ്യാര്ഥികള്ക്ക് സ്പോര്ട്സ് കിറ്റുകള് വിതരണം ചെയ്തതിലും വ്യാപക ക്രമക്കേടുകള് നടന്നെന്ന പരാതിയുടെ അടിസ്ഥാനത്തിലാണ് നടപടി. ഓപ്പറേഷൻ കളിക്കളം എന്ന പേരിലാണ് പരിശോധന.
കോട്ടയം ഇന്ഡോര് സ്റ്റേഡിയത്തിലെ ഓഫിസിലടക്കം സംസ്ഥാനത്തെ 14 ജില്ലകളിലും ഒരേസമയം പരിശോധന പുരോഗമിക്കുകയാണ്. സംസ്ഥാന വ്യാപകമായി വിജിലന്സ് നടത്തുന്ന പരിശോധനയുടെ ഭാഗമായാണ് കോട്ടയത്തും പരിശോധന നടത്തുന്നതെന്ന് ഉദ്യോഗസ്ഥർ അറിയിച്ചു.
കൗണ്സില് വാങ്ങി നല്കിയ കിറ്റുകളുടെ കണക്കുകളില് വലിയ പൊരുത്തക്കേടുകളാണ് നിലനില്ക്കുന്നത്. ലക്ഷക്കണക്കിന് രൂപയുടെ ഉപകരണങ്ങള് വാങ്ങി ഗോഡൗണുകളില് ഉപയോഗിക്കാതെ നശിക്കുന്നതായും, അര്ഹരായ കായിക താരങ്ങള്ക്ക് ഇവ ലഭിക്കുന്നില്ലെന്നും ആക്ഷേപമുണ്ട്. ട്രാക്ക് സ്യൂട്ടുകള്, ജോഗിങ് ഷൂസുകള്, പരിശീലകര്ക്കുള്ള യൂണിഫോം തുടങ്ങിയവ വിതരണം ചെയ്യാതെ കെട്ടിക്കിടക്കുന്നതായി മുന്പ് നടന്ന ഓഡിറ്റുകളിലും കണ്ടെത്തിയിരുന്നു. കണക്കുകളിലും മറ്റ് രേഖകളിലും തിരിമറി നടന്നിട്ടുണ്ടോ എന്ന് പരിശോധിച്ച ശേഷം ഉദ്യോഗസ്ഥര് തുടര്നടപടികള് സ്വീകരിക്കും. വ്യാജ ബില്ലുകള് നല്കി പണം അപഹരിച്ചിട്ടുണ്ടോ എന്ന കാര്യവും അന്വേഷണ പരിധിയിലുണ്ട്.
കഴിഞ്ഞ 10 വര്ഷത്തിനിടെ വിവിധ പദ്ധതികളുടെ ഭാഗമായി കായിക ഉപകരണങ്ങള് വാങ്ങിയതിലെ കണക്കുകള് വിജിലന്സ് സംഘം വിശദമായി പരിശോധിക്കുന്നുണ്ട്. പുതിയ കായിക വകുപ്പ് മന്ത്രി ചുമതലയേറ്റതിന് പിന്നാലെ സ്പോര്ട്സ് കൗണ്സിലിലെ ഫയലുകള് പരിശോധിക്കുകയും ക്രമക്കേടുകള് കണ്ടെത്തുകയും ചെയ്തിരുന്നു. തുടര്ന്ന് മന്ത്രി തന്നെ രണ്ട് വിജിലന്സ് അന്വേഷണങ്ങള്ക്ക് നിര്ദേശം നല്കി. ഇതിന്റെ അടിസ്ഥാനത്തിലാണ് സംസ്ഥാനത്തെ എല്ലാ സ്പോര്ട്സ് കൗണ്സില് ഓഫിസുകളിലേക്കും കായിക ഹോസ്റ്റലുകളിലേക്കും പരിശോധന വ്യാപിപ്പിച്ചത്.
ജില്ലകളില് പ്രത്യേക വിജിലന്സ് സംഘങ്ങള് രൂപീകരിച്ചാണ് മിന്നല് പരിശോധന നടത്തുന്നത്. ഏതെല്ലാം തരത്തിലുള്ള ക്രമക്കേടുകളാണ് നടന്നതെന്ന് പരിശോധന പൂര്ത്തിയായ ശേഷം മാത്രമേ വ്യക്തമാകൂ എന്ന് വിജിലന്സ് ഉദ്യോഗസ്ഥര് അറിയിച്ചു. കുറ്റക്കാര്ക്കെതിരെ കര്ശന നടപടിയുണ്ടാകുമെന്നാണ് സര്ക്കാര് വൃത്തങ്ങള് നല്കുന്ന സൂചന.
