കോട്ടയം: സമഗ്ര ശിക്ഷ കേരള (SSK) കോട്ടയം ഈസ്റ്റ് പ്രോജക്ട് കോ-ഓർഡിനേറ്റർ സജൻ എസ്. നായർക്ക് വിദ്യാഭ്യാസ ഭരണരംഗത്തെ നൂതന പ്രവർത്തനങ്ങൾക്കും മികച്ച മാതൃകകൾക്കുമുള്ള ദേശീയ പുരസ്കാരം. ന്യൂഡൽഹിയിലെ നാഷണൽ ഇൻസ്റ്റിറ്റ്യൂട്ട് ഓഫ് എജ്യുക്കേഷണൽ പ്ലാനിങ് ആൻഡ് അഡ്മിനിസ്ട്രേഷൻ (NIEPA) ഏർപ്പെടുത്തിയ നാഷണൽ അവാർഡ് ഫോർ ഇന്നോവഷൻസ് ആൻഡ് ഗുഡ് പ്രാക്ടിസസ് ഇൻ എഡ്യൂക്കേഷണൽ അഡ്മിനിസ്ട്രേഷൻ പുരസ്കാരമാണ് ലഭിച്ചത്. വിദ്യാഭ്യാസ മേഖലയിൽ നൂതന ആശയങ്ങളും മികച്ച പ്രവർത്തനരീതികളും നടപ്പാക്കി വിദ്യാഭ്യാസ പിന്തുണാ സംവിധാനങ്ങൾ ശക്തിപ്പെടുത്തുന്ന ഭരണാധികാരികളെയാണ് ദേശീയ പുരസ്കാരത്തിനായി പരിഗണിക്കുന്നത്.
കോട്ടയം ഈസ്റ്റ് ബ്ലോക്ക് തലത്തിൽ സമഗ്ര ശിക്ഷ കേരളയുടെ നേതൃത്വത്തിൽ നടപ്പാക്കിയ പ്രത്യേക പരിഗണന ആവശ്യമായ കുട്ടികൾക്കായുള്ള ഓട്ടിസം പാർക്ക് ഉൾപ്പെടെയുള്ള നൂതന പ്രവർത്തനങ്ങളാണ് സജൻ എസ്. നായരുടെ പുരസ്കാരത്തിന് പരിഗണിച്ചത്. ഓട്ടിസം ഉൾപ്പെടെയുള്ള പ്രത്യേക ആവശ്യങ്ങളുള്ള കുട്ടികൾക്ക് സൗഹൃദപരവും സുരക്ഷിതവുമായ അന്തരീക്ഷം ഒരുക്കുന്നതിനും വിവിധ തെറാപ്പി, വികസന പിന്തുണാ സേവനങ്ങൾ ലഭ്യമാക്കുന്നതിനുമാണ് ഓട്ടിസം പാർക്ക് ആരംഭിച്ചത്. കുട്ടികൾക്ക് പഠിക്കാനും സാമൂഹികമായി ഇടപെടാനും വിവിധ പ്രവർത്തനങ്ങളിൽ പങ്കെടുക്കാനും കൂടുതൽ അനുയോജ്യമായ സാഹചര്യം ഒരുക്കുന്നതിലും പദ്ധതി ശ്രദ്ധ കേന്ദ്രീകരിച്ചു.
കുട്ടികളുടെ മാതാപിതാക്കളുടെയും കുടുംബങ്ങളുടെയും ക്ഷേമത്തിനും പദ്ധതിയിൽ പ്രത്യേക പ്രാധാന്യം നൽകി. സ്വയംതൊഴിൽ പരിശീലനം, കൗൺസലിങ്, ബോധവൽക്കരണ പരിപാടികൾ എന്നിവ സംഘടിപ്പിച്ചു. കുട്ടികളുടെ ആവശ്യങ്ങൾ മനസ്സിലാക്കുന്നതിനും കുടുംബങ്ങൾക്ക് ആവശ്യമായ പിന്തുണ നൽകുന്നതിനും ഈ പ്രവർത്തനങ്ങൾ സഹായകമായി. ബ്ലോക്ക് റിസോഴ്സ് സെന്ററുകൾ (BRC) മുഖേന ലഭിക്കുന്ന സൗജന്യ സേവനങ്ങളെക്കുറിച്ച് രക്ഷിതാക്കളെയും പൊതുജനങ്ങളെയും ബോധവൽക്കരിക്കുന്നതിനായി വിവിധ പരിപാടികളും സംഘടിപ്പിച്ചു. പ്രത്യേക പരിഗണന ആവശ്യമായ കുട്ടികളുടെ ക്ഷേമ പ്രവർത്തനങ്ങളിൽ പൊതുജന പങ്കാളിത്തം ഉറപ്പാക്കുന്നതിനും പദ്ധതിയിലൂടെ ശ്രമം നടത്തി.
വിദ്യാഭ്യാസ അവസരങ്ങൾ മെച്ചപ്പെടുത്തുന്നതിനൊപ്പം പ്രത്യേക പരിഗണന ആവശ്യമായ കുട്ടികളുടെ സമഗ്ര വികസനം, സാമൂഹിക ഉൾച്ചേർക്കൽ, ക്ഷേമം എന്നിവ ഉറപ്പാക്കുന്നതിനാണ് പദ്ധതികൾ ലക്ഷ്യമിട്ടത്. വിദ്യാഭ്യാസ പിന്തുണ, തെറാപ്പി സേവനങ്ങൾ, കുടുംബപിന്തുണ, സാമൂഹിക പങ്കാളിത്തം എന്നിവ ഏകോപിപ്പിച്ചുകൊണ്ടുള്ള പ്രവർത്തനരീതിയാണ് പദ്ധതിയുടെ പ്രത്യേകത. 19 വർഷത്തെ അധ്യാപന പരിചയമുള്ള സജൻ എസ്. നായർ, അധ്യാപക സേവനത്തിനൊപ്പം ഭരണനിർവഹണ മേഖലയിലും ശ്രദ്ധേയമായ പ്രവർത്തനങ്ങൾ നടത്തിയിട്ടുണ്ട്. നാട്ടകം ഗവ. VHSS, പാമ്പാടി ഗവ. VHSS, മണീട് ഗവ. VHSS എന്നീ സ്ഥാപനങ്ങളിൽ പ്രിൻസിപ്പലായി സേവനമനുഷ്ഠിച്ചിട്ടുണ്ട്. സ്കൂൾ ഭരണനിർവഹണം, അക്കാദമിക നേതൃത്വം, വിദ്യാർത്ഥി ക്ഷേമം, സാമൂഹിക ഉൾച്ചേർക്കൽ തുടങ്ങിയ മേഖലകളിലെ അദ്ദേഹത്തിന്റെ പ്രവർത്തനപരിചയവും ദേശീയ അംഗീകാരത്തിന് കരുത്തായി.
സജൻ എസ്. നായർക്ക് ലഭിച്ച ദേശീയ അംഗീകാരം കോട്ടയം ഈസ്റ്റിനും സമഗ്ര ശിക്ഷ കേരളയ്ക്കും അഭിമാനകരമായ നേട്ടമാണ്. വിദ്യാഭ്യാസ ഭരണരംഗത്ത് കുട്ടികേന്ദ്രിതവും നൂതനവുമായ ഇടപെടലുകളുടെ പ്രാധാന്യം ഉയർത്തിക്കാട്ടുന്നതാണ് പുരസ്കാരം.
നിലവിൽ മലപ്പുറം ചേളാരി ഗവ വി എച്ച് എസ് സ്കൂളിൽ അദ്ധ്യാപകനായ ഇദ്ദേഹം കോട്ടയം പനച്ചിക്കാട് പഞ്ചായത്തിലെ പാത്താമുട്ടം സ്വദേശിയാണ് .കാരാപ്പുഴ ഗവൺമെൻറ് ഹയർ സെക്കൻഡറി സ്കൂളിലെ സീമ എസ് നായരാണ് ഭാര്യ .മക്കൾ സിദ്ധാർത്ഥ് എസ്സ് . പാർത്ഥിവ് എസ്.
ഫോൺ : സജൻ എസ് നായർ 8590090703
