തിരുവനന്തപുരം: ആസൂത്രണ ബോർഡ് ചീഫ് തസ്തികയിലേക്കുള്ള പരീക്ഷയുടെ 58 മാർക്കിന്റെ ചോദ്യങ്ങൾ പുനർമൂല്യനിർണയം നടത്തിയ ശേഷം പബ്ലിക് സർവീസ് കമ്മീഷൻ പുതിയ ചുരുക്കപ്പട്ടിക പ്രസിദ്ധീകരിച്ചു. കഴിഞ്ഞ ദിവസമാണ് പിഎസ്സി പുനർമൂല്യനിർണയം നടത്തിയത്.
മുൻപ് തയ്യാറാക്കിയ ചുരുക്കപ്പട്ടികയിൽ നിന്ന് ഒരാളുടെ വ്യത്യാസം മാത്രമാണ് പുതിയ പട്ടികയിൽ വന്നിട്ടുള്ളത്.
പ്രസിദ്ധീകരിച്ചിരിക്കുന്ന ചുരുക്കപ്പട്ടികയിൽ ഉദ്യോഗാർഥികളുടെ രജിസ്റ്റർ നമ്പറുകൾ മാത്രമാണുള്ളത്. അതിനാൽ ആരൊക്കെയാണ് മാറിയതെന്ന കൃത്യമായ വിവരങ്ങൾ ലഭ്യമായിട്ടില്ല.
ഉദ്യോഗാർഥികൾക്ക് മാത്രമാണ് തങ്ങളുടെ രജിസ്റ്റർ നമ്പറുകൾ പരിശോധിക്കാൻ സാധിക്കുക. അതിനാൽ മുൻപത്തെ റാങ്ക് ലിസ്റ്റിൽ ഒന്നാം സ്ഥാനത്തുണ്ടായിരുന്ന അരുൺ ജെ. പ്രതാപ് തന്നെയാണോ ഇപ്പോഴും ഒന്നാമതുള്ളതെന്ന കാര്യത്തിൽ വ്യക്തത വന്നിട്ടില്ല.
ആകെ 100 മാർക്കിന്റെ പരീക്ഷയിൽ 42 മാർക്കിന് മാത്രം ആദ്യഘട്ടത്തിൽ മൂല്യനിർണയം നടത്തുകയും 58 മാർക്ക് ഒഴിവാക്കുകയുമായിരുന്നു.
തുടർന്നാണ് ഇപ്പോൾ പുനർമൂല്യനിർണയം പൂർത്തിയാക്കിയത്. വലിയ മാറ്റങ്ങൾ പ്രതീക്ഷിച്ചിരുന്നെങ്കിലും ഒരാളുടെ സ്ഥാനത്തിൽ മാത്രമാണ് വ്യത്യാസമുണ്ടായിരിക്കുന്നത്.
ഈ ചുരുക്കപ്പട്ടികയുടെ അടിസ്ഥാനത്തിലായിരിക്കും ഇനി ഇന്റർവ്യൂ നടത്തുക. ഇന്റർവ്യൂ മാർക്ക് കൂടി ഉൾപ്പെടുത്തി അന്തിമ റാങ്ക് ലിസ്റ്റ് വരുമ്പോൾ മാത്രമാണ് പരീക്ഷയിൽ എന്തെങ്കിലും ക്രമക്കേടുകൾ നടന്നിട്ടുണ്ടോ എന്ന് വ്യക്തമാകൂ.
