പാലക്കാട്: കെ.എസ്.ആർ.ടി.സിയുടെ പ്രിയദർശിനി യാത്ര പാലക്കാട് ജില്ലയില്‍ വൻ വിജയം. പദ്ധതി ആരംഭിച്ച്‌ 142 ദിവസം പിന്നിടുമ്പോള്‍ ജില്ലയില്‍ ആകെ 62,08,613 സീറോ ടിക്കറ്റുകള്‍ വിതരണം ചെയ്തു. നവംബർ രണ്ട് വരെയുള്ള കണക്കുകളാണിത്.
വടക്കഞ്ചേരി, മണ്ണാർക്കാട്, പാലക്കാട്, ചിറ്റൂർ എന്നിങ്ങനെ ജില്ലയിലെ നാല് യൂണിറ്റുകള്‍ കേന്ദ്രീകരിച്ചാണ് പദ്ധതിയുടെ പ്രവർത്തനം.
പാലക്കാട് യൂണിറ്റിലാണ് ഏറ്റവും കൂടുതല്‍ സീറോ ടിക്കറ്റുകള്‍-26,32,971 പേർ. ചിറ്റൂരില്‍ 10,53,905 പേരും വടക്കഞ്ചേരിയില്‍ 13,29,593 പേരും മണ്ണാർക്കാടില്‍ 11,92,144 പേരുമാണ് സീറോ ടിക്കറ്റുകള്‍ ഉപയോഗിച്ചത്.
സീറോ ടിക്കറ്റ് സംവിധാനം വഴി ഇതുവരെ 18,96,85,714 രൂപയാണ് ആകെ വരുമാനമായി ലഭിച്ചത്. യൂണിറ്റ് തിരിച്ച്‌ കണക്കാക്കുമ്പോള്‍ പാലക്കാട് യൂണിറ്റില്‍ നിന്ന് 9,02,90,037 രൂപയും ചിറ്റൂരില്‍ നിന്ന് 3,22,89,296 രൂപയും വടക്കഞ്ചേരിയില്‍ നിന്ന് 3,78,98,740 രൂപയും മണ്ണാർക്കാടില്‍ നിന്ന് 2,92,07,641 രൂപയും വരുമാനം നേടിയെന്ന് അധികൃതർ അറിയിച്ചു.
