തിരുവനന്തപുരം: സ്വകാര്യ ആശുപത്രികളിലെ കൊള്ള നിയന്ത്രിക്കാൻ സുപ്രധാന നീക്കവുമായി ആരോഗ്യവകുപ്പ്. ചികിത്സചെലവ് നിയന്ത്രിക്കാനും നിലവാരം മെച്ചപ്പെടുത്താനും നിയമസഭയില്‍ ബില്‍ കൊണ്ടുവരും.
മുറിവാടകയ്ക്കും മരുന്ന് വിലയ്ക്കും ഡോക്ടറെ കാണാനുള്ള ഫീസിനും പിടിവീഴും. ചർച്ചയില്ലാതെ നിയന്ത്രണം നടപ്പാക്കാനികില്ലെന്നാണ് സ്വകാര്യ ആശുപത്രി മാനേജ്മെന്റുകളുടെ പ്രതികരണം. മുട്ട് മാറ്റിവയ്ക്കല്‍ ശസ്ത്രക്രിയക്ക് നാല് മുതല്‍ ആറ് ലക്ഷം വരെ. ബൈപ്പാസ് ശസ്ത്രക്രിയക്ക് നാല് ലക്ഷം മുതല്‍. രണ്ട് പേർ കിടക്കുന്ന മുറിക്ക് പോലും അയ്യായിരത്തിലധികം ദിവസ വാടക. ഭക്ഷണം, മരുന്ന്, ഡോക്ടറെ കാണുന്നത്, ഫിസിയോ അങ്ങനെ എല്ലാത്തിനും കൊള്ള നിരക്ക്.
പരാതികള്‍ കൊണ്ട് മടുത്തെന്നാണ് ആരോഗ്യവകുപ്പ് പറയുന്നത്. പ്രിൻസിപ്പല്‍ സെക്രട്ടറി അധ്യക്ഷത വഹിക്കുന്ന കമ്മിറ്റിയില്‍ ആരോഗ്യവകുപ്പ് ഡയറക്ടറും മെഡിക്കല്‍ വിദ്യാഭ്യാസ ഡയറക്ടറും കെഎംഎസ്‍സിഎല്‍ എംഡിയും മറ്റ് അംഗങ്ങള്‍. വാണിജ്യവിലയേക്കാള്‍ കുറവില്‍ സ്വകാര്യ ആശുപത്രികളില്‍ രോഗികള്‍ക്ക് മരുന്ന് നല്‍കാനാകുമോ, രോഗനിർണയ ചെലവ് കുറയ്ക്കാനാകുമോ, മുറി വാടക കുറയ്ക്കാനാകുമോ തുടങ്ങിയ കാര്യങ്ങള്‍ സമിതി പരിശോധിക്കണം.
സർക്കാർ ഇൻഷുറൻസ് സ്വകാര്യ ആശുപത്രികളില്‍ ലഭ്യമാകാനുള്ള സാധ്യത പരിശോധിക്കണം. കെഎംഎസ്‍എസിഎല്‍ വഴി സ്വകാര്യ ആശുപത്രികള്‍ക്ക് മരുന്ന് വിതരണം ചെയ്യാനാകുമോ എന്നും ചികിത്സാ നിലവാരം ഉയർത്താനാകുമോ എന്നും സമിതി വിലയിരുത്തണം. ശുപാർശകളോട് കൂടി റിപ്പോർട്ട് സമർപ്പിക്കാനാണ് നിർദ്ദേശം. റിപ്പോർട്ടിന്മേല്‍ ബില്‍ അവതരിപ്പിക്കാനാണ് സർക്കാർ നീക്കം. പ്രായോഗികവശങ്ങള്‍ ചർച്ച ചെയ്യാതെ നിയന്ത്രണം സാധ്യമല്ലെന്ന് സ്വകാര്യ ആശുപത്രി മാനേജ്മെന്റുകളുടെ അസോസിയേഷൻ.
ബഹുരാഷ്ട്ര കുത്തക മാനേജ്മെന്റുകള്‍ കൂടുതല്‍ ആശുപത്രികള്‍ ഏറ്റെടുത്തതോടെ സ്വകാര്യ മേഖലയിലെ ചികിത്സാ ചെലവ് വൻ തോതില്‍ ഉയർന്നിട്ടുണ്ട്. ബ്ലാക്ക്സ്റ്റോണിന്റെ മാത്രം നിയന്ത്രണത്തില്‍ 25ല്‍ അധികം പ്രധാന സ്വകാര്യ ആശുപത്രികളുണ്ട്. കേന്ദ്ര ക്ലിനിക്കല്‍ എസ്റ്റാബ്ലിഷ്മെന്റ് ചട്ടത്തിലെ വില ഏകീകരണ വ്യവസ്ഥകള്‍ക്കെതിരെ സ്വകാര്യ ആശുപത്രികളുടെ ഫെഡറേഷൻ സുപ്രീംകോടതിയെ സമീപിച്ചിരുന്നു. കേരള ക്ലിനിക്കല്‍ എസ്റ്റാബ്ലിഷ്മെന്റ് ആക്ടില്‍ നിലവില്‍ അത്തരം വ്യവസ്ഥകളില്ല. സ്വകാര്യ ആശുപത്രികളുടെ എതിർപ്പ് മറികടന്ന്, ചട്ടം ഭേദഗതിയുള്‍പ്പടെ പൂർത്തിയാക്കിയാലേ ചികിത്സാ ചെലവ് നിയന്ത്രിക്കാനാവൂ. മുൻ സർക്കാരിന്റെ കാലത്ത് ഇക്കാര്യങ്ങള്‍ പരിശോധിക്കാൻ പ്രത്യേകം സമിതിയെ വച്ചെങ്കിലും മുന്നോട്ട് പോയിരുന്നില്ല.
