കോട്ടയം : വിവിധ ആവശ്യങ്ങള്‍ ഉന്നയിച്ച്‌ 14 മുതല്‍ സംസ്ഥാനത്തെ സ്വകാര്യ ബസുടമകള്‍ സമരത്തിലേക്ക്. കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്‌സ് ഫെഡറേഷന്റെ നേതൃത്വത്തിലാണ് സമര പരിപാടികള്‍ക്ക് രൂപം നല്‍കിയിരിക്കുന്നത്.
ആദ്യപടിയായി 14 ന് ഉടമകളും കുടുംബാംഗങ്ങളും സെക്രട്ടേറിയറ്റ് മാർച്ച്‌ നടത്തും. പ്രിയദർശിനി പദ്ധതി മൂലം തങ്ങള്‍ക്ക് ഉണ്ടായ കനത്ത സാമ്പത്തിക നഷ്ടത്തിന് പരിഹാരം കാണുക, ബസ് ടിക്കറ്റ് നിരക്കും വിദ്യാർഥികളുടെ യാത്രാ ആനുകൂല്യവും (കണ്‍സെഷൻ) വർധിപ്പിക്കുക തുടങ്ങിയവയാണ് പ്രധാന ആവശ്യങ്ങള്‍.
പ്രശ്‌നങ്ങള്‍ ചൂണ്ടിക്കാട്ടി ഗതാഗത മന്ത്രിയ്ക്ക് നിവേദനവും നല്‍കി. മറ്റ് ബസ് സംഘടനകളുടെ കൂടി പിന്തുണ ഉറപ്പാക്കി ശക്തമായ പണിമുടക്കിലേക്ക് നീങ്ങുമെന്ന് ബസുടമകള്‍ മുന്നറിയിപ്പ് നല്‍കി.
