കോട്ടയം: ഡയറ്റ് പിന്തുടരുന്നവരുടെ വൈകുന്നേരങ്ങളിലെ ചായക്കൊപ്പം കൊറിക്കാൻ മികച്ച ലഘുഭക്ഷണം ഏതാണെന്ന സംശയത്തിന് ആരോഗ്യ വിദഗ്ധരുടെ മറുപടി ശ്രദ്ധേയമാകുന്നു.
ചിപ്‌സുകള്‍ക്കും പാക്കേജ്ഡ് ഭക്ഷണങ്ങള്‍ക്കും പകരമായി ആരോഗ്യകരമായ ലഘുഭക്ഷണങ്ങള്‍ തേടുന്നവർക്കിടയില്‍ മഖാനയും പോപ്‌കോണും ഒരുപോലെ തരംഗമാവുകയാണ്. ശരീരഭാരം കുറയ്ക്കാൻ ലക്ഷ്യമിടുന്നവർക്ക് ഇവയില്‍ ഏതാണ് കൂടുതല്‍ ഗുണകരമെന്ന് പരിശോധിക്കാം.
മഖാന
വെളുത്ത സ്പോഞ്ച് പോലുള്ള മഖാന അഥവാ താമര വിത്തുകള്‍ ലഘുഭക്ഷണം ഇഷ്ടപ്പെടുന്നവർക്കിടയില്‍ ഏറെ പ്രചാരമുള്ള ഒന്നാണ്.
സ്വാഭാവികമായും കൊഴുപ്പ് കുറവുള്ള ഇതില്‍ ആവശ്യത്തിന് പ്രോട്ടീനും നാരുകളും അടങ്ങിയിരിക്കുന്നു. ‘ഫൂഡ് പ്രൊഡക്ഷൻ, പ്രോസസ്സിങ് ആൻഡ് ന്യൂട്രിഷൻ’ ജേണലില്‍ പ്രസിദ്ധീകരിച്ച പഠനമനുസരിച്ച്‌, വറുത്ത മഖാനയുടെ ഗ്ലൈസെമിക് ഇൻഡക്സ് ഏകദേശം 37 മാത്രമാണ്.
അതുകൊണ്ടുതന്നെ രക്തത്തിലെ പഞ്ചസാരയുടെ അളവില്‍ പെട്ടെന്ന് വലിയ മാറ്റങ്ങള്‍ ഉണ്ടാക്കാതെ ഇത് കഴിക്കാനാകും.
പൊട്ടാസ്യം, മഗ്നീഷ്യം, ഫോസ്ഫറസ് എന്നിവയ്‌ക്കൊപ്പം ഹൃദയാരോഗ്യകരമായ കൊഴുപ്പുകളും ആന്റിഓക്‌സിഡന്റുകളും മഖാനയിലുണ്ട്. എന്നാല്‍, ആരോഗ്യകരമാണെന്നുകരുതി വലിയ പാത്രത്തില്‍ നിറയെ കഴിക്കുന്നത് കാലറി വർധിക്കാൻ കാരണമായേക്കാം.
പോപ്‌കോണ്‍
മറുവശത്ത്, കുറഞ്ഞ കാലറിയില്‍ കൂടുതല്‍ അളവില്‍ ലഭിക്കുന്നു എന്നതാണ് സാധാരണ പോപ്‌കോണിന്റെ പ്രധാന മേന്മ. ഇതൊരു ‘ഹോള്‍ ഗ്രെയിൻ’ ആയതിനാല്‍ മറ്റ് പല ലഘുഭക്ഷണങ്ങളെ അപേക്ഷിച്ച്‌ വയറു നിറഞ്ഞതായി തോന്നിപ്പിക്കാൻ ഏറെ സഹായിക്കും. ഉരുളക്കിഴങ്ങ് ചിപ്‌സ് കഴിച്ചവരെ അപേക്ഷിച്ച്‌, പോപ്‌കോണ്‍ കഴിച്ചവർക്ക് കൂടുതല്‍ വയറു നിറഞ്ഞതായി അനുഭവപ്പെട്ടതായി പഠനങ്ങള്‍ വ്യക്തമാക്കുന്നു.
ഇതിലെ നാരുകള്‍ കാർബോഹൈഡ്രേറ്റുകള്‍ രക്തത്തിലേക്ക് കലരുന്നതിന്റെ വേഗം കുറയ്ക്കുന്നു. എങ്കിലും, വെണ്ണ, ചീസ്, കാരമല്‍ എന്നിവ ചേർക്കാതെ പ്ലെയിൻ അഥവാ ലളിതമായി തയാറാക്കിയ പോപ്‌കോണ്‍ ആയിരിക്കണം ഡയറ്റില്‍ ഉള്‍പ്പെടുത്തേണ്ടത്.
ഏതാണ് ഏറ്റവും മികച്ചത്?
ശരീരഭാരം കുറയ്ക്കുന്ന കാര്യത്തില്‍ പ്ലെയിൻ പോപ്‌കോണിന് നേരിയ മുൻതൂക്കമുണ്ടെങ്കിലും, എണ്ണയോ നെയ്യോ ചേർക്കാതെ മിതമായ അളവില്‍ വറുത്തെടുത്ത മഖാനയും മികച്ചൊരു ഓപ്ഷൻ തന്നെയാണ്. കഴിക്കുന്ന അളവും അതില്‍ ചേർക്കുന്ന അധിക ചേരുവകളും ആണ് അന്തിമ ഫലം നിർണയിക്കുന്നത് എന്നതിനാല്‍, ഡയറ്റ് കൃത്യമായി പാലിച്ചുകൊണ്ട് ഇവ രണ്ടും മിതമായ അളവില്‍ മാറിമാറി പരീക്ഷിക്കാവുന്നതാണ്.
