പത്തനംതിട്ട: അടൂർ പൊലീസ് സ്റ്റേഷനില്‍ കോണ്‍ഗ്രസ് ജില്ലാ പഞ്ചായത്തംഗം ശ്രീനാദേവി കുഞ്ഞമ്മയുടെ നേതൃത്വത്തില്‍ അരങ്ങേറിയ അതിക്രമത്തിന്റെ ഞെട്ടിക്കുന്ന ദൃശ്യങ്ങള്‍ പുറത്തുവന്നു.
കഴിഞ്ഞ ജൂലൈ 11-നാണ് കേസിനാസ്പദമായ സംഭവം നടന്നത്. വിവാദമായ ഈ ആക്രമണ സംഘത്തില്‍ രാഹുല്‍ മാങ്കൂട്ടത്തിലിന്റെ അടുത്ത അനുയായിയായ ഫെന്നി നൈനാനും ഉള്‍പ്പെട്ടിരുന്നതായി വ്യക്തമായിട്ടുണ്ട്.
രാഷ്‌ട്രീയ നേതാക്കള്‍ക്കും തനിക്കുമെതിരെ സമൂഹമാധ്യമങ്ങളിലൂടെയും യൂട്യൂബിലൂടെയും അധിക്ഷേപ വീഡിയോകള്‍ പ്രചരിപ്പിച്ചെന്ന കുഞ്ഞമ്മയുടെ പരാതിയെ തുടർന്ന് അറസ്റ്റിലായ യൂട്യൂബർ രാജൻ ജോസഫിനെതിരെയാണ് കോണ്‍ഗ്രസ് പ്രവർത്തകർ സ്റ്റേഷനുള്ളില്‍ ഭീകരാന്തരീക്ഷം സൃഷ്ടിച്ചത്. കൊച്ചിയിലെ വസതിയില്‍ നിന്നും കസ്റ്റഡിയിലെടുത്തു കൊണ്ടുവന്ന പ്രതിയെ സ്റ്റേഷനില്‍ വെച്ച്‌ മർദ്ദിക്കാനും ഭീഷണിപ്പെടുത്താനുമാണ് നേതാക്കള്‍ സംഘടിച്ചെത്തിയത്.
പ്രതിയുമായി എത്തിയ പൊലീസ് വാഹനം തടഞ്ഞ പ്രവർത്തകർ, ഡ്യൂട്ടിയിലുണ്ടായിരുന്ന പൊലീസുകാരനെ കയ്യേറ്റം ചെയ്യുകയും ചെയ്തു. തുടർന്ന് യാതൊരുവിധ ഔദ്യോഗിക അനുമതിയും കൂസാതെ ലോക്കപ്പിനുള്ളിലേക്ക് അതിക്രമിച്ചു കയറിയ ശ്രീനാദേവി കുഞ്ഞമ്മ പ്രതിയെ ഭീഷണിപ്പെടുത്തുകയായിരുന്നു. ഈ നിയമവിരുദ്ധ നടപടി പിന്നീട് തങ്ങളുടെ ഫേസ്ബുക്ക് പേജിലൂടെ ഇവർ തന്നെ പരസ്യമായി ആഘോഷമാക്കുകയും ചെയ്തിരുന്നു. ഇതിന്റെ തുടർച്ചയെന്നോണം അടുത്ത ദിവസം രാവിലെ കോണ്‍ഗ്രസ് നേതാവ് രാഹുല്‍ മാങ്കൂട്ടത്തിലും അടൂർ പൊലീസ് സ്റ്റേഷനില്‍ എത്തിയിരുന്നുവെന്ന വിവരങ്ങളും പുറത്തുവരുന്നുണ്ട്.
