കൊച്ചി:ജഡ്ജിയും മകനും പ്രതിയായ ചേരാനല്ലൂർ അപകട കേസില്‍ പൊലീസ് ഉദ്യോഗസ്ഥരുടെ വീഴ്ചകള്‍ അക്കമിട്ട് നിരത്തി സസ്പെൻഷൻ ഉത്തരവ്.
അപകടത്തില്‍ കേസെടുക്കുന്നതില്‍ പോലീസ് വീഴ്ച്ച വരുത്തിയെന്നാണ് സസ്പെൻഷൻ ഉത്തരവിലെ പ്രധാന ആരോപണം. ലൈസൻസില്ലാതെ വാഹനം ഓടിച്ച്‌ സ്കൂട്ടർ യാത്രികനെ കൊലപ്പെടുത്തിയ പ്രതിക്കെതിരെ ഉചിതമായ വകുപ്പുകള്‍ ചുമത്തുന്നതിലും പിഴവ് സംഭവിച്ചുവെന്ന് ഉത്തരവ് ചൂണ്ടിക്കാട്ടുന്നുണ്ട്.
പരാതിക്കാരുടെ ഫോണില്‍ നിന്ന് ദൃശ്യങ്ങള്‍ ഡിലീറ്റ് ചെയ്യിപ്പിച്ചെന്നും ഗ്രേഡ് എസ്.ഐ കെ റ്റി മനോജും സീനിയർ സിവില്‍ പൊലീസ് ഓഫിസർ അരുണ്‍ ജോസിയുമാണ് അതിന് നിർദ്ദേശം നല്‍കിയതെന്നും സസ്പെൻഷൻ ഉത്തരവില്‍ വിശദമാക്കിയിട്ടുണ്ട്.
ക്രമസമാധാന ചുമതലയുള്ള എ.ഡി.ജി.പി സമർപ്പിച്ച പ്രത്യേക അന്വേഷണ റിപ്പോർട്ടിന്റെ അടിസ്ഥാനത്തിലാണ് നാല് പൊലീസ് ഉദ്യോഗസ്ഥരെ സസ്പെൻറ് ചെയ്തത്. അപകടത്തില്‍പ്പെട്ട വാഹനം ഓടിച്ചിരുന്നത് ഡ്രൈവിംഗ് ലൈസൻസിന് അർഹതയില്ലാത്ത പ്രായപൂർത്തിയാകാത്തയാളാണ്.
രാത്രിയില്‍ ലൈസൻസില്ലാതെ പൊതുനിരത്തില്‍ കാറോടിക്കുകയും അപകടത്തിന് ശേഷം പരിക്കേറ്റയാളെ സഹായിക്കാതെ സംഭവസ്ഥലത്തുനിന്ന് കടന്ന് കളയുകയും ചെയ്തു.
എഫ്.ഐ.ആർ രജിസ്റ്റർ ചെയ്യുന്ന സമയത്ത് തന്നെ ഈ വിവരങ്ങള്‍ പോലീസിന് അറിയാമായിരുന്നു. സർക്കിള്‍ ഇൻസ്പെക്ടർ കെ.എസ്. ശ്യാം കുമാറും എസ്.എച്ച്‌.ഒ വി.എസ്. വിശ്വജിത്തും സ്റ്റേഷനില്‍ ഉണ്ടായിരുന്നിട്ടും ബി.എൻ.സ് 105 ചുമത്താൻ കൃത്യമായ കാരണങ്ങള്‍ ഉണ്ടായിട്ടും മനഃപൂർവം ഒഴിവാക്കി. പകരം ബി.എൻ.എസ് 281, 106(1) എന്നീ വകുപ്പുകള്‍ മാത്രം ചുമത്തി.
ഇതിലൂടെ നിയമപരമായ ജാഗ്രത പുലർത്താതെ പ്രായപൂർത്തിയാകാത്ത പ്രതിക്ക് സ്റ്റേഷൻ ജാമ്യം ലഭിക്കാൻ വഴിയൊരുക്കി. പിന്നീട് അന്നേ ദിവസം തന്നെ ബി.എൻ.എസ് 106(1) മാറ്റി 105ാം വകുപ്പ് ചുമത്തുകയും മോട്ടോർ വാഹന നിയമത്തിലെ 183, 199A വകുപ്പുകള്‍ കൂട്ടിച്ചേർക്കുകയും ചെയ്തുവെന്നും സസ്പെൻഷൻ ഉത്തരവില്‍ പറയുന്നു.
പോലീസ് സ്റ്റേഷനിലെ സി.സി.ടി.വി ദൃശ്യങ്ങള്‍ പരിശോധിച്ചതില്‍ ഗ്രേഡ് എ.എസ്.ഐ കെ.ടി. മനോജും സീനിയർ സി.പി.ഒ അരുണ്‍ ജോഷിയും ചേർന്ന് പരാതിക്കാരനായ അനന്തകൃഷ്ണന്റെ മൊബൈല്‍ ഫോണ്‍ വാങ്ങി അതിലുണ്ടായിരുന്ന ചിത്രങ്ങള്‍ നിർബന്ധ പൂർവ്വം ഡിലീറ്റ് ചെയ്യിപ്പിച്ചതായി കണ്ടെത്തി.
പ്രായപൂർത്തിയാകാത്ത പ്രതിയുടെ കുടുംബവുമായി ബന്ധമുള്ള വ്യക്തിയുടെ സാന്നിധ്യത്തില്‍ ആയിരുന്നു ഈ നടപടി. പ്രായപൂർത്തിയാകാത്ത കുട്ടിയുടെ വിവരങ്ങള്‍ മാധ്യമങ്ങളില്‍ വെളിപ്പെടുത്തുന്നത് തടയുന്ന ജുവനൈല്‍ ജസ്റ്റിസ് ആക്‌ട് സെക്ഷൻ 74 ചൂണ്ടിക്കാട്ടി, ഒരു വ്യക്തിയുടെ ഫോണില്‍ നിന്ന് ദൃശ്യങ്ങള്‍ പോലീസുകാർ നിർബന്ധപൂർവ്വം ഡിലീറ്റ് ചെയ്യിപ്പിച്ചതിനെ ന്യായീകരിക്കാനാകില്ലെന്ന് ഉത്തരവ് വ്യക്തമാക്കുന്നു.
പോലീസിന്റെ ഭാഗത്തുനിന്നുണ്ടായ ഈ ഗുരുതരമായ വീഴ്ചകള്‍ കേസ് അന്വേഷണത്തിന്റെ നിഷ്പക്ഷതയെ ബാധിക്കുകയും കേരള പോലീസിന്റെ ജനകീയ പ്രതിച്ഛായയ്ക്ക് വലിയ മങ്ങ ഏല്‍പ്പിക്കുകയും ചെയ്തതായി ഉത്തരവില്‍ പറയുന്നുണ്ട്.
സംഭവത്തില്‍ ഉദ്യോഗസ്ഥർക്കെതിരെ ജോയിന്റ് ഓറല്‍ എൻക്വയറിക്ക് ഉത്തരവിട്ടിട്ടുണ്ട്. കൊച്ചി സിറ്റി ഡി.സി.ആർ.ബി അസിസ്റ്റന്റ് കമ്മീഷണർക്കാണ് അന്വേഷണ ചുമതല.
14 ദിവസത്തിനകം ചാർജ് മെമ്മോയുടെ കരടും 60 ദിവസത്തിനകം പി.ആർ മിനിറ്റ്സും സമർപ്പിക്കാൻ അന്വേഷണ ഉദ്യോഗസ്ഥന് നിർദ്ദേശം നല്‍കിയിട്ടുണ്ട്.
ചേരാനല്ലൂർ വാഹനാപകടക്കേസ് അന്വേഷണത്തിലും നടപടി സ്വീകരിക്കുന്നതിലും സംഭവിച്ച വീഴ്ചകളെത്തുടർന്ന് കൊച്ചി സിറ്റി പോലീസ് കമ്മീഷണർ എസ്. കാളിരാജ് മഹേഷ് കുമാറിനെയും മാറ്റിയിരുന്നു.
ദക്ഷിണമേഖലാ ഐ.ജി ആയിരുന്ന ആർ. നിശാന്തിനിയാണ് പുതിയ കൊച്ചി സിറ്റി പോലീസ് കമ്മീഷണർ. എ.ഡി.ജി.പി പി. വിജയന്റെ അന്വേഷണ റിപ്പോർട്ടിന്റെ അടിസ്ഥാനത്തില്‍ അന്വേഷണ മേല്‍നോട്ടത്തില്‍ വീഴ്ച പറ്റി എന്ന വിലയിരുത്തലിലാണ് കമ്മീഷണർക്കെതിരെ സർക്കാർ ഈ നടപടിയെടുത്തത്.
