കൊച്ചി: ചേരാനല്ലൂരില്‍ 17-കാരൻ ഓടിച്ച ബെൻസ് കാറിടിച്ച്‌ തട്ടുകട ഉടമ ജയബാലകൃഷ്ണൻ കൊല്ലപ്പെട്ട കേസില്‍ പോലീസിന്റെ ഭാഗത്തുനിന്ന് എന്തെങ്കിലും തരത്തിലുള്ള വീഴ്ചകള്‍ സംഭവിച്ചിട്ടുണ്ടോ എന്ന് സമഗ്രമായി പരിശോധിക്കുമെന്ന് ക്രമസമാധാന ചുമതലയുള്ള എ.ഡി.ജി.പി പി.വിജയൻ.
ജഡ്ജിയെന്നോ പോലീസെന്നോ ഉള്ള യാതൊരു വ്യത്യാസവുമില്ലാതെ, തെറ്റ് ചെയ്തവർക്കെതിരെ നിയമപരമായ കർശന നടപടിയുണ്ടാകുമെന്ന് അദ്ദേഹം മാധ്യമങ്ങളോട് വ്യക്തമാക്കി.
മരിച്ച ജയബാലകൃഷ്ണന്റെ കുടുംബം ഉള്‍പ്പെടെ സംഭവവുമായി ബന്ധപ്പെട്ട മുഴുവൻ ആളുകളെയും നേരില്‍ കണ്ട് സംസാരിക്കുമെന്നും അദ്ദേഹം പറഞ്ഞു.
കേസില്‍ പ്രാഥമിക ഘട്ടത്തില്‍ പോലീസിന് ഗുരുതര വീഴ്ച സംഭവിച്ചതായി ശ്രദ്ധയില്‍പ്പെട്ടതിനെത്തുടർന്ന് ആഭ്യന്തരമന്ത്രി രമേശ് ചെന്നിത്തല നല്‍കിയ കർശന നിർദ്ദേശത്തിന്റെ അടിസ്ഥാനത്തിലാണ് എ.ഡി.ജി.പി നേരിട്ട് അന്വേഷണത്തിന് എത്തിയത്.
അന്വേഷണ ചുമതല ഔദ്യോഗികമായി ക്രൈംബ്രാഞ്ചിന് കൈമാറിയിട്ടുണ്ട്. കേസ് കൈകാര്യം ചെയ്തതില്‍ പോലീസിന്റെ ഭാഗത്ത് വീഴ്ച സംഭവിച്ചതായി ആഭ്യന്തരമന്ത്രി രമേശ് ചെന്നിത്തല നിയമസഭയില്‍ ആവർത്തിച്ചു വ്യക്തമാക്കിയിരുന്നു.
പോലീസിന്റെ തെറ്റുകളെ കണ്ണടച്ച്‌ ന്യായീകരിക്കേണ്ട ബാധ്യത സർക്കാരിനില്ലെന്നും ജഡ്ജിയുടെ മകനായാലും ആരുടെ മകനായാലും നിയമം എല്ലാവർക്കും തുല്യമാണെന്നും വ്യക്തമാക്കിയ മന്ത്രി, പ്രതിയുടെ ജാമ്യം റദ്ദാക്കാൻ സർക്കാർ അപ്പീല്‍ നല്‍കിയതായും സഭയെ അറിയിച്ചിരുന്നു.
ഇതിന്റെ ഭാഗമായി ചേരാനല്ലൂർ പോലീസ് സ്റ്റേഷനിലെത്തിയ എ.ഡി.ജി.പി ഉദ്യോഗസ്ഥരുമായി വിശദമായ കൂടിക്കാഴ്ച നടത്തി. കൊച്ചി സിറ്റി പോലീസ് കമ്മീഷണർ കാളിരാജ് മഹേഷ് കുമാർ ഉള്‍പ്പെടെ ജില്ലയിലെ ക്രമസമാധാന ചുമതലയുള്ള മുഴുവൻ ഉന്നത ഉദ്യോഗസ്ഥരും ചേരാനല്ലൂർ സ്റ്റേഷനില്‍ ക്യാമ്പ് ചെയ്തിരുന്നു.
അതേസമയം, ക്രൈംബ്രാഞ്ച് സംഘം അപകടമുണ്ടാക്കിയ കാറോടിച്ച 17-കാരന്റെയും കാർ ഉടമയായ അഡീഷണല്‍ സെഷൻസ് ജഡ്ജിയുടെയും മാതാവിന്റെയും മൊഴികള്‍ രേഖപ്പെടുത്തി.
മരിച്ച ജയബാലകൃഷ്ണന്റെ കുടുംബത്തിന്റെ ആവശ്യപ്രകാരം പ്രായപൂർത്തിയാകാത്ത പ്രതിക്ക് ലഭിച്ച ജാമ്യം റദ്ദാക്കാനുള്ള നടപടികള്‍ ഊർജ്ജിതമായി മുന്നോട്ട് കൊണ്ടുപോകുമെന്നും അന്വേഷണസംഘം വ്യക്തമാക്കി.
