തിരുവനന്തപുരം: ‘ജനങ്ങളെ എന്നില്‍ നിന്ന് അകറ്റാന്‍ കഴിയില്ല’ എന്ന ഉറച്ച നിലപാടില്‍ മുഖ്യമന്ത്രി വി.ഡി. സതീശന്‍ നിലയുറപ്പിച്ചതോടെ, അദ്ദേഹത്തിന് സുരക്ഷയൊരുക്കാന്‍ നെട്ടോട്ടമോടി പോലീസ്.
സംസ്ഥാനത്ത് മന്ത്രിമാര്‍ക്ക് നേരെ വഴിതടയലും കരിങ്കൊടി പ്രതിഷേധങ്ങളും വര്‍ധിച്ചുവരുന്ന സാഹചര്യത്തില്‍ മുഖ്യമന്ത്രിയുടെ സുരക്ഷ കര്‍ശനമാക്കാനുള്ള നീക്കം അദ്ദേഹം തന്നെ തള്ളിയതാണ് ആഭ്യന്തര വകുപ്പിനെ വലിയ പ്രതിസന്ധിയിലാക്കിയിരിക്കുന്നത്.
മുഖ്യമന്ത്രി സഞ്ചരിക്കുന്ന വാഹനവ്യൂഹത്തില്‍ അധിക അകമ്പടി വാഹനങ്ങള്‍ ഉള്‍പ്പെടുത്താനോ പൊതുപരിപാടികളില്‍ ബാരിക്കേഡുകള്‍ ഉയര്‍ത്തി ജനങ്ങളെ അകറ്റിനിര്‍ത്താനോ അനുവദിക്കില്ലെന്നാണ് മുഖ്യമന്ത്രിയുടെ നിലപാട്. എന്നാല്‍, മന്ത്രിമാര്‍ക്ക് നേരെ വഴിയില്‍ പ്രതിഷേധങ്ങളും ആക്രമണശ്രമങ്ങളും പെരുകുന്ന സമയത്ത് മുഖ്യമന്ത്രിയുടെ ഈ ‘ജനകീയ നിലപാട്’ പോലീസിന് കടുത്ത തലവേദനയായി മാറുകയാണ്.
സെഡ് പ്ലസ് (Z+) സുരക്ഷയുള്ള മുഖ്യമന്ത്രിയുടെ പരിപാടികളില്‍ മാധ്യമപ്രവര്‍ത്തകരും പൊതുജനങ്ങളും സൃഷ്ടിക്കുന്ന തിക്കും തിരക്കും വലിയ സുരക്ഷാഭീഷണിയാണെന്ന് പോലീസ് ഇന്റലിജന്‍സ് എ.ഡി.ജി.പി വിലയിരുത്തിയിരുന്നു. അനിഷ്ട സംഭവങ്ങള്‍ ഒഴിവാക്കാന്‍ സുരക്ഷാ വലയം കൂടുതല്‍ കടുപ്പമുള്ളതാക്കണമെന്ന് കാണിച്ചാണ് ജില്ലാ പോലീസ് മേധാവിമാര്‍ക്ക് ഇന്റലിജന്‍സ് നിര്‍ദേശം നല്‍കിയത്.
കഴിഞ്ഞ ദിവസങ്ങളില്‍ ഇടുക്കി, എറണാകുളം, തൃശൂര്‍ എന്നിവിടങ്ങളില്‍ നടന്ന പരിപാടികളില്‍ മുഖ്യമന്ത്രിക്ക് സമീപത്തേക്ക് മാധ്യമപ്രവര്‍ത്തകര്‍ മൈക്കുമായി എത്തിയത് വലിയ തിരക്കിന് വഴിവെച്ചിരുന്നു. ഇടുക്കിയില്‍ തിക്കും തിരക്കും അനുഭവപ്പെട്ടപ്പോള്‍ മാധ്യമപ്രവര്‍ത്തകരെ മാറ്റിനിര്‍ത്താന്‍ മുഖ്യമന്ത്രി തന്നെ പോലീസിനോട് ആവശ്യപ്പെടുകയും ചെയ്തു. ഇതിന് പിന്നാലെയാണ് സുരക്ഷാ നിയന്ത്രണങ്ങള്‍ കടുപ്പിക്കാന്‍ പോലീസ് നീക്കം തുടങ്ങിയത്.
എറണാകുളത്ത് നടന്ന ചടങ്ങില്‍ സെഡ് പ്ലസ് സുരക്ഷ ചൂണ്ടിക്കാട്ടി മുഖ്യമന്ത്രിയുടെ അടുത്തേക്ക് ചോദ്യങ്ങളുമായി പോകുന്നതില്‍ നിന്ന് മാധ്യമങ്ങളെ പോലീസ് വിലക്കിയിരുന്നു. തൃശൂരിലും സമാനമായ രീതിയില്‍ മാധ്യമപ്രവര്‍ത്തകര്‍ക്ക് നിയന്ത്രണം ഏര്‍പ്പെടുത്തി. എന്നാല്‍, സുരക്ഷയുടെ പേരില്‍ ജനങ്ങളില്‍ നിന്നും മാധ്യമങ്ങളില്‍ നിന്നും പൂര്‍ണ്ണമായി ഒറ്റപ്പെടുന്ന രീതിയോട് മുഖ്യമന്ത്രി കടുത്ത വിയോജിപ്പ് പ്രകടിപ്പിച്ചു.
വാഹനവ്യൂഹം വലുതാക്കുന്നതിനോ സര്‍ക്കസ് സമാനമായ സുരക്ഷാ പരേഡുകള്‍ക്കോ താന്‍ താല്പര്യപ്പെടുന്നില്ലെന്ന് മുഖ്യമന്ത്രി ആഭ്യന്തര വകുപ്പ് ഉന്നതരെ അറിയിക്കുകയായിരുന്നു. ഇതോടെയാണ്, സുരക്ഷാ പ്രോട്ടോകോള്‍ പാലിക്കുകയും വേണം, എന്നാല്‍ അത് പുറത്തുകാണുകയും അരുത് എന്ന വിചിത്രമായ പ്രതിസന്ധിയിലേക്ക് പോലീസ് സേന എത്തിച്ചേര്‍ന്നത്.
മുഖ്യമന്ത്രിയുടെ തടസ്സം കാരണം വാഹനവ്യൂഹം വര്‍ധിപ്പിക്കാന്‍ കഴിയാത്ത സാഹചര്യത്തില്‍, പൊതുപരിപാടികളില്‍ മഫ്തിയിലുള്ള പോലീസുകാരുടെ എണ്ണം വന്‍തോതില്‍ കൂട്ടാനാണ് ഇപ്പോള്‍ പോലീസിന്റെ തീരുമാനം. ജനങ്ങള്‍ക്കിടയിലും മാധ്യമപ്രവര്‍ത്തകര്‍ക്കിടയിലും സാധാരണ വേഷത്തില്‍ ഉദ്യോഗസ്ഥരെ നിയോഗിച്ച് സുരക്ഷ ഉറപ്പാക്കാനാണ് നീക്കം.
പെട്ടെന്നുണ്ടാകുന്ന തിക്കും തിരക്കും തടയാനും അനാവശ്യമായി ആരും മുഖ്യമന്ത്രിയുടെ തൊട്ടടുത്തേക്ക് എത്താതിരിക്കാനും മഫ്തി പോലീസുകാര്‍ പ്രത്യേകം ശ്രദ്ധിക്കും. ഇതിനായി പ്രത്യേക പരിശീലനം ലഭിച്ച ഷാഡോ പോലീസിനെയും ഇന്റലിജന്‍സ് ഉദ്യോഗസ്ഥരെയും പരിപാടി നടക്കുന്ന വേദികളില്‍ വിന്യസിക്കാന്‍ ജില്ലാ പോലീസ് മേധാവിമാര്‍ക്ക് നിര്‍ദേശം നല്‍കി.
രാഷ്ട്രീയമായി മന്ത്രിമാര്‍ക്കെതിരെ വഴിതടയല്‍ പ്രതിഷേധങ്ങള്‍ വര്‍ധിക്കുന്നത് പോലീസിനെ കുറച്ചൊന്നുമല്ല ഭയപ്പെടുത്തുന്നത്. സുരക്ഷാ വീഴ്ച സംഭവിച്ചാല്‍ ഉന്നത ഉദ്യോഗസ്ഥര്‍ മറുപടി പറയേണ്ടി വരുമെന്നിരിക്കെ, മുഖ്യമന്ത്രിയുടെ പിടിവാശി കാര്യങ്ങള്‍ കൂടുതല്‍ സങ്കീര്‍ണ്ണമാക്കുന്നുണ്ടെന്നാണ് ഉദ്യോഗസ്ഥരുടെ രഹസ്യ സംസാരം.
പ്രോട്ടോകോള്‍ പ്രകാരമുള്ള സെഡ് പ്ലസ് സുരക്ഷയും മുഖ്യമന്ത്രിയുടെ ജനകീയ പ്രതിച്ഛായ നിലനിര്‍ത്താനുള്ള ആഗ്രഹവും തമ്മില്‍ കൂട്ടിമുട്ടുമ്പോള്‍, മധ്യമാര്‍ഗ്ഗം കണ്ടെത്താനുള്ള കഠിന ശ്രമത്തിലാണ് സംസ്ഥാന പോലീസ്. വരും ദിവസങ്ങളില്‍ കൂടുതല്‍ മഫ്തി പോലീസിനെ രംഗത്തിറക്കി ദൃശ്യമാകാത്ത സുരക്ഷാ കവചം തീര്‍ക്കാനാണ് ആഭ്യന്തര വകുപ്പിന്റെ ആലോചന.
