തിരുവനന്തപുരം: കൊല്ലത്ത് കേന്ദ്ര ആഭ്യന്തരമന്ത്രി അമിത് ഷായ്ക്കെതിരെ യൂത്ത് കോണ്‍ഗ്രസ് പ്രവർത്തകർ നടത്തിയ കരിങ്കൊടി പ്രതിഷേധത്തെ ചൊല്ലി കോണ്‍ഗ്രസില്‍ വിമർശനം.
പ്രതിഷേധം സംസ്ഥാനത്ത് അനാവശ്യ രാഷ്ട്രീയ സംഘർഷങ്ങള്‍ക്ക് വഴിവെച്ചെന്ന വിലയിരുത്തലിലാണ് ഒരു വിഭാഗം നേതാക്കള്‍. കെ.സി. പക്ഷ നേതാക്കള്‍ വേണ്ടത്ര കൂടിയാലോചന നടത്താതെയാണ് സമരം സംഘടിപ്പിച്ചതെന്നും വിമർശനമുയർന്നു.
ബിനു ചുള്ളിയലിന്റെ നേതൃത്വത്തില്‍ നടന്ന പ്രതിഷേധം അപക്വമായ നീക്കമായിരുന്നുവെന്നാണ് വിമർശനം. ഉറങ്ങിക്കിടന്ന ബിജെപിയെ പ്രതിഷേധത്തിലൂടെ ഉണർത്തിയെന്നും ചില നേതാക്കള്‍ ആരോപിച്ചു. മതിയായ ആലോചനകളില്ലാതെ നടത്തിയ പ്രതിഷേധത്തിന്റെ തുടർച്ചയായാണ് ഇപ്പോള്‍ സംസ്ഥാനത്തിന്റെ വിവിധ ഭാഗങ്ങളില്‍ യുവമോർച്ചയുടെ കരിങ്കൊടി പ്രതിഷേധം അരങ്ങേറുന്നതെന്നും നേതാക്കള്‍ ചൂണ്ടിക്കാട്ടുന്നു.
അമിത് ഷായ്ക്കെതിരായ പ്രതിഷേധത്തിന് പിന്നാലെ കോണ്‍ഗ്രസ് നേതാക്കള്‍ക്കും മന്ത്രിമാർക്കും നേരെയാണ് യുവമോർച്ച പ്രവർത്തകരുടെ പ്രതിഷേധം വ്യാപകമായത്. കോഴിക്കോട് ആഭ്യന്തരമന്ത്രി രമേശ് ചെന്നിത്തലയുടെയും വയനാട് എംപി പ്രിയങ്ക ഗാന്ധിയുടെയും വാഹനവ്യൂഹം യുവമോർച്ച പ്രവർത്തകർ തടഞ്ഞു.
കൊല്ലത്ത് മന്ത്രിമാരായ പി.സി. വിഷ്ണുനാഥിനും കെ. മുരളീധരനും നേരെയും പ്രതിഷേധമുണ്ടായി. കണ്ണൂരില്‍ കൊട്ടിയൂർ പഞ്ചായത്ത് ഹാളില്‍ നടന്ന യോഗത്തില്‍ പങ്കെടുത്ത് മടങ്ങുന്നതിനിടെയാണ് മന്ത്രി സണ്ണി ജോസഫിന് നേരെ യുവമോർച്ച പ്രവർത്തകർ കരിങ്കൊടി കാണിച്ചത്. കരുനാഗപ്പള്ളിയില്‍ ആരോഗ്യവകുപ്പ് മന്ത്രി കെ. മുരളീധരനെതിരെയും സമാനമായ പ്രതിഷേധം നടന്നു.
