കൊച്ചി: കേരള രാഷ്ട്രീയത്തെ ഇളക്കിമറിച്ച സി.എം.ആർ.എല്‍-എക്സാലോജിക് മാസപ്പടി ഇടപാടില്‍ മുൻ മുഖ്യമന്ത്രി പിണറായി വിജയൻ, മുൻ മന്ത്രി പി.എ.
മുഹമ്മദ് റിയാസ് എന്നിവർക്കെതിരെ അഴിമതി തടയല്‍ നിയമപ്രകാരം എഫ്.ഐ.ആർ രജിസ്റ്റർ ചെയ്ത് കേസെടുക്കാൻ ഹൈക്കോടതിയുടെ കർശന ഉത്തരവ്.
കേസ് രജിസ്റ്റർ ചെയ്യാതെ പ്രാഥമിക പരിശോധന മാത്രം നടത്തുന്നതിനെതിരെ പൊതുപ്രവർത്തകൻ അഡ്വ. കെ.എം. ഷാജഹാൻ നല്‍കിയ ഹർജി പൂർണ്ണമായി അനുവദിച്ചുകൊണ്ട് ജസ്റ്റിസ് എ. ബദറുദ്ദീന്റെ സിംഗിള്‍ ബെഞ്ചാണ് വിധി പ്രസ്താവിച്ചത്.
സി.എം.ആർ.എല്‍.-എക്സാലോജിക് പണമിടപാടില്‍ എൻഫോഴ്സ്മെന്റ് ഡയറക്ടറേറ്റ് (ഇ.ഡി) നടത്തിയ വിശദമായ അന്വേഷണത്തില്‍ വൻ സാമ്പത്തിക ക്രമക്കേടുകള്‍ കണ്ടെത്തിയിരുന്നു.
ഇതിന്റെ തുടർച്ചയായി പിണറായി വിജയൻ, ടി. വീണ, പി.എ. മുഹമ്മദ് റിയാസ് എന്നിവർക്കെതിരെ അഴിമതി നിരോധന നിയമപ്രകാരം കേസെടുക്കണമെന്ന് വ്യക്തമാക്കി ഇ.ഡി സംസ്ഥാന പോലീസ് മേധാവിക്ക് സമഗ്ര റിപ്പോർട്ട് കൈമാറിയിരുന്നു.
എന്നാല്‍ ഇതിന്മേല്‍ നേരിട്ട് കേസെടുക്കാൻ തയ്യാറാകാതെ, ക്രൈംബ്രാഞ്ചിന്റെ പ്രാഥമികാന്വേഷണത്തിന് മാത്രം ഉത്തരവിട്ട് നടപടികള്‍ ഇഴച്ചുനീക്കാനായിരുന്നു ഡി.ജി.പിയുടെ നീക്കം.
പോലീസിന്റെയും സർക്കാരിന്റെയും ഈ നടപടിയെ നിയമപരമായി ചോദ്യം ചെയ്തുകൊണ്ടാണ് അഡ്വ. കെ.എം. ഷാജഹാൻ ഹൈക്കോടതിയെ സമീപിച്ചത്.
ഗുരുതരമായ അഴിമതി ആരോപണങ്ങളും തെളിവുകളുമുള്ള ഇ.ഡി റിപ്പോർട്ട് നിലനില്‍ക്കെ പ്രാഥമികാന്വേഷണം എന്ന പേരില്‍ എഫ്.ഐ.ആർ ഇടുന്നത് വൈകിപ്പിക്കാനാകില്ലെന്ന് വ്യക്തമാക്കിയാണ് ഹൈക്കോടതി ഇപ്പോള്‍ നേരിട്ട് കേസ് രജിസ്റ്റർ ചെയ്യാൻ ഉത്തരവിട്ടിരിക്കുന്നത്.
കോടതിയുടെ ഈ ഉത്തരവോടെ പിണറായി വിജയനും കുടുംബത്തിനുമെതിരെ അഴിമതി നിരോധന നിയമപ്രകാരം ഔദ്യോഗികമായി കേസ് രജിസ്റ്റർ ചെയ്യപ്പെടും. ഇത് സംസ്ഥാന സർക്കാരിനും സി.പി.എം നേതൃത്വത്തിനും കനത്ത രാഷ്ട്രീയ പ്രഹരമായി മാറിയിരിക്കുകയാണ്.
