കോട്ടയം: പ്രതിപക്ഷ നേതാവ് പിണറായി വിജയന് നിയമസഭയില്‍ തുടർച്ചയായി സംഭവിക്കുന്ന വീഴ്ചകള്‍ക്ക് പിന്നില്‍ അദ്ദേഹത്തിന്റെ മാധ്യമ ഉപദേശകരാണെന്ന ആക്ഷേപം സി.പി.എമ്മിനുള്ളില്‍ ശക്തമാകുന്നു.
മുഖ്യമന്ത്രി വി.ഡി. സതീശനെ സഭയില്‍ വെച്ച്‌ കളിയാക്കാനും ട്രോളാനും വേണ്ടി മീഡിയ വിഭാഗം നല്‍കിയ ഉപദേശം സഭയില്‍ അമ്പേ പരാജയപ്പെടുകയും, അത് ഭരണപക്ഷത്തിന്റെ രൂക്ഷമായ പ്രത്യാക്രമണത്തിന് വഴിവെക്കുകയും ചെയ്തതാണ് പിണറായി അനുകൂലികളെ അസ്വസ്ഥരാക്കിയിരിക്കുന്നത്.
മുഖ്യമന്ത്രി വി.ഡി. സതീശൻ നിയമസഭയില്‍ സംസാരിക്കുമ്പോള്‍ സ്പീക്കറെ നോക്കാതെ സ്വന്തം ഭരണകക്ഷി എം.എല്‍.എമാരെ നോക്കിയാണ് സംസാരിക്കുന്നതെന്ന് പരിഹസിച്ച്‌ കഴിഞ്ഞ ദിവസം പിണറായി സഭയില്‍ രംഗത്തെത്തിയിരുന്നു. സതീശനെ അനുകരിച്ച്‌ പുറംതിരിഞ്ഞുനിന്നുകൊണ്ടുള്ള ആക്ഷനുകളോടെയായിരുന്നു പിണറായിയുടെ ഈ പ്രതികരണം.
എന്നാല്‍ ഇതിന് മറുപടിയുമായി ഉടനടി എഴുന്നേറ്റ മുഖ്യമന്ത്രി വി.ഡി. സതീശൻ, ഭരണപക്ഷത്ത് 102 എം.എല്‍.എമാർ ഉണ്ടെന്നും അവരെ നോക്കുന്നത് തനിക്ക് അഭിമാനമാണെന്നും മറുപടി നല്‍കി.
അങ്ങേക്ക് അപ്പുറത്തേക്ക് നോക്കാൻ കഴിയില്ലെന്നും, കാരണം സീറ്റുകളുടെ എണ്ണം 99-ല്‍നിന്ന് 35 ആക്കി കുറച്ചവരാണ് അവിടെ ഇരിക്കുന്നതെന്നും സതീശൻ തുറന്നടിച്ചതോടെ പിണറായിക്കും പ്രതിപക്ഷ നിരയ്ക്കും മറുപടിയില്ലാത്ത അവസ്ഥയായി.
വലിയ രാഷ്ട്രീയ ആയുധമാക്കാൻ നോക്കിയ വിഷയം സഭയില്‍ വൻ തിരിച്ചടിയായതോടെ, പിണറായിക്ക് ഇത്തരം വേണ്ടാത്ത ഉപദേശങ്ങള്‍ നല്‍കുന്നത് ആരാണെന്ന ചോദ്യം പാർട്ടി നേതാക്കള്‍ക്കിടയില്‍ ഉയർന്നു കഴിഞ്ഞു
എ.കെ.ജി സെന്ററിലെ മീഡിയ വിഭാഗത്തിന്റെ ചുമതല വഹിക്കുന്ന മുൻ മാധ്യമപ്രവർത്തകൻ എം.വി. നികേഷ് കുമാറാണ് ഈ ആശയം ഉപദേശിച്ചതെന്നാണ് പാർട്ടിക്കുള്ളിലെ പ്രധാന ചർച്ച. നവമാധ്യമങ്ങളിലെ പാർട്ടിയുടെ ഇടപെടലുകള്‍ പരാജയപ്പെടുന്നതിലും നികേഷ് കുമാറിനെതിരെ വിമർശനങ്ങള്‍ നിലനില്‍ക്കുന്നുണ്ട്.
ഇതിനുപുറമെ, മുൻ പ്രസ് സെക്രട്ടറി മനോഹരൻ മൊറായിയെ മാറ്റി ആരോപണവിധേയനായ പി.എം. മനോജിനെ വീണ്ടും പ്രതിപക്ഷ നേതാവിന്റെ പ്രസ് സെക്രട്ടറിയായി നിയമിച്ചതിനെതിരെയും പാർട്ടിക്കുള്ളില്‍ കടുത്ത അതൃപ്തി നിലനില്‍ക്കുന്നുണ്ട്.
പി.ആർ.ഡി വകുപ്പിലെ കരാറുകളുമായി ബന്ധപ്പെട്ട് സ്വന്തം മകന് വഴിവിട്ട സഹായം നല്‍കിയെന്ന അന്വേഷണം നേരിടുന്ന മനോജിനെ സുപ്രധാന ചുമതലകളില്‍ വീണ്ടും എത്തിച്ചതിനെതിരെയാണ് നേതാക്കള്‍ക്കിടയില്‍ അമർഷം പുകയുന്നത്.
