ശാസ്താംകോട്ട: സ്കൂട്ടറില് കറങ്ങിനടന്ന്, വഴിയാത്രക്കാരായ സ്കൂള് വിദ്യാർഥിനികളെ കടന്നുപിടിച്ച് ഉപദ്രവിച്ച ശേഷം കടന്നുകളയുന്ന യുവാവ് ഒടുവില് പോലീസ് പിടിയില്.
നെടുവത്തൂരില് കോഴിക്കട നടത്തുന്ന പുത്തൂർ ആലയ്ക്കല് ജംക്ഷനു സമീപം ചെറുമങ്ങാട് കുഴിയില് പുത്തൻവീട്ടില് ലിജോ ജോസഫ് (33) ആണ് പുത്തൂരില് നിന്ന് റൂറല് പോലീസ് ഡാൻസാഫ് ടീമിന്റെ പിടിയിലായത്.
ഇയാള് ഹെല്മറ്റും മാസ്ക്കും ധരിച്ച് നീല സ്കൂട്ടറില് എത്തി കഴിഞ്ഞ നാലു മാസത്തിനിടെ കൊല്ലം, പത്തനംതിട്ട ജില്ലകളിലെ വിവിധ ഭാഗങ്ങളിലായി 12 പെണ്കുട്ടികളെ ഉപദ്രവിച്ചതായി പ്രതി സമ്മതിച്ചതായി അന്വേഷണസംഘം പറഞ്ഞു. ശൂരനാട്, കിഴക്കേ കല്ലട സ്റ്റേഷനുകളില് പോക്സോ വകുപ്പുകള് ചുമത്തിയുള്ള കേസുകളും ഇയാള്ക്കെതിരെ നിലവിലുണ്ട്. കാല്നടയായോ സൈക്കിളിലോ പോകുന്ന സ്കൂള് വിദ്യാർഥിനികള് ഒറ്റപ്പെട്ട സ്ഥലങ്ങളില് എത്തുമ്പോഴാണ് ആക്രമണത്തിനിരയായത്. സ്കൂട്ടറിന്റെ നമ്പർ പ്ലേറ്റ് ചെളി തേച്ച് മറച്ചും ഒരുഭാഗം ഒടിച്ച നിലയിലും റജിസ്ട്രേഷൻ നമ്പർ കാണാത്ത തരത്തിലാണ് ഇയാള് യാത്ര ചെയ്യുന്നതെന്നും കണ്ടെത്തിയിട്ടുണ്ട്.
അതുപോലെ യാത്രയ്ക്ക് സ്ത്രീകള് ഉപയോഗിക്കുന്ന തരത്തിലുള്ള ചെരിപ്പുകളാണ് യുവാവ് ധരിക്കുന്നത്. അക്രമത്തിനു ശേഷം കുന്നത്തൂർ, അടൂർ, കൊട്ടാരക്കര താലൂക്കുകളിലെ വിവിധ ഇടറോഡുകളിലൂടെ സഞ്ചരിച്ചാണ് കടന്നുകളയുക. വിവിധ സ്ഥലങ്ങളില്നിന്നും ലഭ്യമായ നാനൂറോളം സിസിടിവി ദൃശ്യങ്ങള് ശേഖരിച്ചാണ് പോലീസ് അന്വേഷണം തുടങ്ങിയത്. എന്നാല് ആദ്യഘട്ടത്തില് ഇയാളെ കണ്ടെത്താനായില്ല. തുടർന്ന് ഡാൻസാഫ് ടീമിന്റെ തുടർച്ചയായ അന്വേഷണത്തിലാണ് ഇയാള് പിടിയിലായത്.
അതേസമയം കൊല്ലം-തേനി ദേശീയപാതയില് ശൂരനാട് പുളിമൂട് ജംക്ഷനു സമീപവും ചക്കുവള്ളി- മലനട റോഡിലും പടിഞ്ഞാറേകല്ലട ഐത്തോട്ടുവയിലും കിഴക്കേ കല്ലട ചിറ്റുമലയിലും വിദ്യാർഥിനികള് അതിക്രമത്തിന് ഇരയായി. എന്നാല് ഒരിടത്ത് മാത്രം പ്രതി മാസ്ക് ധരിച്ചിരുന്നില്ല. തന്നെ ആക്രമിക്കാൻ ശ്രമിച്ച പ്രതിയെക്കുറിച്ച് ഒരു പെണ്കുട്ടി നല്കിയ വിവരമാണു പ്രതിയെ പിടികൂടാൻ സഹായകമായത്. പ്രതിയെ ധൈര്യപൂർവം നേരിട്ട പെണ്കുട്ടി ഇയാള്ക്ക് വെറ്റില മുറുക്കുന്ന ശീലമുണ്ടെന്നും പ്രതിയുടെ രൂപവും ശരീരഭാഷയും അന്വേഷണ ഉദ്യോഗസ്ഥർക്ക് വിവരിച്ച് കൊടുക്കുകയായിരുന്നു.
