നാഗപട്ടണം: തമിഴ്നാട്ടിലെ പ്രശസ്ത തീർത്ഥാടന കേന്ദ്രമായ വേളാങ്കണ്ണിയിലെ സ്വകാര്യ ലോഡ്ജില്‍ വെച്ച്‌ പ്രായപൂർത്തിയാകാത്ത രണ്ട് സ്കൂള്‍ വിദ്യാർഥിനികളെ ലൈംഗികമായി പീഡിപ്പിച്ച കേസില്‍ രണ്ട് മലയാളി യുവാക്കളെ പൊലീസ് അറസ്റ്റ് ചെയ്തു. തിരുവനന്തപുരം സ്വദേശികളായ എ. അജയ് (26), എ. വിശാല്‍ (23) എന്നിവരാണ് ബുധനാഴ്ച വൈകുന്നേരത്തോടെ പിടിയിലായത്. കേരളത്തില്‍നിന്ന് വേളാങ്കണ്ണിയിലെത്തിയ 15 അംഗ വിനോദസഞ്ചാര സംഘത്തിലുള്‍പ്പെട്ടവരാണ് ഇരുവരും.
പുതുക്കോട്ടയിലെ സർക്കാർ സ്കൂളിലെ പതിനൊന്നാം ക്ലാസ് വിദ്യാർഥിനികളാണ് പീഡനത്തിനിരയായത്. കുടുംബപ്രശ്നങ്ങളെ തുടർന്ന് വീട്ടില്‍നിന്ന് പിണങ്ങിയിറങ്ങിയ ഒരു പെണ്‍കുട്ടി സുഹൃത്തിനൊപ്പം വേളാങ്കണ്ണിയില്‍ എത്തുകയായിരുന്നു.
ജോലി അന്വേഷിച്ചാണ് ഇരുവരും ഇവിടെ എത്തിയത്. പെണ്‍കുട്ടികളില്‍ ഒരാളെ കാണാനില്ലെന്ന് കാണിച്ച്‌ ഒക്ടോബർ 18-ന് രക്ഷിതാക്കള്‍ പുതുക്കോട്ട പൊലീസില്‍ പരാതി നല്‍കിയിരുന്നു.
ഒക്ടോബർ 20 ചൊവ്വാഴ്ച രാത്രി വേളാങ്കണ്ണി ബീച്ചില്‍ നിന്ന പെണ്‍കുട്ടികളെ പ്രതികള്‍ പ്രലോഭിപ്പിച്ച്‌ സ്വകാര്യ ലോഡ്ജിലേക്ക് കൂട്ടിക്കൊണ്ടുപോവുകയും അവിടെവെച്ച്‌ ക്രൂരമായി ലൈംഗികാതിക്രമത്തിന് ഇരയാക്കുകയുമായിരുന്നുവെന്ന് പൊലീസ് പറഞ്ഞു. ബുധനാഴ്ച ഉച്ചയോടെ പ്രതികള്‍ വീണ്ടും ഈ ലോഡ്ജ് മുറിയിലേക്ക് മടങ്ങിയെത്തി.
ലോഡ്ജിന് സമീപത്ത് സംശയാസ്പദമായ സാഹചര്യത്തില്‍ പ്രായപൂർത്തിയാകാത്ത പെണ്‍കുട്ടികളെ കണ്ടതിനെ തുടർന്ന് സമീപവാസി നല്‍കിയ വിവരത്തിന്റെ അടിസ്ഥാനത്തിലാണ് പൊലീസ് സ്ഥലത്തെത്തിയത്. തുടർന്ന് പെണ്‍കുട്ടികളെ പൊലീസ് മോചിപ്പിക്കുകയും വിവരങ്ങള്‍ ചോദിച്ചറിയുകയുമായിരുന്നു. പെണ്‍കുട്ടികളുടെ മൊഴിയുടെ അടിസ്ഥാനത്തില്‍ അജയ്, വിശാല്‍ എന്നിവരെ ബുധനാഴ്ച തന്നെ പൊലീസ് അറസ്റ്റ് ചെയ്തു. പ്രതികള്‍ക്കെതിരെ പോക്സോ കേസെടുത്തു.
