കൊച്ചി: കൊച്ചിയില് ബലാത്സംഗ കേസില് പ്രതിയായ ഡോക്ടര്ക്കെതിരായ നിര്ണായക തെളിവുകള് പൊലിസിന് ലഭിച്ചു. പ്രതിയായ ഡോ.
ജോണ്സണ് കെ. വര്ഗീസിന്റെ മൊബൈല്ഫോണില് നിന്ന് ഒട്ടേറെ യുവതികളുടെ സ്വകാര്യദൃശ്യങ്ങള് പൊലിസ് കണ്ടെത്തി. ഏകദേശം 12 യുവതികളുമൊത്തുള്ള അശ്ലീല വീഡിയോകളാണ് ഡോക്ടറുടെ ഫോണിലുള്ളത്. യുവതികളുമൊത്തുള്ള സ്വകാര്യ നിമിഷങ്ങളുടെ വീഡിയോകളും ഡോക്ടറുടെ മൊബൈല്ഫോണില്നിന്ന് പൊലിസ് കണ്ടെത്തി.
അതേസമയം, ബലാത്സംഗ പരാതിയില് പീഡനക്കേസ് രജിസ്റ്റര് ചെയ്തതിന് പിന്നാലെ ഡോ. ജോണ്സണ് കെ വര്ഗീസ്(41) ഒളിവില്പോയിരിക്കുകയാണ്. ഇയാള്ക്കായി പൊലിസ് തിരച്ചില് ഊര്ജ്ജിതമാക്കി. വിദേശത്തേക്ക് കടക്കാതിരിക്കാനായി ലുക്കൗട്ട് നോട്ടിസ് പുറത്തിറക്കാനാണ് പൊലീസ് നീക്കം. പൊലിസ് ഫോണില് ബന്ധപ്പെടാന് ശ്രമിച്ചെങ്കിലും സ്വിച്ച്‌ ഓഫ് ചെയ്ത നിലയിലായിരുന്നു.
നടിയും നടനുമടക്കം12 പേര് ചേര്ന്ന് ഡോക്ടറെ ഫ്ളാറ്റില് വിളിച്ചു വരുത്തി മര്ദിച്ച്‌ മൂന്നര ലക്ഷത്തോളം രൂപയുടെ മൊബൈല് ഫോണുകളും മറ്റും കവര്ച്ച നടത്തിയെന്ന കേസില് കഴിഞ്ഞ ദിവസമാണ് ട്വിസ്റ്റ് സംഭവിച്ചത്. കടവന്ത്ര പൊലിസില് പരാതി നല്കിയ ഡോ.ജോണ്സണ് കെ. വര്ഗീസ് നെതിരേ കഴിഞ്ഞ ദിവസം കേസില് അറസ്റ്റിലായ നടിയുടെ അടുത്ത ബന്ധുവായ അമ്പതുകാരി ബലാത്സംഗ പരാതിയുമായി എത്തുകയായിരുന്നു.
മദ്യം നല്കി അവശയാക്കിയ ശേഷം ലൈംഗികമായി പീഡിപ്പിച്ചുവെന്നാണ് പരാതി. ഇതിന്റെ അടിസ്ഥാനത്തില് ഇന്ഫോപാര്ക്ക് പോലിസ് ഡോ. ജോണ്സനെതിരേ എഫ്.ഐ.ആര് രജിസ്റ്റര് ചെയ്ത് അന്വേഷണം ആരംഭിച്ചു. ബലാല്സംഗ കുറ്റത്തിന് ബി.എന്.എസ് സെക്ഷന് 65 ചുമത്തിയാണ് കേസ് രജിസ്റ്റര് ചെയ്തിരിക്കുന്നത്.
തൃപ്പൂണിത്തുറ സ്വദേശിയായ സ്ത്രീയുടെ കുടുംബ ഡോക്ടറാണ് ഡോ. ജോണ്സണ്. കഴിഞ്ഞ മാസം പത്തിന് ഇന്ഫോപാര്ക്കിന് സമീപമുള്ള ഒരു ഹോട്ടലില് പീഡിപ്പിച്ചെന്നാണ് പരാതി. പരാതിക്കാരിയുടെ സ്ഥാപനത്തിലെ ഒരു പരിപാടിക്ക് ശേഷം വൈകിട്ട് ഏഴരയോടെ ഡോക്ടറോടൊപ്പം പുറത്തുപോയെന്നും തന്നെ ബാറിലെത്തിച്ച്‌ മദ്യം കുടിപ്പിച്ചെന്നും ഇവര് പറയുന്നു. തുടര്ന്ന് അവശയായതിനെ തുടര്ന്ന് ഹോട്ടലിലെത്തിച്ച്‌ പീഡിപ്പിച്ചെന്നുമാണ് പരാതി. ഈ വിവരങ്ങളൊക്കെ ഡ്രൈവറോട് പറഞ്ഞിരുന്നതായും പരാതിയിലുണ്ട്.
നഗ്നചിത്രങ്ങള് ഡോക്ടര് പകര്ത്തിയിട്ടുണ്ടോ എന്ന് സംശയമുണ്ടെന്നും ഇവര് പരാതിയില് പറഞ്ഞിട്ടുണ്ട്. ഇത്തരത്തിലുള്ള ചിത്രങ്ങള് ഡോക്ടറുടെ ഫോണിലുണ്ടോ എന്നറിയാനാണ് ഫോണ് പിടിച്ചുവാങ്ങിയത്. കൊച്ചിയിലെ പ്രമുഖ സ്വകാര്യ ആശുപത്രിയിലെ എമര്ജന്സി ഫിസിഷ്യനായിരുന്ന ജോണ്സനെ സംഭവത്തെതുടര്ന്ന് ജോലിയില് നിന്ന് പുറത്താക്കിയിരുന്നു.
അതേസമയം ഡോക്ടറുടെ പരാതിയില് നടിയും അഭിഭാഷകയുമായ അതുല്യ ചന്ദ്ര (32), നടനും എക്സിക്യുട്ടീവ് പ്രൊഡ്യൂസറുമായ ബിബിന് പെരുമ്പിള്ളി (42), കെ.ബി വിഷ്ണു (31) എന്നിവരെ കടവന്ത്ര പൊലിസ് വ്യാഴാഴ്ച അറസ്റ്റ് ചെയ്തിരുന്നു.
ഇവര് കൈക്കലാക്കിയ ഡോക്ടറുടെ ഫോണിലാണ് അശ്ലീല ദൃശ്യങ്ങളുള്ളത്. ഇത് ഫോറന്സിക് പരിശോധനയ്ക്കായി അയയ്ക്കും. അറസ്റ്റിലായ പ്രതികള് നല്കിയ ജാമ്യാപേക്ഷ കോടതി ഇന്ന് പരിഗണിക്കും. ഡോക്ടറും പരാതിക്കാരിയുമായി നേരത്തെ അടുത്ത സൗഹൃദമുണ്ടായിരുന്നുവെന്ന് പൊലിസ് സംശയിക്കുന്നുണ്ട്. മയക്കുമരുന്ന് ഇടപാടുകാരുമായി ഡോക്ടര് ബന്ധപ്പെട്ടിരുന്നതിനെപ്പറ്റിയും പൊലിസിന് സൂചന ലഭിച്ചിട്ടുണ്ട്.
