തൃശൂർ: ബിജെപി നേതൃത്വത്തിന്റെ അവഗണനയില്‍ അതൃപ്തിയുമായി പത്മജാ വേണുഗോപാല്‍. തിരഞ്ഞെടുപ്പില്‍ തോറ്റാലും ഭരണഘടനാ പദവികളിലേക്ക് പരിഗണിക്കുമെന്ന് ഉറപ്പ് പാലിക്കാത്തതിലാണ് പത്മജയ്ക്ക് അതൃപ്തി.ഇന്ന് വിദേശത്തേക്ക് പോകുന്ന പത്മജ രണ്ടാഴ്ചയ്ക്കുശേഷം മടങ്ങിവന്ന് കടുത്ത തീരുമാനത്തിലേക്ക് കടക്കും എന്നാണ് സൂചന.
നിയമസഭാ തിരഞ്ഞെടുപ്പ് കാലത്ത് ആരോഗ്യപരമായ പ്രശ്നങ്ങള്‍ ചൂണ്ടിക്കാട്ടി താൻ മത്സരത്തിന് ഇല്ലായെന്ന് പത്മജ വേണുഗോപാല്‍ നേതൃത്വത്തെ അറിയിച്ചിരുന്നു. അന്ന് കേന്ദ്ര ആഭ്യന്തരമന്ത്രി അമിത് ഷാ അടക്കം നിർദേശിച്ചതിന്റെ അടിസ്ഥാനത്തിലാണ് തൃശൂരില്‍ സ്ഥാനാർഥിയായി എത്തിയത്. അന്ന് ദേശീയ നേതൃത്വവും സംസ്ഥാന നേതൃത്വവും തിരഞ്ഞെടുപ്പില്‍ തോറ്റാലും ഭരണഘടന പദവികള്‍ അടക്കം അവർക്ക് ഉറപ്പുനല്‍കിയതാണ്. എന്നാല്‍ തിരഞ്ഞെടുപ്പിനുശേഷം നേതൃത്വം ഒരു പരിഗണനയും നല്‍കുന്നില്ല എന്നാണ് പത്മജയുടെ പരാതി.
കുറച്ചു മാസങ്ങളായി പാർട്ടിയുടെ പരിപാടികളില്‍ ഒന്നും തന്നെ പത്മജ എത്താറില്ല. സംസ്ഥാന പ്രസിഡണ്ട് രാജീവ് ചന്ദ്രശേഖരവുമായി പലപ്പോഴായി ആശയവിനിമയം നടത്തുന്നുണ്ട് എങ്കിലും കാര്യമായി ഉറപ്പൊന്നും ലഭിച്ചിട്ടില്ല. ഗവർണർ അല്ലെങ്കില്‍ ദേശീയ വനിതാ കമ്മീഷൻ അംഗം ഇതില്‍ ഏതെങ്കിലും ഒരു പദവി ലഭിക്കുമെന്നായിരുന്നു പത്മജയുടെയും അവരോട് അടുപ്പമുള്ളവരുടെയും പ്രതീക്ഷ. കേരളത്തില്‍ നിന്ന് തന്നെ നിവേദിത സുബ്രഹ്മണ്യത്തെ ദേശീയ വനിതാ കമ്മീഷൻ അംഗമായി നിയമിച്ചു. ഇവിടെയും തഴയപ്പെട്ടതോടുകൂടിയാണ് കടുത്ത തീരുമാനത്തിലേക്ക് കടക്കാൻ അവർ ആലോചിക്കുന്നത് എന്നാണ് സൂചന. ഇന്ന് ദുബായിലുള്ള മകളുടെ അടുത്തേക്ക് പോകുന്ന പത്മജ രണ്ടാഴ്ചയ്ക്കുശേഷം തിരികെ എത്തും. അതേസമയം, പത്മജയെ തിരികെ കോണ്‍ഗ്രസില്‍ എത്തിക്കാൻ കെ മുരളീധരനുമായി അടുപ്പമുള്ളവർ ശ്രമം ആരംഭിച്ചിട്ടുണ്ട്.
