കൊച്ചി: ആസൂത്രണ ബോർഡ് പരീക്ഷയുമായി ബന്ധപ്പെട്ട ചോദ്യപേപ്പർ ക്രമക്കേടില്‍ പിഎസ്‌സിക്കെതിരെ രൂക്ഷവിമർശനവുമായി ഹൈക്കോടതി.
58 ഉത്തരങ്ങള്‍ക്ക് മാർക്ക് രേഖപ്പെടുത്താതിരുന്നത് പ്രത്യക്ഷ അഴിമതിയല്ലേയെന്നും പിഎസ്‌സി നടത്തിയ കുറ്റകൃത്യങ്ങള്‍ അന്വേഷിക്കാൻ രാജ്യത്ത് സംവിധാനമില്ലേയെന്നും കോടതി ചോദിച്ചു. ക്രൈംബ്രാഞ്ച് അന്വേഷണം ചോദ്യം ചെയ്ത് സമർപ്പിച്ച റിട്ട് ഹർജി പരിഗണിക്കുന്നതിനിടെയാണ് കോടതിയുടെ പരാമർശങ്ങള്‍. പരീക്ഷയില്‍ 58 ഉത്തരങ്ങളുടെ മൂല്യനിർണയം നടത്താതിരുന്നത് വളരെ ഗുരുതരമായ ആരോപണമാണെന്ന് കോടതി നിരീക്ഷിച്ചു. കോടിക്കണക്കിന് ജനങ്ങളുടെ പ്രതീക്ഷയാണ് പിഎസ്‌സിയെന്നും 58 ചോദ്യങ്ങളുടെ മാർക്ക് ഒഴിവാക്കിയത് എങ്ങനെയാണെന്നും കോടതി ചോദിച്ചു.
അതേസമയം 58 ഉത്തരങ്ങള്‍ക്ക് മാർക്ക് നല്‍കാതിരുന്നത് ക്ലറിക്കല്‍ മിസ്റ്റേക്ക് മാത്രമായി ന്യായീകരിക്കാനാകില്ലെന്ന് സർക്കാർ കോടതിയില്‍ വ്യക്തമാക്കി. നൂതനമായ തട്ടിപ്പാണിതെന്നും എങ്ങനെയാണ് ഇതിനെ ക്ലറിക്കല്‍ മിസ്റ്റേക്ക് എന്ന് വിശേഷിപ്പിക്കാനാകുകയെന്നും സർക്കാർ ചോദിച്ചു. സംഭവം സാമാന്യബുദ്ധിക്ക് നിരക്കാത്തതാണെന്നും സർക്കാർ വാദിച്ചു. പിഎസ്‌സി ചെയർമാൻ ഉള്‍പ്പെടെയുള്ളവർ അന്വേഷണവുമായി സഹകരിക്കുന്നില്ലെന്നും 180ലേറെ പരാതികള്‍ പിഎസ്‌സിക്കെതിരെ ലഭിച്ചിട്ടുണ്ടെന്നും കോടതിയെ അറിയിച്ചു.
