ചെറുവള്ളി: ചിറക്കടവ് ഗ്രാമപഞ്ചായത്തിലെ 14-ാം വാർഡിൽ ജനവാസ മേഖലയിൽ ആരംഭിക്കാൻ പോകുന്ന പാറമടക്കെതിരെ ജനപ്രതിനിധികളുടെയും വിവിധ രാഷ്ട്രീയ പാർട്ടികളുടെയും പൂർണ്ണ പിന്തുണയോടെ ജനകീയ സർവകക്ഷി യോഗം നടന്നു.
ഇന്നലെ (ഒക്ടോബർ 4 ഞായറാഴ്ച) വൈകിട്ട് 4:30-ന് കൈലാത്തുകവലയിൽ വെച്ച് 'പാറമട വിരുദ്ധ ജനകീയ സമിതി'യുടെ നേതൃത്വത്തിലാണ് പ്രതിഷേധ യോഗം സംഘടിപ്പിച്ചത്. യോഗം കാഞ്ഞിരപ്പള്ളി എം.എൽ.എ പ്രൊഫ. റോണി കെ ബേബി ഉദ്ഘാടനം ചെയ്യുകയും ജനകീയ സമരത്തിന് തന്റെ പൂർണ്ണ പിന്തുണ വാഗ്ദാനം ചെയ്യുകയും ചെയ്തു.
മുൻപ് നിരോധിച്ച തോംപാറ പാറമടയ്ക്ക് സമീപം പുറത്തുനിന്നുള്ള വ്യക്തികളെ കൂട്ടുപിടിച്ച് പുതിയതായി തുടങ്ങാൻ ശ്രമിക്കുന്ന ഈ പദ്ധതി നാടിന്റെ സ്വൈര്യജീവിതം പൂർണ്ണമായും തകർക്കുമെന്ന് ജനകീയ സമിതി ചൂണ്ടിക്കാട്ടുന്നു.
ടൺ കണക്കിന് സ്ഫോടകവസ്തുക്കൾ സൂക്ഷിക്കുന്ന വെടിമരുന്നുശാല വീടുകൾക്ക് നടുവിൽ വരുന്നത് വലിയ ദുരന്തങ്ങൾക്ക് വഴിവെക്കും.
സമിതി കൺവീനർ അഡ്വ. രാഹുൽ ഗോപിനാഥ് സ്വാഗതം ആശംസിച്ച യോഗത്തിൽ 14-ാം വാർഡ് മെമ്പറും സമിതി ചെയർപേഴ്സണുമായ ത്രേസ്യാമ്മ നല്ലേപ്പറമ്പിൽ അധ്യക്ഷത വഹിച്ചു.
വാഴൂർ ബ്ലോക്ക് പഞ്ചായത്ത് പ്രസിഡന്റ് അഡ്വ. ജയ ശ്രീധർ, ചിറക്കടവ് ഗ്രാമപഞ്ചായത്ത് പ്രസിഡന്റ് ടി. എൻ ഗിരീഷ് കുമാർ, പ്രതിപക്ഷ നേതാവ് ഗോപി പാറാംതോട് വിവിധ രാഷ്ട്രീയ കക്ഷികളെ പ്രതിനിധീകരിച്ച് ബിനീഷ് ടി ആർ, വി സുനിൽ, ജിൻസ് നല്ലേപ്പറമ്പിൽ, ലാൽജി മാടത്താനിക്കുന്നേൽ എന്നിവർ ഐക്യദാർഢ്യ പ്രഭാഷണം നടത്തി സമരത്തിന് പിന്തുണ അറിയിച്ചു.
ജനകീയ സമിതി ജോയിന്റ് കൺവീനർ പി ജെ തോമസ് പാട്ടത്തിൽ യോഗത്തിന് കൃതജ്ഞത രേഖപ്പെടുത്തി. ജനങ്ങൾ ഒറ്റക്കെട്ടായി ഒപ്പിട്ട ഹർജി മന്ത്രി മോൻസ് ജോസഫ് ഉൾപ്പെടെ വിവിധ ജനപ്രതിനിധികൾക്ക് മുൻപ് സമർപ്പിച്ചിരുന്നതായും പാറമടയ്ക്ക് എതിരേ ജനകീയ പ്രതിഷേധം തുടരുമെന്നും സമിതി ഭാരവാഹികൾ അറിയിച്ചു.
