പത്തനംതിട്ട: ശബരിമലയില്‍ പമ്പയിലെ ഇരുന്നൂറോളം ശുചിമുറികളിലേക്കുള്ള ജലവിതരണം തടസ്സപ്പെടുത്തി.
പോലീസ് മെസ്സിലേക്ക് ഉള്‍പ്പെടെയുള്ള ജലവിതരണമാണ് ഇതോടെ തടസ്സപ്പെട്ടത്.
സംഭവത്തിന് പിന്നില്‍ സംഘടിതമായ അട്ടിമറി ശ്രമമുണ്ടെന്നാണ് സംശയം.
പമ്പയിലേക്ക് വെള്ളം കൊണ്ടുവരുന്ന പ്രധാന വാല്‍വുകള്‍ ആരോ അടച്ചിട്ടതായി പരിശോധനയില്‍ കണ്ടെത്തിയിട്ടുണ്ട്. ശുചിമുറികളുടെ നടത്തിപ്പ് കരാർ നല്‍കുന്നത് ഒഴിവാക്കി ഇത്തവണ മുതല്‍ ദേവസ്വം ബോർഡ് ശുചിമുറികള്‍ തീർത്ഥാടകർക്കായി സൗജന്യമാക്കിയിരുന്നു.
ഇതിന്റെ വൈരാഗ്യത്തിലാണോ ജലവിതരണം തടസ്സപ്പെടുത്തിയതെന്നാണ് സംശയിക്കുന്നത്. സംഭവത്തില്‍ പൊലീസില്‍ പരാതി നല്‍കാൻ ദേവസ്വം ബോർഡ് തീരുമാനിച്ചു.
കൂടാതെ, വാല്‍വുകള്‍ നിരീക്ഷിക്കുന്നതിനായി പ്രത്യേക ജീവനക്കാരെയും നിയോഗിച്ചിട്ടുണ്ട്.
നേരത്തെ ചിത്തിര ആട്ടവിശേഷത്തിനും സമാനമായ രീതിയില്‍ ശുചിമുറികളിലേക്കുള്ള വെള്ളം തടസ്സപ്പെടുത്തിയിരുന്നു.
അന്ന് ഒരു ദേവസ്വം ബോർഡ് ജീവനക്കാരനെ സ്വാധീനിച്ച്‌ ചിലർ ജലവിതരണം തടസ്സപ്പെടുത്തിയതാണെന്ന് അന്വേഷണത്തില്‍ കണ്ടെത്തുകയും, തുടർന്ന് ഇയാളെ ദേവസ്വം ബോർഡ് സർവീസില്‍ നിന്ന് പിരിച്ചുവിടുകയും ചെയ്തിരുന്നു.
