മീനച്ചിലാറ്റിൽ കുളിക്കാനിറങ്ങിയ വിദ്യാർത്ഥി ഒഴുക്കിൽപ്പെട്ട് മരിച്ചു; തൊടുപുഴ ഇടവെട്ടി സ്വദേശി മുഹമ്മദ് അഫ്രീനാണ് മരിച്ചത്

പാലാ: മീനച്ചിലാറ്റിലെ മുത്തോലി കടവിൽ കുളിക്കാനിറങ്ങിയ വിദ്യാർത്ഥി ഒഴുക്കിൽപ്പെട്ട് മരിച്ചു. തൊടുപുഴ ഇടവെട്ടി സ്വദേശി മുഹമ്മദ് അഫ്രീൻ ആണ് മരിച്ചത്.

ഇന്ന് വൈകിട്ട് 4:45 ഓടെയായിരുന്നു സംഭവം. രണ്ടു പേരാണ് കടവിൽ കുളിക്കാനിറങ്ങിയത്. ഇതിനിടെ അഫ്രീൻ ഒഴുക്കിൽപ്പെടുകയായിരുന്നു.

വിവരമറിഞ്ഞെത്തിയ പാലാ ഫയർഫോഴ്സ് സംഘവും ഈരാറ്റുപേട്ടയിലെ ടീം എമർജൻസി അംഗങ്ങളും ചേർന്നാണ് മൃതദേഹം വെള്ളത്തിൽ നിന്ന് പുറത്തെടുത്തത്.

മുത്തോലിയിലെ ഒരു ഹോസ്റ്റലിൽ താമസിച്ച് പഠിച്ചു വരികയായിരുന്നു അഫ്രീൻ. മൃതദേഹം പാലാ ജനറൽ ആശുപത്രിയിലേക്ക് മാറ്റി.