കോട്ടയം: തെക്കൻ ജില്ലകളില്‍ നിന്ന് കോട്ടയം നഗരത്തിലേക്ക് ഗതാഗതക്കുരുക്കില്‍പ്പെടാതെ എത്താൻ കഴിയുന്ന കോടിമത രണ്ടാംപാലം തുറക്കുന്നു.
നാളെ നവംബർ 10 ചൊവ്വാഴ്ച പൊതുമരമാത്ത് വകുപ്പ് മന്ത്രി പികെ ബഷീറാണ് പാലത്തിൻ്റെ ഉദ്ഘാടനം നിർവഹിക്കുക. കൊല്ലം, പത്തനംതിട്ട ഭാഗങ്ങളില്‍ നിന്ന് വരുന്ന വാഹനങ്ങള്‍ കോട്ടയം നഗരത്തിലേക്ക് പ്രവേശിക്കുന്ന പാതയിലെ പ്രധാന തടസ്സമായിരുന്നു കോടിമതിയിലുണ്ടായ ഇടുങ്ങിയ പാലം. പുതിയ പാലം തുറക്കുന്നതോടെ ഇതിന് ശാപമോക്ഷമാകും.
പുതിയ പാലത്തിന് സമീപത്ത് നിന്ന് മാർക്കറ്റ് റോഡിലേക്ക് കയറുന്ന ഭാഗത്തെ തിരക്ക് ഒഴിവാക്കാൻ ഇവിടെ ട്രാഫിക് സിഗ്നല്‍ സ്ഥാപിക്കാൻ തീരുമാനമായിട്ടുണ്ട്. കെല്‍ട്രോണിനെയാണ് പൊതുമരാമത്ത് വകുപ്പ് ഇതിന് ചുമതലപ്പെടുത്തിയത്. സിഗ്നല്‍ സ്ഥാപിക്കുന്നതുവരെ ഗതാഗത നിയന്ത്രണത്തിന് ഇവിടെ ട്രാഫിക് പോലീസ് ഉണ്ടാകും.
പുതിയ പാലം ഗതാഗതത്തിന് തുറക്കുന്നതോടെ എംസി റോഡില്‍ കോടിമതയിലെ രൂക്ഷമായ ഗതാഗതക്കുരുക്കിന് ശാശ്വതപരിഹാരമാകുമെന്നാണ് പൊതുമരാമത്ത് വകുപ്പ് പറയുന്നത്. പുതിയപാലം തുറക്കുന്നതോടെ പഴയ പാലത്തിൻ്റെ സമീപനപാത നവീകരണം ദേശീയപാത അതോറിറ്റി ആരംഭിക്കുകയും ചെയ്യും. 128 മീറ്റര്‍ നീളവും 12 മീറ്റര്‍ വീതിയിലുമാണു കോടിമത രണ്ടാംപാലം നിര്‍മിച്ചിരിക്കുന്നത്‌.
തിരക്കേറിയ പാതകളിലൊന്നായ എംസി റോഡ് നവീകരണം പൂർത്തിയായിട്ടും പഴയ പാലത്തിൻ്റെ വീതിക്കുറവ് മേഖലയില്‍ ഗതാഗതക്കുരുക്കിന് കാരണമായിരുന്നു. കോട്ടയം മെഡിക്കല്‍ കോളജിലേക്കും ജനറല്‍ ആശുപത്രിയിലേക്കും തെക്കൻ ജില്ലകളില്‍ നിന്നെത്തുന്ന അത്യാഹിത രോഗികള്‍ അടക്കമുള്ളവർ കോടിമതയിലെ കുരുക്കില്‍പ്പെടുന്നത് പതിവായിരുന്നു. ഇനി ഈ കരുക്കില്ലാതെ കടന്നുപോകാൻ കഴിയും.
രണ്ട് പാലങ്ങളും പൂർത്തിയാകുന്നതോടെ കോട്ടയം നഗരത്തിലേക്ക് പ്രവേശിക്കുന്നതിനും പുറത്തേക്ക് പോകുന്നതിനും വണ്‍വേ ട്രാഫിക് ക്രമീകരിക്കാനും കഴിയും. പുതിയ പാലത്തിലൂടെ വാഹനങ്ങള്‍ കടത്തിവിടുന്നതോടെ പഴയ പാലത്തിൻ്റെ നവീകരണം ആരംഭിക്കും. അഞ്ചു വര്‍ഷത്തോളം നിര്‍മാണം നിലച്ചുകിടന്ന കോടിമത രണ്ടാംപാല നിര്‍മാണ പ്രവര്‍ത്തനങ്ങള്‍ ഒരു വര്‍ഷം മുമ്പാണ്‌ പുനഃരാരംഭിച്ചത്‌. പഴയ പാലത്തിൻ്റെ കോട്ടയം ഭാഗത്തേക്കുള്ള അപ്രോച്ച്‌ റോഡ് താഴ്‌ന്നതും യാത്രാദുരിതത്തിന് കാരണമായിരുന്നു.
പഴയ പാലത്തിൻ്റെ വീതി കുറവ് തന്നെയായിരുന്നു മേഖലയിലെ പ്രധാന പ്രശ്നം വാഹനങ്ങളുടെ തിരക്ക് കൂടിയതോടെ കോടിമതയില്‍ വാഹനങ്ങളുടെ നീണ്ടനിര അനുഭവപ്പെട്ടു. ഇതോടെയാണ് പുതിയ പാലം നിർമിക്കാനുള്ള തീരുമാനം എടുത്തതും നിർമാണ പ്രവർത്തനങ്ങള്‍ ആരംഭിച്ചതും. ഉയരത്തില്‍ നിർമിച്ച പുതിയ പാലം യാഥാർഥ്യമായതോടെ കോടിമത ബോട്ട് ജെട്ടി കേന്ദ്രീകരിച്ചുള്ള ബോട്ട് സർവീസുകള്‍ക്കും ടൂറിസം വികസനത്തിനും വഴിയൊരുങ്ങും
