തിരുവനന്തപുരം: തദ്ദേശ ഉപ തിരഞ്ഞെടുപ്പ് ഫലം വന്നപ്പോള്‍ എല്‍ഡിഎഫിന് മുന്നേറ്റം. ഇതില്‍ വ്യത്യസ്തമായത് പാലക്കാട് ജില്ലയിലെ മല്‍സരമാണ്.
ചിറ്റൂര്‍ മണ്ഡലത്തിലെ തത്തമംഗലം മുന്‍സിപ്പാലിറ്റിയില്‍ ഇരു സ്ഥാനാര്‍ഥികള്‍ക്കും കിട്ടിയത് തുല്യവോട്ട്. സുമേഷ് അച്യുതന്‍ എംഎല്‍എ ആയതോടെ കൗണ്‍സിലര്‍ സ്ഥാനം രാജിവെച്ചിരുന്നു. തുടര്‍ന്നാണ് 24ാം വാര്‍ഡില്‍ ഉപതിരഞ്ഞെടുപ്പ് വേണ്ടി വന്നത്.
എല്‍ഡിഎഫ്, യുഡിഎഫ് സ്ഥാനാര്‍ഥികള്‍ക്ക് 433 വോട്ടുകള്‍ ലഭിച്ചു. തുടര്‍ന്ന് ടോസിടാന്‍ തീരുമാനിക്കുകയായിരുന്നു. ഭാഗ്യം എല്‍ഡിഎഫ് സ്ഥാനാര്‍ഥി തുളസീധരനൊപ്പമായി. യുഡിഎഫ് സീറ്റ് ഇതോടെ എല്‍ഡിഎഫ് പക്ഷത്തേക്ക് മാറി. ജയം ഉറപ്പിച്ച്‌ ആത്മവിശ്വാസത്തിലായിരുന്നു യുഡിഎഫ് ക്യാമ്പ്. ഇവിടെ അപ്രതീക്ഷിത തിരിച്ചടിയാണ് അവര്‍ക്ക് നേരിട്ടത്.
അതേസമയം, പാലക്കാട് ജില്ലയില്‍ പട്ടഞ്ചേരി പഞ്ചായത്തില്‍ നടന്ന ഉപതിരഞ്ഞെടുപ്പിലും എല്‍ഡിഎഫിനാണ് ജയം. മലമ്പുഴ ബ്ലോക്ക് പഞ്ചായത്തിലെ ഹേമാംബിക ഡിവിഷനില്‍ നടന്ന ഉപതിരഞ്ഞെടുപ്പില്‍ ജയം എല്‍ഡിഎഫിന് തന്നെയായിരുന്നു.
ആലത്തൂര്‍ ബ്ലോക്കിലെ അത്തിപ്പറ്റയില്‍ മുസ്ലിം ലീഗ് ജയിച്ചിരുന്ന സീറ്റ് ഇത്തവണ സിപിഎം ജയിച്ചു. മുമ്പ് സിപിഎം പതിവായി ജയിച്ചിരുന്ന സീറ്റാണിത്. കഴിഞ്ഞ തിരഞ്ഞെടുപ്പ് വേളയില്‍ ഇടതുക്യാമ്പിലുണ്ടായ വിഭാഗീയത മുസ്ലിം ലീഗിന് നേട്ടമായിരുന്നു. ജയിച്ച വ്യക്തി ജോലി കിട്ടി പോയതോടെയാണ് ഇവിടെ ഉപതിരഞ്ഞെടുപ്പ് വേണ്ടി വന്നത്.
അതേസമയം, കരിമ്പ പഞ്ചായത്തിലെ വാര്‍ഡ് യുഡിഎഫ് നിലനിര്‍ത്തി. ശ്രീകൃഷ്ണപുരം പഞ്ചായത്തിലെ വാര്‍ഡ് എല്‍ഡിഎഫിന് നഷ്ടമായി. നേരത്തെ ജയിച്ച എല്‍ഡിഎഫ് അംഗം പോക്‌സോ കേസില്‍പ്പെട്ടതോടെയാണ് ഇവിടെ ഉപതിരഞ്ഞെടുപ്പ് വേണ്ടി വന്നത്. ഫലം വന്നപ്പോള്‍ യുഡിഎഫിന് അനുകൂലമായി. 48 വോട്ടുകള്‍ക്കാണ് വി ഗിരീശന്‍ ജയിച്ചത്.
