കങ്ങഴ : വിദ്യാഭ്യാസ രംഗത്ത് ഗുണപരമായ ചലനം സൃഷ്ടിച്ചുകൊണ്ട് വിദ്യാർത്ഥി വികസിപ്പിച്ചെടുത്ത അത്യാധുനിക ഓൺലൈൻ പഠന-പരീക്ഷാ പ്ലാറ്റ്ഫോം ശ്രദ്ധേയമാകുന്നു. മുണ്ടത്താനം ലിറ്റിൽ ഫ്ലവർ വിദ്യാനികേതൻ ആന്റ് ജൂനിയർ കോളജിലെ പന്ത്രണ്ടാം ക്ലാസ് വിദ്യാർത്ഥി അഭിനവ് ബിയുടെ നേതൃത്വത്തിലാണ് വിദ്യാർത്ഥി കേന്ദ്രീകൃതമായ ഈ പ്ലാറ്റ്ഫോം വികസിപ്പിച്ചെടുത്തിരിക്കുന്നത്.
കൂടുതൽ ഫലപ്രദമായ പഠനവും പരീക്ഷാ പരിശീലനവും വിദ്യാർത്ഥികൾക്ക് ലഭ്യമാക്കുക എന്ന ലക്ഷ്യത്തോടെയാണ് സിനാപ്സ് രൂപകൽപ്പന ചെയ്തിട്ടുള്ളത്. വിഷയാടിസ്ഥാനത്തിലുള്ള വലിയ ചോദ്യശേഖരം, കമ്പ്യൂട്ടർ അടിസ്ഥാനമാക്കിയുള്ള ഓൺലൈൻ പരീക്ഷകൾ, വിദ്യാർത്ഥികളുടെ പ്രകടന വിശകലനം, അധ്യാപകർക്ക് നിയന്ത്രിക്കാവുന്ന മൂല്യനിർണ്ണയ സംവിധാനങ്ങൾ തുടങ്ങിയ വിപുലമായ സൗകര്യങ്ങൾ ഇതിൽ ഉൾപ്പെടുത്തിയിട്ടുണ്ട്.
ഓൺലൈൻ പരീക്ഷകളിൽ മത്സരപ്പരീക്ഷകൾക്ക് സമാനമായി സമയ സൂചിക, ചോദ്യ ക്രമം, ഉത്തരങ്ങൾ സംരക്ഷിക്കൽ, വീണ്ടും പരിശോധിക്കൽ, പരീക്ഷ പൂർത്തിയാക്കി സമയബന്ധിത സമർപ്പണം തുടങ്ങിയ സൗകര്യങ്ങൾ ഈ പ്ലാറ്റ്ഫോം വിഭാവനം ചെയ്യുന്നു. പരീക്ഷ പൂർത്തിയാക്കിയ ശേഷം വിദ്യാർത്ഥികളുടെ സ്കോർ, ഉത്തരങ്ങളുടെ കൃത്യത, ഓരോ വിഷയത്തിലുമുള്ള പ്രകടനം എന്നിവ കൃത്യമായി വിശകലനം ചെയ്യാനും ഇതിലൂടെ വിദ്യാർത്ഥികൾക്ക് സാധിക്കും.
ആധുനിക രീതിയിൽ പഠനവും പരിശീലനവും മൂല്യനിർണ്ണയവും ഒരൊറ്റ പ്ലാറ്റ്ഫോമിൽ സംയോജിപ്പിച്ചിരിക്കുന്നു എന്നതാണ് സിനാപ്സിന്റെ ഏറ്റവും വലിയ പ്രത്യേകത. കമ്പ്യൂട്ടർ സയൻസും ഗണിതശാസ്ത്രവും ഐശ്ചിക വിഷയമായി തിരഞ്ഞെടുത്തിരിക്കുന്ന അഭിനവിന്റെ ഈ മികച്ച സാങ്കേതിക സംരംഭം അഭിമാനകരമാണെന്ന് മുണ്ടത്താനം ലിറ്റിൽ ഫ്ലവർ വിദ്യാനികേതൻ സ്കൂൾ അധികൃതർ അറിയിച്ചു.
