പാലാ: ജനറല് ആശുപത്രി റോഡ് നിർമ്മാണവുമായി ബന്ധപ്പെട്ട് പാലാ നഗരസഭയും പൊതുമരാമത്ത് വകുപ്പും തമ്മില് തുറന്നപോര്.
നഗരസഭാ ചെയർപേഴ്സണ് മായാ രാഹുല് വിളിച്ചുചേർത്ത ജനറല് ആശുപത്രി റോഡ് നിർമ്മാണ അവലോകന യോഗത്തില് പൊതുമരാമത്ത് റോഡ് വിഭാഗം അസിസ്റ്റന്റ് എക്സിക്യൂട്ടീവ് എൻജിനീയർ സിയാ നൗഷാദ് പങ്കെടുക്കാത്തതാണ് വിവാദമായത്.
അസിസ്റ്റന്റ് എക്സിക്യൂട്ടീവ് എൻജിനീയറുടെ നടപടിയില് നഗരസഭാ ചെയർപേഴ്സണ് പ്രതിഷേധിച്ചു. ഡിസംബറിന് മുമ്പ് റോഡ് തുറക്കണമെന്ന കർശന നിർദ്ദേശവും മായാ രാഹുല് മുന്നോട്ടുവെച്ചു.
വിവിധ വകുപ്പുകളുടെ ഏകോപനമില്ലായ്മയും തർക്കങ്ങളും മൂലം ഒരു വർഷമായി മുടങ്ങിക്കിടക്കുന്ന ജനറല് ആശുപത്രി റോഡ് നിർമ്മാണം ഇനിയും നീട്ടിക്കൊണ്ടപോകാൻ അനുവദിക്കില്ലെന്നും ചെയർപേഴ്സണ് വ്യക്തമാക്കി.
വെറും 100 മീറ്റർ മാത്രം ദൈർഘ്യമുള്ള റോഡിന്റെ നിർമ്മാണം പൂർത്തിയാക്കാൻ ജനങ്ങള് ഒരു വർഷമായി കാത്തിരിക്കേണ്ടിവരുന്ന സാഹചര്യം അംഗീകരിക്കാനാവില്ലെന്ന് ചെയർപേഴ്സണ് പറഞ്ഞു.
റോഡ് നിർമ്മാണം സംബന്ധിച്ച പരാതികള് വർദ്ധിച്ച സാഹചര്യത്തിലാണ് ചെയർപേഴ്സന്റെ ചേംബറില് പൊതുമരാമത്ത് റോഡ് വിഭാഗം, വാട്ടർ അതോറിട്ടി, കെ.എസ്.ഇ.ബി, ആശുപത്രി അധികൃതർ എന്നിവരുടെ സംയുക്ത യോഗം വിളിച്ചുചേർത്തത്.
വൈസ് ചെയർമാൻ ബിജു മാത്യൂസ്, നഗരസ വികസന സമതി കണ്വീനർ ബിജു പാലൂപ്പടവൻ, നഗരസഭാ സെക്രട്ടറി എം.എസ്. ആകാശ് തുടങ്ങിയവർ യോഗത്തില് പങ്കെടുത്തു.





