കോട്ടയം: പാത്രിയർക്കീസ് ബാവയുടെ മണർകാട് പള്ളി സന്ദർശനത്തില് സ്പീക്കർ തിരുവഞ്ചൂർ രാധാകൃഷ്ണനെ വേദിയിലിരുത്തി സർക്കാരിനെ വിമർശിച്ച് ഓർത്തഡോക്സ് സഭ.
സർക്കാരിന് ലഭിച്ച വിചിത്ര നിയമോപദേശത്തിലൂടെ സഭയ്ക്കേറ്റ മുറിവ് ഗൗരവത്തോടെ കാണണമെന്ന് ഡോ.യൂഹാനോൻ ദീയസ്ക്കോറോസ് മെത്രാപ്പോലീത്ത പറഞ്ഞു. മൂലേടം പള്ളിയില് സ്പീക്കർ പങ്കെടുത്ത പരിപാടിയിലാണ് കോണ്ഗ്രസിനും സർക്കാരിനുമെതിരെയുള്ള വിമർശനം രേഖപ്പെടുത്തിയത്.
മണർകാട് പള്ളിയില് പാത്രിയർക്കീസ് ബാവ കുർബാന അർപ്പിക്കുന്നതിനെ ഓര്ത്തഡോക്സ് സഭ എതിര്ത്തിരുന്നു.
മെത്രാപ്പോലീത്തയുടെ വാക്കുകള്
വളരെ വിചിത്രമായ ഒരു നിയമ ഉപദേശം മൂലം മലങ്കര സഭയ്ക്ക് ലഭിച്ചതായ മുറിവ് അത് ഉണക്കി എടുക്കേണ്ടത് ആവശ്യമാണ്, അത് ഉണങ്ങണം. ഉണങ്ങാനായിട്ട് ആരാണോ മുറിവ് ഉണ്ടാക്കിയത് അവർ തന്നെ ശ്രദ്ധിക്കണം എന്നുള്ളത്, ഏറ്റവും ആദരണീയനായ കേരള നിയമസഭ സ്പീക്കർ, ഞാൻ വ്യക്തിപരമായി ഹൃദയം തുറന്ന് സ്നേഹിക്കുന്ന ഏറ്റവും ബഹുമാന്യനായ തിരുവഞ്ചൂർ രാധാകൃഷ്ണൻ സാറിന്റെ മുന്നില് വച്ച് പറയുകയാണ്.
എവിടെയാണോ മുറിവുണ്ടാക്കാൻ കാരണമായത് ആ മുറിവ് ഉണക്കി എടുക്കാനുള്ള ഉത്തരവാദിത്തം കൂടി ഉണ്ട് എന്നുള്ളത് ഞാൻ സ്നേഹപൂർവ്വം ഒന്ന് ഓർമപ്പെടുത്തുകയാണ്.കൂടുതലായി ഈ വേദിയില് പറയാനായിട്ട് ഒക്കുന്നില്ല.
ലഡു കൊണ്ട് എറിഞ്ഞാലും എയർ ആണെന്നുള്ള കാര്യം ഏവരും മനസ്സിലാക്കണം. വളരെ ഭംഗിയായി ലഡുവില് പൊതിഞ്ഞ സമാധാനം വരുത്തിയിട്ട് ഊക്കി എറിഞ്ഞാല് കൊള്ളുന്ന ലഡു ആരുടെ ദേഹത്ത് കൊള്ളുന്നുവോ അവർക്കത് മുറിവായി തന്നെ മാറുമെന്ന യാഥാർത്ഥ്യത്തെ സമൂഹം കൃത്യമായി മനസ്സിലാക്കിയിരിക്കണം എന്നുള്ള കാര്യം സ്നേഹപൂർവം ഞാനൊന്ന് പറയുകയാണ്.
ഇന്നത്തെ ദിവസത്തെ വേദന ഇന്ന് പറഞ്ഞില്ലെങ്കില് നാളത്തേക്ക് മാറ്റിവെച്ചു കഴിഞ്ഞാല് അത് ശരിയാവുകയില്ല എന്നുള്ളതുകൊണ്ടാണ് ഞാൻ ഇത് പറഞ്ഞത്.
അതുകൊണ്ട് ഇടവക പ്ലാറ്റിനം ജൂബിലി ആഘോഷിക്കുമ്പോള് ഇടവകയുടെ മാതാവായ സഭയ്ക്ക് ഏറ്റ മുറിവിനെക്കുറിച്ച് കൂടി ഗൗരവത്തോടെ നിങ്ങള് ചിന്തിക്കുകയും ആരാണ് മുറിവേല്പ്പിച്ചത് അവരോടൊക്കെ സ്നേഹത്തിലും ബഹുമാനത്തിലും ആദരവിലും തന്നെ പെരുമാറി മുറിവ് ഉണക്കാനുള്ള മാർഗങ്ങള്ക്ക് വേണ്ടി ദൈവസന്നിധിയില് മുട്ടിപ്പായി പ്രാർഥിക്കുകയും ചെയ്യുക എന്ന് മാത്രമാണ് ബലഹീനനായ എനിക്ക് പറയാനുള്ളത്.






