തിരുവനന്തപുരം: പി എസ് സി പരീക്ഷാ തട്ടിപ്പിൽ നിയമനം ലഭിച്ചവർ പ്രതികളാകുന്നതോടെ കേരളത്തെ പിടിച്ചു കുലുക്കിയ നിർണായക കേസായി ഇത് മാറും. കിട്ടിയ ജോലി നഷ്ടപ്പെടുകയും കേസിൽ പ്രതികളുമാവും. ഉന്നത സ്ഥാനങ്ങളിൽ ഇരിക്കുന്നവർ വരെഇക്കൂട്ടത്തിലുണ്ട്.
കേരള സർവ്വകലാശാലയിലെ വിവാദമായ അസിസ്റ്റൻറ് ഗ്രേഡ് തട്ടിപ്പില്‍ നിയമനം ലഭിച്ചവരില്‍ 38 പേരാണ് പ്രതികളാവുക.
ഗൂഢാലോചനയില്‍ ഇവർക്കും പങ്കുണ്ടെന്നും ഉടൻ അഡീഷണല്‍ കുറ്റപത്രം നല്‍കുമെന്നും ക്രൈം ബ്രാഞ്ച് എസ് പി വി.ജി.രവീദ്രനാഥ് വ്യക്തമാക്കി. നിലവില്‍ അസിസ്റ്റൻറ് രജിസ്ട്രാർ തസ്തികയിലെത്തിയവർ വരെയാണ് പ്രതികളാകുന്നത്.
കേരളത്തെ പിടിച്ചുകുലുക്കിയ നിയമനത്തട്ടിപ്പാണ് കേരളയിലെ അസിസ്റ്റൻറ് ഗ്രേഡ് പരീക്ഷയില്‍ നടന്നത്. 2008ലായിരുന്നു നിയമനം. ആകെ നിയമിക്കപ്പെട്ടത് 181 പേർ. അതിലെ 38 പേരുടെ നിയമനം അനധികൃതമാണെന്നാണ് ക്രൈം ബ്രാഞ്ച് കണ്ടെത്തല്‍. ഇതില്‍ പലരും സിപിഎം നേതാക്കളുടെ ബന്ധുക്കളാണ്. പ്രതികളായ ഉദ്യോഗസ്ഥർക്കെതിരെ എന്ത് കുറ്റം ചുമത്തണമെന്നതില്‍ നിയമോപദേശം തേടും.
മുൻ വിസി എംകെ രാമചന്ദ്രൻ നായർ, മുൻ പ്രോ വിസി ഡോ ജയപ്രകാശ് അടക്കം 7 പേരെ പ്രതികളാക്കി ആദ്യ കുറ്റപത്രം ഇന്ന് കോടതിയില്‍ നല്‍കി. 40000 ത്തോളം പേർ എഴുതിയ പരീക്ഷയുടെ ഉത്തരക്കടലസുകള്‍ നശിപ്പിച്ചാണ് ക്രമക്കേട് നടത്തിയത്. എഴുത്തുപരീക്ഷയില്‍ മാർക്ക് കുറഞ്ഞ വേണ്ടപ്പെട്ടവർക്ക് അഭിമുഖത്തില്‍ മാർക്ക് കൂട്ടിക്കൊടുക്കുകയായിരുന്നു. പ്രതികളാകുന്ന ഉദ്യോഗസ്ഥർക്കെതിരെ തുടർനടപടി ശ്രദ്ധേയമാണ്. 2009ല്‍ അനർഹരെ പിരിച്ചുവിടണമെന്ന് ലോകായുക്ത ഉത്തരവിട്ടിരുന്നു . പക്ഷെ നിയമനം ലഭിച്ചവർ ഹൈക്കോടതിയെ സമീപിച്ച്‌ സ്റ്റേ നേടിയിരുന്നു. പ്രതികളാക്കിയാല്‍ ഉദ്യോഗാർത്ഥികള്‍ കോടതിയെ സമീപിക്കാനിടയുണ്ട്.
