ബംഗളുരു: നവജാത ശിശുവിനെ പിതാവ് വീട്ടിനുള്ളിലെ ഭൂഗര്ഭ ജലസംഭരണിയിലെറിഞ്ഞ് കൊലപ്പെടുത്തി. കര്ണാടകയിലെ ചിക്കബല്ലാപ്പൂരിലാണ് സംഭവം.
രണ്ടാമതും പെണ്കുഞ്ഞ ജനിച്ചതിലുള്ള അമര്ഷം മൂലമാണ് ഇയാള് കുട്ടിയെ വെള്ളത്തിലെറിഞ്ഞ് കൊന്നത്. രണ്ടാഴ്ച മാത്രം പ്രായമുള്ള കുഞ്ഞിനെയാണ് പിതാവ് അതിക്രൂരമായി കൊലപ്പെടുത്തിയത്.
സംഭവത്തില് 28-കാരനായ ഇമ്രാനെ പൊലീസ് അറസ്റ്റ് ചെയ്തു. ഇമ്രാന്െയും ഭാര്യ മുസ്കാന്റെയും ആദ്യത്തെ കുട്ടിയും പെണ്കുട്ടിയാണ്. രണ്ടാമത് തനിക്കൊരു ആണ്കുഞ്ഞുണ്ടാകുമെന്നാണ് ഇയാള് പ്രതീക്ഷിച്ചിരുന്നത്. എന്നാല് വീണ്ടും പെണ്കുഞ്ഞ് പിറന്നതിലുള്ള കടുത്ത അമര്ഷവും നിരാശയുമാണ് കൊലപാതകത്തിലേക്ക് നയിച്ചതെന്ന് പൊലീസിന് വ്യക്തമാക്കി.
വ്യാഴാഴ്ച പുലര്ച്ചെ വീട്ടിലുള്ളവരെല്ലാം ഉറങ്ങുന്ന സമയത്താണ് ഈ ദാരുണ സംഭവം നടന്നത്. അമ്മയുടെ അരികില് ഉറങ്ങിക്കിടന്നിരുന്ന കുഞ്ഞിനെ ആരുമറിയാതെ എടുത്തു കൊണ്ട് പോയി ഇയാള് വീട്ടിനുള്ളിലെ വാട്ടര് സംപിലേക്ക് വലിച്ചെറിഞ്ഞു. പ്രഭാതത്തില് ഉണര്ന്ന അമ്മ കുഞ്ഞിനെ കാണാതെ പരിഭ്രാന്തയായി ചോദിച്ചപ്പോഴും ഒന്നുമറിയാത്ത ഭാവത്തില് ഇയാള് വീട്ടുകാരോടൊപ്പം കുഞ്ഞിനെ കണ്ടെത്താനെന്ന വ്യാജേന തിരച്ചിലില് പങ്കുചേരുകയും ചെയ്തു.
എവിടെയും കണ്ടെത്താനാകാതെ വന്നതോടെ സംശയം തോന്നി വീട്ടുകാര് വെള്ളം വറ്റിച്ചു നോക്കിയപ്പോഴാണ് കുഞ്ഞിന്റെ മൃതദേഹം ഉള്ളില് കണ്ടെത്തിയത്. വിവരമറിഞ്ഞ് സ്ഥലത്തെത്തിയ ചിക്കബല്ലാപ്പൂര് ടൗണ് പൊലീസ് പോസ്റ്റ്മോര്ട്ടത്തിനായി മൃതദേഹം മാറ്റുകയും തുടര്ന്നുള്ള ചോദ്യം ചെയ്യലില് സംശയം തോന്നി പിതാവായ ഇമ്രാനെ കസ്റ്റഡിയിലെടുക്കുകയുമായിരുന്നു.
