പാലാ: നിർമ്മാണം പൂർത്തിയാക്കി പൊതുമരാമത്ത് വകുപ്പ് റവന്യൂ വകുപ്പിന് കൈമാറിയ നെല്ലിയാനിയിലെ മിനി സിവില്‍ സ്റ്റേഷൻ അനക്‌സ് മന്ദിരം അടുത്ത ആഴ്ച മുതല്‍ സജീവമാകും.
മോട്ടോർ വാഹന വകുപ്പ്, റവന്യൂ വകുപ്പ്, അളവ് തൂക്ക വിഭാഗം എന്നിവയുടെ ഓഫീസുകള്‍ ഇവിടെ പ്രവർത്തനം തുടങ്ങും. ഓഫീസ് മാറ്റത്തിനുള്ള നടപടികള്‍ പുരോഗമിക്കുകയാണ്.
സർക്കാർ കെട്ടിടമുണ്ടായിട്ടും മാസംതോറും ലക്ഷങ്ങള്‍ മാസവാടക നല്‍കിയാണ് പരിമിതമായ സൗകര്യങ്ങളോടെ പാലാ സബ് റീജണല്‍ ട്രാൻസ്‌പോർട്ട് ഓഫീസ് പ്രവർത്തിച്ചിരുന്നത്. പരാതി പരിഹാര അദാലത്തുകളില്‍ നാട്ടുകാർ പരാതി നല്‍കിയതിനെ തുടർന്ന് കളക്ടറുടെ നിർദ്ദേശപ്രകാരം വെള്ളവും വൈദ്യുതിയും കഴിഞ്ഞ വർഷം റവന്യൂ വകുപ്പ് ലഭ്യമാക്കി പ്രതിമാസ ചാർജുകളും അടച്ചിരുന്നു.
നിയമസഭാ തിരഞ്ഞെടുപ്പിന് മുമ്പ് ഓഫീസ് മാറ്റം നടപ്പാക്കാൻ ജില്ലാ കളക്ടർ ഉത്തരവിട്ടിരുന്നുവെങ്കിലും നടപ്പായില്ല. ഇത് ചൂണ്ടികാട്ടി പാസഞ്ചേഴ്‌സ് അസോസിയേഷൻ ഉള്‍പ്പെടെയുള്ള സംഘടനകള്‍ മന്ത്രി സി.പി.ജോണിന് നല്‍കിയ നിവേദനത്തെ തുടർന്നാണ് മോട്ടോർ വാഹനവകുപ്പ് ഓഫീസ് നെല്ലിയാനിയിലേയ്ക്ക് മാറ്റാൻ മന്ത്രി കർശന നിർദ്ദേശം നല്‍കിയത്.
ഓഫീസ് മാറ്റങ്ങള്‍ സംബന്ധിച്ച്‌ ചർച്ച ചെയ്യാൻ റവന്യൂ, പൊതുമരാമത്ത് ,ട്രാൻസ്‌പോർട്ട് വകുപ്പ് അധികൃതരുടെ യോഗം ഈയാഴ്ച ചേരും.
