ഡല്‍ഹി: മെഡിക്കല്‍ പി.ജി പ്രവേശന നടപടികളില്‍ നിർണായക മാറ്റത്തിനൊരുങ്ങി കേന്ദ്ര സർക്കാർ.
നീറ്റ് പി.ജി, നീറ്റ് എസ്.എസ് പരീക്ഷകളിലെ നിലവിലെ പെർസെന്റൈല്‍ അടിസ്ഥാനത്തിലുള്ള യോഗ്യതാ രീതി ഒഴിവാക്കി റാങ്ക് അടിസ്ഥാനത്തിലുള്ള മെറിറ്റ് സംവിധാനം നടപ്പാക്കാനാണ് നീക്കം.
പുതിയ നിർദേശം പ്രാബല്യത്തില്‍ വരുന്നതോടെ സീറ്റുകള്‍ ഒഴിഞ്ഞുകിടക്കുന്നു എന്ന കാരണത്താല്‍ പ്രവേശനത്തിനുള്ള കട്ട് ഓഫ് കുറയ്ക്കുന്ന രീതി അവസാനിച്ചേക്കും. 2027 മുതല്‍ പുതിയ സംവിധാനം നടപ്പാക്കാനാണ് ശുപാർശ.
ഡയറക്ടർ ജനറല്‍ ഓഫ് ഹെല്‍ത്ത് സർവീസസിന്റെ നേതൃത്വത്തില്‍ രൂപീകരിച്ച 12 അംഗ വിദഗ്ധ സമിതി തയ്യാറാക്കിയ റിപ്പോർട്ട് നവംബർ 3ന് സുപ്രീം കോടതിയില്‍ സമർപ്പിച്ചു. നാഷണല്‍ മെഡിക്കല്‍ കമ്മീഷൻ നിർദേശത്തിന് തത്വത്തില്‍ അംഗീകാരം നല്‍കിയിട്ടുണ്ട്.
എന്നാല്‍ പുതിയ സംവിധാനത്തിന്റെ വിശദമായ ചട്ടങ്ങള്‍ ഇനിയും അന്തിമമായിട്ടില്ല.
നിലവിലെ രീതിയില്‍ നിശ്ചിത പെർസെന്റൈല്‍ നേടുന്നവർക്കാണ് കൗണ്‍സിലിങ്ങില്‍ പങ്കെടുക്കാൻ യോഗ്യത ലഭിക്കുന്നത്.
ജനറല്‍ വിഭാഗത്തിന് 50-ാം പെർസെന്റൈലും എസ്.സി, എസ്.ടി, ഒ.ബി.സി വിഭാഗങ്ങള്‍ക്ക് 40-ാം പെർസെന്റൈലുമാണ് സാധാരണ യോഗ്യതാ മാനദണ്ഡം. എന്നാല്‍ പുതിയ രീതി വരുന്നതോടെ പരീക്ഷയില്‍ ലഭിക്കുന്ന മാർക്കിന്റെ അടിസ്ഥാനത്തില്‍ തയ്യാറാക്കുന്ന റാങ്ക് പട്ടികയ്ക്കായിരിക്കും പ്രാധാന്യം.
മെറിറ്റ് അനുസരിച്ചായിരിക്കും സീറ്റ് അനുവദിക്കുക. റാങ്ക് പട്ടികയില്‍ പിന്നിലുള്ളവർക്ക് സീറ്റുകള്‍ ഒഴിവുണ്ടെങ്കിലും പ്രവേശനം ലഭിക്കാത്ത സാഹചര്യമുണ്ടാകാം.
