മഥുര: വൃന്ദാവനിലെ റസിഡൻഷ്യല്‍ സ്കൂളില്‍ വെള്ളം ടാങ്ക് വൃത്തിയാക്കുന്നതിനായി അകത്തേക്ക് ഇറങ്ങിയ നാല് വിദ്യാർഥികള്‍ക്ക് ദാരുണാന്ത്യം.
മറ്റൊരു വിദ്യാർഥിയെ അബോധാവസ്ഥയില്‍ പുറത്തെടുത്തു. ഇയാളുടെ നില നിലവില്‍ തൃപ്തികരമാണെന്ന് പോലീസ് അറിയിച്ചു. ചൊവ്വാഴ്ച രാത്രിയായിരുന്നു സംഭവം.
വൃന്ദാവൻ പോലീസ് സ്റ്റേഷൻ പരിധിയിലെ ചൈതന്യ വിഹാർ കോളനിയിലെ മഹർഷി പരിണി സംസ്കൃത വിദ്യാലയത്തിലാണ് സംഭവം. സംഭവവുമായി ബന്ധപ്പെട്ട് റസിഡൻഷ്യല്‍ സ്കൂള്‍ മാനേജർ ആശിഷ് ശർമയെ പൊലീസ് അറസ്റ്റ് ചെയ്തു. ഇയാള്‍ക്കെതിരെ കേസ് രജിസ്റ്റർ ചെയ്തിട്ടുണ്ട്. മരിച്ച ഓരോ വിദ്യാർഥിയുടെയും കുടുംബത്തിന് നാല് ലക്ഷം രൂപ വീതം ധനസഹായം നല്‍കുമെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പ്രഖ്യാപിച്ചതായി അധികൃതർ അറിയിച്ചു.
സംഭവത്തില്‍ നിന്ന് രക്ഷപ്പെട്ട രുദ്ര വിദേശിന്റെ ദൃശ്യങ്ങളെന്ന് അവകാശപ്പെടുന്ന ഒരു വീഡിയോയും സമൂഹമാധ്യമങ്ങളില്‍ പ്രചരിക്കുന്നുണ്ട്. വെള്ളടാങ്കിനുള്ളില്‍ വിദ്യാർഥികള്‍ പ്രവേശിച്ചതും പിന്നീട് ഒരോരുത്തരായി ബോധരഹിതരായതും സംബന്ധിച്ച വിവരങ്ങള്‍ രുദ്ര വീഡിയോയില്‍ വിശദീകരിക്കുന്നുണ്ട്.
