ലപ്പുറം: ജപ്തിക്ക് വന്ന അഭിഭാഷക കമ്മീഷനെ നജീബ് കാന്തപുരം എംഎല്‍എ തിരിച്ചയച്ച സംഭവത്തില്‍ കേസെടുത്ത് പൊലീസ്.
എംഎല്‍എക്കെതിരെ മേലാറ്റൂർ പൊലീസ് ആണ് കേസ് എടുത്തത്. പെരിന്തല്‍മണ്ണ വേങ്ങൂരില്‍ ജപ്തി നടപടിക്കെത്തിയ അഭിഭാഷക കമ്മിഷനെ ഭീഷണിപ്പെടുത്തിയ കേസിലാണ് നടപടി. കണ്ടാലറിയാവുന്ന നാല് പേരെയും കേസില്‍ പ്രതിചേർത്തിട്ടുണ്ട്. മഞ്ചേരി ചീഫ് ജുഡീഷ്യല്‍ മജിസ്ട്രേട്ട് കോടതിയുടെ നിർദേശപ്രകാരമാണ് പൊലീസ് കേസെടുത്തത്. എംഎല്‍എ സമർപ്പിച്ച മാപ്പപേക്ഷയില്‍ മഞ്ചേരി ചീഫ് ജുഡീഷ്യല്‍ മജിസ്ട്രേറ്റ് കോടതി നാളെ വിധി പറയും.
പെരിന്തല്‍മണ്ണ വേങ്ങൂരിലെ വീട്ടില്‍ കോടതി ഉത്തരവുപ്രകാരം ജപ്തിനടപടിക്കെത്തിയപ്പോള്‍ എംഎല്‍എ മോശമായി പെരുമാറുകയും കൃത്യനിർവഹണം തടസ്സപ്പെടുത്തി തിരിച്ചയക്കുകയും ചെയ്തതെന്നാണ് അഭിഭാഷക കമ്മിഷണർ കോടതിയില്‍ നല്‍കിയ പരാതിയില്‍ ആരോപിക്കുന്നത്. സംഭവത്തില്‍ കോടതി മേലാറ്റൂർ പൊലീസിനോട് വിശദീകരണം തേടിയിരുന്നു. വീട് ജപ്തിചെയ്താല്‍ ആത്മഹത്യചെയ്യുമെന്ന് കുടുംബം അറിയിച്ചപ്പോള്‍ പെട്ടെന്നുണ്ടായ വികാരപ്രകടനമാണ് എംഎല്‍എയുടെ ഭാഗത്തുനിന്നുണ്ടായതെന്നാണ് പൊലീസ് കോടതിയെ അറിയിച്ചത്.
