.കോട്ടയം : കോട്ടയം നഗരസഭ കേന്ദ്ര ഓഫിസ് നാഗമ്പടത്തേക്ക് മാറ്റുന്നു. പോപ്പ് മൈതാനത്തിനു എതിർവശത്ത് ഇൻഡോർ സ്റ്റേഡിയത്തോടു ചേർന്നു ഇപ്പോള്‍ ലോറി പാർക്കിങ്ങിനായി നല്‍കിയിരിക്കുന്ന സ്ഥലത്താണ് പുതിയതായി കെട്ടിടസമുച്ചയം പണിയുക.ഭാവിയില്‍ കോർപറേഷനായാല്‍ പ്രയോജനപ്പെടുത്താൻ കഴിയും വിധം സൗകര്യങ്ങള്‍ ഉള്‍പ്പെടുത്തിയാകും നിർമാണം.ആദ്യഘട്ടത്തില്‍ മൂന്നു നിലക്കെട്ടിടമാണ് പണിയുന്നത്.പാർക്കിങ് സംവിധാനവും കൗണ്‍സില്‍ ഹാളും ഓഡിറ്റോറിയവും വിവിധ സ്ഥിരം സമിതി അധ്യക്ഷരുടെ ഓഫിസും സന്ദർശക ഗാലറിയും ഉള്‍പ്പെടെ രാജ്യാന്തര നിലവാരത്തില്‍ ഐഎസ്‌ഒ മാതൃകയിലാകും പുതിയ ഓഫിസ്.ഇ-ഫയലിങ് നിർബന്ധമാക്കും.
നഗരസഭയുടെ കുമാരനല്ലൂർ, നാട്ടകം മേഖല ഓഫിസുകള്‍ക്കും പുതിയ ബഹു നിലക്കെട്ടിടം പണിയും.ഇവിടങ്ങളിലും കോണ്‍ഫറൻസ്, മിനി ഹാളുകള്‍ ഉണ്ടായിരിക്കും.
ബസ് സ്റ്റാൻഡ് നവീകരണം, തിരുവാതുക്കല്‍ എപിജെ അബ്ദുല് കലാം ഓഡിറ്റോറിയം നവീകരണം എന്നിവയാണ് ഇതോടനുബന്ധിച്ച്‌ നടത്തുന്ന മറ്റു നിർമാണ പ്രവർത്തനങ്ങള്‍. തിരുവാതുക്കല്‍ എപിജെ അബ്ദുല് കലാം ഓഡിറ്റോറിയം ഏറെ വർഷങ്ങളായി ഇലക്‌ട്രോണിക് വോട്ടിങ് മെഷീൻ (ഇവി എം) സൂക്ഷിക്കുന്നതിനു നല്‍കിയിരിക്കുകയായിരുന്നു.ഹൈക്കോടതി ഉത്തരവിലൂടെയാണ് കെട്ടിടം ഒഴിപ്പിച്ചത്.
