കുമരകം: വിബി ജി റാംജി പദ്ധതിയുടെ ഭാഗമായി തോടുകൾ, പാടശേഖരങ്ങൾ കനാലുകൾ, തുടങ്ങിയ ജലാശയങ്ങളോട് ചേർന്ന് ശുചീകരണ ജോലികളിൽ ഏർപ്പെടുന്ന തൊഴിലാളികൾക്ക് ആവശ്യമായ സുരക്ഷാ ഉപകരണങ്ങളും പ്രാഥമിക ചികിത്സാ സൗകര്യങ്ങളും അടിയന്തരമായി ലഭ്യമാക്കണമെന്ന് ആവശ്യപ്പെട്ട് ബിജെപി പഞ്ചായത്ത് മെമ്പർമാർ പഞ്ചായത്ത് സെക്രട്ടറിക്ക് നിവേദനം നൽകി.
സുരക്ഷാ ബൂട്ട്, കയ്യുറ, മാസ്ക് എന്നിവയ്ക്കൊപ്പം ഓരോ തൊഴിലുറപ്പ് യൂണിറ്റിനും ഫസ്റ്റ് എയ്ഡ് കിറ്റും ആവശ്യമായ മരുന്നുകളും ലഭ്യമാക്കണമെന്ന് ആവശ്യപ്പെട്ടു. മലിനജലവുമായി സമ്പർക്കം ഉണ്ടാകുന്നതിലൂടെ എലിപ്പനി ഉൾപ്പെടെയുള്ള രോഗങ്ങൾ പിടിപെടാനുള്ള സാധ്യതയും ചൂണ്ടിക്കാട്ടി.
വിബി ജി റാംജി നിയമം, 2025-ലെ വകുപ്പ് 9(2), രണ്ടാം പട്ടികയിലെ ഖണ്ഡിക 4(2), 5(1), 5(2) എന്നിവ പ്രകാരം തൊഴിലിടങ്ങളിലെ പ്രാഥമിക ചികിത്സാ സൗകര്യങ്ങളും അപകടങ്ങളിൽ പരിക്കേൽക്കുന്ന തൊഴിലാളികൾക്കുള്ള ചികിത്സാ ആനുകൂല്യങ്ങളും ഉറപ്പാക്കേണ്ടതുണ്ടെന്നും മെമ്പർമാർ ചൂണ്ടിക്കാട്ടി.
തൊഴിലാളികളുടെ ആരോഗ്യവും സുരക്ഷയും ഉറപ്പാക്കാൻ പഞ്ചായത്ത് അടിയന്തര നടപടി സ്വീകരിക്കണമെന്ന് മെമ്പർമാരായ പി. കെ. സേതു, വികെ. സുനിത്ത്, നീതു റെജി എന്നിവർ ആവശ്യപ്പെട്ടു.
