മുവാറ്റുപുഴ: ബിവറേജസ് ഔട്ട്ലെറ്റില് മോഷണ ശ്രമത്തിനിടെ പുറത്തുവെച്ച സ്വന്തം മൊബൈല് ഫോണ് തിരികെ എടുക്കാൻ എത്തിയ കള്ളൻ പൊലീസിന്റെ പിടിയിലായി.
പിടിച്ചുപറിയും മോഷണ കേസുകളും ഉള്പ്പെടെ നിരവധി കേസുകളില് പ്രതിയായ കുര്യൻമല സ്വദേശി നൈസാബിനെ (28) മുവാറ്റുപുഴ പൊലീസ് അറസ്റ്റ് ചെയ്തു. വെള്ളൂർക്കുന്നത്തെ ബിവറേജസ് കോർപ്പറേഷന്റെ മദ്യശാലയില് ചൊവ്വാഴ്ച രാത്രിയായിരുന്നു മോഷണ ശ്രമം. രണ്ടാം നിലയിലെ മദ്യശാലയിലേക്ക് കയറുന്നതിനായി പ്രതി ഇരുമ്പ് ഗോവണിയില് ജീൻസ് അഴിച്ചുവെച്ച് അടിവസ്ത്രം മാത്രം ധരിച്ചാണ് മുകളിലേക്ക് കയറിയത്. ജീൻസിനൊപ്പം മൊബൈല് ഫോണും അവിടെത്തന്നെ വെച്ചിരുന്നു.
താഴ് ആയുധം ഉപയോഗിച്ച് മുറിക്കാനും പൊളിക്കാനും ശ്രമിച്ചെങ്കിലും മോഷണം നടത്താൻ സാധിച്ചില്ല. ബുധനാഴ്ച രാവിലെ ജീവനക്കാർ എത്തിയപ്പോഴാണ് താഴ് പൊളിക്കാൻ ശ്രമിച്ചതും ഗോവണിയില് വസ്ത്രവും മൊബൈല് ഫോണും കിടക്കുന്നതും ശ്രദ്ധയില്പ്പെട്ടത്. സംഭവത്തിന്റെ ദൃശ്യങ്ങള് സിസിടിവിയില് പതിഞ്ഞിരുന്നു. തുടർന്ന് പൊലീസ് വസ്ത്രവും ഫോണും കസ്റ്റഡിയിലെടുത്ത് സ്ഥലത്ത് നിരീക്ഷണം ശക്തമാക്കി. ഉച്ചയോടെ ഫോണ് എടുക്കാൻ പ്രതി തിരിച്ചെത്തിയപ്പോള് കൈയോടെ പിടികൂടുകയായിരുന്നു. അതിക്രമിച്ച് കടന്നതിനും മോഷണശ്രമത്തിനും നൈസാബിനെതിരെ കേസെടുത്തതായി പൊലീസ് അറിയിച്ചു.
