ഡെൽഹി: നെടുമ്പാശ്ശേരി അപകടത്തില്‍ ഇടപെട്ടു എന്ന ഡിവൈഎഫ്‌ഐയുടെ ആരോപണം പൂർണമായി നുണയാണെന്ന് എക്സൈസ് മന്ത്രി എം.
ലിജു. സംഭവം ശ്രദ്ധയില്‍പ്പെട്ടപ്പോള്‍ തന്നെ മദ്യം നല്‍കിയ സ്ഥാപനങ്ങള്‍ക്കെതിരെ കേസെടുക്കാൻ നിർദേശം നല്‍കിയിരുന്നതായി അദ്ദേഹം ദില്ലിയില്‍ മാധ്യമപ്രവര്‍ത്തകരോട് പറഞ്ഞു. ഒരു പ്രതിക്കുവേണ്ടിയും ഇടപെട്ടിട്ടില്ലെന്നും മദ്യപിച്ച്‌ മൂന്ന് പേരുടെ ജീവനെടുത്ത പ്രതിക്ക് പരമാവധി ശിക്ഷ നല്‍കണമെന്നാണ് അഭിപ്രായമെന്നും അദ്ദേഹം വ്യക്തമാക്കി. ഡിവൈഎഫ്‌ഐ ഇത്തരം നുണപ്രചാരണങ്ങള്‍ അവസാനിപ്പിക്കണമെന്നും തെറ്റായ വിവരങ്ങള്‍ പ്രചരിപ്പിക്കുന്നവരെ പിന്തിരിപ്പിക്കാൻ സംസ്ഥാന ഡിവൈഎഫ്‌ഐയും സിപിഎം നേതൃത്വവും തയ്യാറാകണമെന്നും അദ്ദേഹം ആവശ്യപ്പെട്ടു. തനിക്ക് പ്രതിയെക്കുറിച്ച്‌ അറിയില്ലെന്നും മോട്ടോർ വാഹന നിയമം കുറച്ചുകൂടി കർശനമാക്കണമെന്നാണ് തന്റെ അഭിപ്രായമെന്നും മന്ത്രി പറഞ്ഞു.
ഡിവൈഎഫ്‌ഐ ആരോപണങ്ങള്‍ പൂർണ്ണമായും തള്ളി കോണ്‍ഗ്രസ് നേതാവ് എ.എ. ഷുക്കൂറും രംഗത്തെത്തി. സർക്കാരും പൊതുസമൂഹവും കർശനമായ നിയമങ്ങളുമായി മുന്നോട്ടുപോകുമ്പോള്‍ 'ചോര തന്നെ കൊതുകിന് കൗതുകം' എന്ന തരത്തിലാണ് ഡിവൈഎഫ്‌ഐ പ്രവർത്തിക്കുന്നത് എന്ന് അദ്ദേഹം വിമർശിച്ചു. തനിക്ക് പ്രതികളെ അറിയില്ലെന്നും ആരോപണം തെളിയിക്കാൻ കഴിഞ്ഞാല്‍ പൊതുപ്രവർത്തനം അവസാനിപ്പിക്കാൻ തയ്യാറാണെന്നും എ.എ. ഷുക്കൂർ വെല്ലുവിളിച്ചു.
