കോട്ടയം: യുവജനങ്ങളിൽ മയക്കുമരുന്ന് വിരുദ്ധ സന്ദേശം വ്യാപിപ്പിക്കുകയും ആരോഗ്യകരവും ലഹരിമുക്തവുമായ ജീവിതശൈലി പ്രോത്സാഹിപ്പിക്കുകയും ചെയ്യുക എന്ന ലക്ഷ്യത്തോടെ, കോട്ടയം ജില്ലാ ജുഡീഷ്യറിയും ജില്ലാ ലീഗൽ സർവീസസ് അതോറിറ്റി (DLSA), കോട്ടയവും സംയുക്തമായി "RUN4LIFE - Say No to Drugs" എന്ന പേരിൽ 2026 ജൂലൈ 25-ന് മിനി മാരത്തൺ സംഘടിപ്പിക്കുന്നു.
കേരള ഗ്രാമീണ ബാങ്കിൻ്റെ മുഖ്യ സഹകരണത്തോടെയും ജില്ലാ പോലീസ്, ജില്ലാ എക്സൈസ് വകുപ്പ്, കോട്ടയം ബാർ അസോസിയേഷൻ എന്നിവയുടെ സഹകരണത്തോടെയും, വിവിധ ക്ലബ്ബുകൾ, കെ.ജി. കോളേജ് (പാമ്പാടി), എം. ഡി. സെമിനാരി സ്കൂൾ, ഉൾപ്പെടെയുള്ള കോട്ടയം നഗരത്തിലെ വിവിധ വിദ്യാഭ്യാസ സ്ഥാപനങ്ങളുടെ പങ്കാളിത്തത്തോടെയുമാണ് പരിപാടി സംഘടിപ്പിക്കുന്നത്.
മാരത്തണിന്റെ ഫ്ലാഗ് ഓഫ് കർമ്മം കോട്ടയം കലക്ടറേറ്റിൽ രാവിലെ 6.30ന് പ്രിൻസിപ്പൽ ജില്ലാ ജഡ്ജി കെ. സനിൽ കുമാർ നിർവഹിക്കും. മയക്കുമരുന്ന് വിരുദ്ധ പ്രതിജ്ഞയും ചൊല്ലിക്കൊടുക്കും. കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ മുഖ്യസന്ദേശം നൽകും.
ജഡ്ജി കെ. സനിൽകുമാറിൻ്റെ നേതൃത്വത്തിൽ കോട്ടയത്തുള്ള ജഡ്ജിമാർ, ജില്ലാ കലക്ടർ, ജില്ലാ പോലീസ് മേധാവി, ഡെപ്യൂട്ടി എക്സൈസ് കമ്മീഷണർ, മുൻസിപ്പൽ ചെയർമാൻ, കോട്ടയം ജില്ലയിലെ വിവിധ സ്കൂളുകളിലും കോളേജുകളിലുമുള്ള നൂറുകണക്കിന് വിദ്യാർത്ഥികൾ, അഭിഭാഷകർ, അഡ്വക്കേറ്റ് ക്ലർക്ക്, ബാങ്ക് ഉദ്യോഗസ്ഥർ, വിവിധ സർക്കാർ വകുപ്പുകളിലെ ഉദ്യോഗസ്ഥർ, ജനപ്രതിനിധികൾ, പൊതുജനങ്ങൾ തുടങ്ങിയവർ മിനി മാരത്തണിൽ പങ്കെടുക്കുന്നു.
മയക്കുമരുന്ന് ഉപയോഗത്തിൻ്റെ ദൂഷ്യഫലങ്ങളെക്കുറിച്ച് സമൂഹത്തിൽ അവബോധം സൃഷ്ടിക്കുകയും, കായിക പ്രവർത്തനങ്ങളിലൂടെ യുവതലമുറയെ ആരോഗ്യകരമായ ജീവിതശൈലിയിലേക്ക് പ്രചോദിപ്പിക്കുകയും ചെയ്യുക എന്നതാണ് മിനി മാരത്തണിന്റെ പ്രധാന ലക്ഷ്യം. സമൂഹ പങ്കാളിത്തവും നിയമബോധവത്കരണ പ്രവർത്തനങ്ങളും ശക്തിപ്പെടുത്തി മയക്കുമരുന്ന് വിരുദ്ധ പ്രചാരണത്തിന് കൂടുതൽ കരുത്തേകുന്നതിനുള്ള ജില്ലാ ജുഡീഷ്യറിയുടെയും ജില്ലാ ലീഗൽ സർവീസസ് അതോറിറ്റിയുടെയും തുടർച്ചയായ ശ്രമങ്ങളുടെ ഭാഗമായാണ് ഈ പരിപാടി സംഘടിപ്പിക്കുന്നത്.
കോട്ടയം ജില്ലാ കോടതി സമുച്ചയത്തിൽ നിന്ന് നിശ്ചിത റൂട്ടിലൂടെ ആരംഭിക്കുന്ന മിനി മാരത്തൺ, അതേ വേദിയിൽ സമാപിക്കും. റജിസ്റ്റർ ചെയ്ത എല്ലാ പങ്കാളികൾക്കും സമാപനച്ചടങ്ങിൽ സർട്ടിഫിക്കറ്റുകളും സമ്മാനങ്ങളും വിതരണം ചെയ്യും.
പ്രിൻസിപ്പൽ ജില്ലാ ജഡ്ജി കെ. സനിൽകുമാർ, എംഎസിടി ജഡ്ജ് പ്രസൂൺ മോഹൻ, താലൂക്ക് ലീഗൽ സർവീസസ് കമ്മിറ്റി ചെയർമാൻ ഹരി ആർ. ചന്ദ്രൻ, കോട്ടയം ജില്ലാ നിയമ സേവന അതോറിറ്റി സെക്രട്ടറി അതിക് റഹ്മാൻ, ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി 3 ജഡ്ജ് എസ്. അനന്തകൃഷ്ണൻ,
കേരള ഗ്രാമീണ ബാങ്ക് റീജണൽ മാനേജർ കെ.കെ. ശോഭ എന്നിവർ വാർത്താ സമ്മേളനത്തിൽ പങ്കെടുത്തു.
